Кывтасны вояс

Кывтасны вояс,
но сьöлöмад дойыд
некор, ме тöда,
оз бурд
на кузя, кодъяс
фашистъяскöд бойын
пуктiсны
ассьыныс юр.
Пыр кутас казьтывны
вежöдысь пуысь
бать-мамлысь
вунлытöм шог:
куйлöны öтувъя
зэв ыджыд гуын
кодлöнкö верöс да вок.
Помнитöй, ловъяяс,
налысь быд вуджöр,
киподтуй,
синъяслысь сер.
Помнитас мед,
кодi сёрöнджык чужас,
нöйтлiс кыдз
миянöс шер.
Крепыда кутö
гвардейскöй застава
мирнöй границалысь визь.
Усьöмлысь кувлытöм
подвиг да слава
видзö быд сьöлöм да из.


Назад в раздел