1
Ме чужи сэн, кöн öзйö войвыв кодзув,
Вой кыа кöдзö сизим рöма дзирд,
А тöвся енэж вöзйö-койö соддзöн
Став дона сьöмсö - лымъя эзысь чир.
Ме чужи сэн, кöн шувгö помтöм вöр,
Кöн тшапитчöны ниа, коз да пожöм,
Кöн чорыд пужъяс дженьдöдöны гожöм,
Кöн олöны лöз кынь да винёв кöр.
Ме чужи сэн, кöн сöдзöсь парма ёльяс,
Кöн чöскыд льöм дзоридза тувсов тшын,
А тöвнас муыс овлö изйöдз кын.
Но кöдзыд йылысь мый ёнасö дольны?
Ме чужи сэн и нэмöс кута кольны,
Кöн тöлысь улын бисерасьö лым.
2
Кöн тöлысь улын бисерасьö лым,
Кыз эшкын улö дзебö вöр и тундра.
Кöн мортлöн сьöлöм медым вöлi пым,
А мöд ногöн и гöна пасьöн турдан.
Кöн торъя колö отсöг сетысь ки,
Кöн муртавлöны торъя, войвыв донöн
И муслунлысь да ёртасьöмлысь шоныд,
И лöглунлысь да зывöктöмлысь би.
Кöн эбöс — абу сöмын сöнöд сойын,
Кöн öтнад вой тöв кабырысь он мын,
Кöн няргысь мортыд – сöмын мортлöн джын.
Ми чужим тан. И абу ми геройяс
Кодсюрö моз, код во-мöд кежлö воис,
Кöн колö писькöс мортлöн сям да вын.
3
Кöн колö писькöс мортлöн сям да вын,
Мед чоя-вока ногöн овны миян.
Во джынйысь дырджык танi муыс кын,
Но менам парма — сэтшöм жö Россия.
Öд öти шондi сявкйö юръяс весьтын,
И öти мöвпöн уна кыла йöз
Ми орччöн олам-вылам нэмъяс чöж,
И кöдзыд дырйи öти бипур пестам.
Му вылын абу дружбаысь бур би:
Бур ёртасьöм, кыдз туй индалысь кодзув,
Кыдз шуда здукö вöзйöм дона козин.
Советскöй чужан мулöн ныв да пи
Зэв топыд сывйöн сывъясьламöй ми,
Не чегны медым чизыр бушков водзын.
4
Не чегны медым чизыр бушков водзын
Тшöтш колö тöдны, мый на кужлiс пöль,
Öд он кö босьт нэм чöжöн öктöм козин,
То верман лоны медся йöй и гöль.
Но важ дорас мед содас öнъя мывкыд.
Бур тöдсаöн мед лоас, сиктса пи,
Гагарин, Лорка, Сент-Экзюпери –
Быд кадлöн эмöсь аслас сьыланкывъяс.
Да-й сиктса мортыс ачыс лои выль,
И сылöн ёнджык, чожджык лэбан бордйыс –
Оз дзескöдчы нин сöмын чужан гортас,
Оз повзьöд сiйöс олöм каян мыльк,
Öд вынсö сетö, шуны кö нин збыль,
Ас чужан муöй — мамлöн шонтысь морöс.
5
Ас чужан муöй – мамлöн шонтысь морöс,
Да муса чужан кылöй - ловъя лов:
Оз ло ко сiйö – сьöлöм чеччас ортсö,
Оз ло ко сiйö — сэки-й ме ог ов.
Ме кыла чужан кылысь вой тöв увгöм,
И югдöм водзын раскысь лэбач шы,
И лажмыд берег нюлысь мелi гы,
И гулыд ягын пожöмъяслысь шувгöм.
Ме чужан кылöн кужа прöща корны,
Кор сьöлöм вылам водлас мыжлöн пуж,
Кор майшасьöмысь мездысьны ог куж.
Меддонаторйöй, лелькуйтанаторйöй,
Ас чужан кылöй – ичöтик сöдз шорöй,
Ас чужан сиктöй – менам кок ув вуж.
6
Ас чужан сиктöй — менам кок ув вуж:
Сэн кöмтöм кока челядьдырöй лэбис,
Сэн быдман вынсö сетлiс сиктса удж,
Сэсь аски кежлö нёняла ме эбöс.
Мед сьöд и шома, медым йики сора,
Но сэн ме сёйлi медся чöскыд нянь.
И лолöй кыпыд, сьöлöм вылам шань,
Ас сиктса морт кö гортас менö корас.
Зэв нимкодь, шуасны кö мем бур кывъяс
Да веськавла кö батьлы пöрысь сывъяс,
Да мамлысь бурсиöмсö кö ог вудж.
Ме ассьым шудöс мöдлаысь ог тывъяв:
Ме чужан сиктöс ог вунöдлы сутш,
И нимкодясьны сытöг ме ог куж.
7
И нимкодясьны сытöг ме ог куж,
И йöз сёянöн сьöлöмöй оз бурмы.
А чужан сиктам - пужйыд абу пуж,
И гажтöмтчöмлöн дзуг-везйö ог сюр ме.
Мем лöсьыд, кодыр войтырыслы долыд,
Кор лышкыд овлö лун морöса му,
Кор синтöм неминучаыс оз су –
Сэк быттьö гудöкасьö томмöм лолöй.
Тан садьмысь луныс сэтшöм овлö шань,
И нюмъявсьö, и сьывсьöджык мем тан,
И мöрччанаджык овлö сьылан горöй!
И кытчöдз сьöлöм тiпкöмöй оз ланьт,
Ме чужанiнкöд йитöдъяс ог орöд,
Ме сьöкыд здукö локта век сы дорö.
8
Ме сьöкыд здукö локта век сы дорö.
А сьöкыд здукыд - абу на и шоч:
И сконъясьла, и казявлывла сёрöн,
Мый лун шöр бöрыд - абу асывводз.
Мый суны-вöтöдны он ставсö удит,
Мый быд пöрйö он курышт киссьöм ва,
Мый чужöмсьыд он зырт быд пöлöс са,
Мый он век дзоньтав öтчыд разьсьöм шудтö.
Но шаньджык лунъяс, югыд кока войяс,
Век бурдöдлöны чöсöдана дойяс,
Да йитлывлöны весиг чегöм борд,
Кыдз овлö пöльлöн-пöчлöн авъя мойдын.
Ме – сиктса пи. Ме танi асшöр морт –
Оз вунöд мам сьöлöма чужан горт.
9
Оз вунöд мам сьöлöма чужан горт
Ни шы ни тöв, ни свинеч гыма лунъяс,
Кор медся шусян кылöн вöлi «фронт»,
Сьöд кымöр сайö шондiыс кор сунлiс.
И кодi тылтö кутiс, чужан муöй,
Эз бара кымынь усь, эз лэдзчысь вань:
Став вынъяссö сэк зэвтiс коми ань,
А мамöй – томöн-бурöн усис гуö.
И вичмис миян курыд челядьдыр,
И верстьö тöждлун сöлiс пырысь-пыр,
И кусöдалiс синмысь вильыш бияс,
Но öзъян выныс морöсысь оз быр.
И вежöрсьыс оз чуктöд сиктным миян
Ни ловъяöс, ни бойын усьöм пиöс.
10
Ни ловъяöс, ни бойын усьöм пиöс
Оз вунöд: синва эз на косьмы дзик.
Том зонъяс веввтисны фашистскöй биысь
Россияöс и дона чужан сикт.
Эм рытыввыв граница дорын ланьтысь,
И Ленинградöс дорйысь быдмис тан,
Но-й Буткан сиктса öти капитан
Немецкöй карын вöвлi комендантöн.
Эз быдöн су войналысь бöръя лун,
Оз быдöн тöд Победаыслысь нюм,
Но югыд лунсö шедöдiс ас киöн.
Салдатлы вичмис садьмывлытöм ун,
Но сылöн лолыс, нимыс коли миян:
Салдатъяс вöсна дойыс – бурдтöм сiйö.
11
Саладатъяс вöсна дойыс – бурдтöм сiйö,
И казьтылöмлöн ёсьлуныс оз чин.
Сё сайö мортöс воштiс ыджыд биын
Дзик сöмын менам ичöт чужанiн.
Гранитысь сувтiс памятник сикт шöрын –
Сэн нэмъяс кежлö cизьдöма быд лов,
Сiдз быд керкаын кодлöнкö эм лов,
Кыдз ловъя дзоридз памятника йöрын.
Тан кулысь мортöс став олысьыс дзебö.
А выльöн чужысь ставлы содтö эбöс,
Быд би кинь öзтö öтув югöртор.
А ме тай гортлань весиг бордтöг лэба
И пöся-пöся мöвпала кöть кор,
Мед чужан сиктын лоа век ас морт.
12
Мед чужан сиктам лоа век ас морт,
Мед унджык лоас мывкыд чоя-вока,
И менам дженьыд нэмöй кусас кор,
Мед эськö эз жö казьтывлыны лёкöн.
Ме тiян, сиктса зонъяс, нывъяс, аньяс,
Пыр кöсйи восьтны олöмыслысь мич.
Морт вылö лöглун весиг войт эг видз,
Пыр ас войтырлы зiли лоны шаньöн.
Ме рад, мый сиктын гöрддзасьлöма нэмöй,
Мый потан лайкан дзуртлывлöма сэнi –
Шань мывкыд сиктлöн – вежны позьтöмтор.
Зэв окота на аддзывнысö меным,
Мед сиктын лоас унджык шуда морт,
Мед унджык лоас бур сьöлöма ёрт.
13
Мед унджык лоас бур сьöлöма ёрт,
Выль керкаяс мед гоньгöдасны юрсö,
Да кокниджыка шедöдас зiль морт,
Кыдз олан шудсö, сiдз и пöтöс нурсö.
Мед важся шогъяс вунöдас да дзебас,
Ас чужан сиктöй мед жö оз ло, оз,
Кыдз ковтöм-ловтöм, кушмöм-эндöм поз,
Мый зумыш арын эновтлывлö лэбач.
И енмöй видз, мед бырис чужанiн,
Мед сиктöй пыдди колис сöмын ним,
А вояс мысти вуштыссис и сiйö.
Дзик öти кöcйöм сьöлöмысь оз чин,
Пыр мелiджыка шонтö морöс пиын:
Мед нэм оз кусны сиктын öшинь бияс!
14
Мед нэм оз кусны сиктысь öшинь бияс…
Ме бура тöда, крестьянинлöн пи,
Мый вöчлывлöны шойччöм тöдтöм кияс
И синъясаныс кутшöм öзйö би.
Мем олöм резö шуда кодзув дзирд.
И сы вöсна ме уджйöза ас мулы
И томöн-бурöн кувсьöм мамлöн гулы,
И том салдатлы, кодi кисьтiс вир.
И уджйöз тайö воясöн оз ям,
Кöть тiлься, мыйта судзсяс вын да сям.
Да-й кыпыд лолöй чепсасьö на водзö.
И мед жö уна-уна вояс тан,
Ас Коми муын нимкодясьны позяс!
Ме чужи сэн, кöн öзйö войвыв кодзув.
15
Ме чужи сэн, кöн öзйö войвыв кодзув,
Кöн тöлысь улын бисерасьö лым,
Кöн колö писькöс мортлöн сям да вын,
Не чегны медым чизыр бушков водзын.
Ас чужан муöй – мамлöн шонтысь морöс,
Ас чужан сиктöй – менам кок ув вуж,
И нимкодясьны сытöг ме ог куж,
Ме сьöкыд здукö локта век сы дорö.
Оз вунöд мам сьöлöма чужан горт
Ни ловъяöс, ни бойын усьöм пиöс:
Салдатъяс вöсна дойыс – бурдтöм сiйö.
Мед чужан сиктам лоа век ас морт,
Мед унджык лоас бур сьöлöма ёрт,
Мед нэм оз кусны сиктын öшинь бияс!
Назад в раздел
