На главную страницу
Отправить сообщение
Карта сайта

Закрыть
Логин:
Пароль:
Забыли свой пароль?
Регистрация
 Войти  Регистрация













Календарь

Михаил Павлович Лихачев да тшупöда пасъяc (на коми языке)

07.11.2016 08:55

Таво ноябр 2-öд лунö Коми-Перым муын пасйисны Михаил Павлович Лихачёвлысь да сы нимöн шуöм библиотекалысь 115 во. Коми муысь тайö тшупöда пас вылас Кудымкарö корлiсны куим мортöс: Коми национальнöй библиотекаысь Елена Александровна Выбороваöс, Коми республикаса академиялöн госслужба да управлениеысь научнöй сотрудникöс – Öньö Лавöс да менö, Мария Алексеевна Плосковаöс, журналистöс. Колö шуны, мый тайö тшупöда пасыс ёна торъялiс вит восайся тшупöдсьыс. Наука боксянь вöлi пыдöджыка пырöдчöма М.П.Лихачёвлöн творчествоö, стöчмöдöма сылысь бöръя кадся олöмсö, вöчöма литератураа рыт, нуöдöма сы йылысь творческöй урок, а сэсся востымалысь гаж.  

Лихачёвлöн лыддьысьöмъяс вылö волiсны 150 гöгöр морт, унджыкыс вöлiны Перым муысь библиотекаын уджалысьяс. Татшöм чукöртчылöмыс индiс, мый коми-перым кыв кыпöдöм вöсна ыджыд пай пуктöны библиотекаын уджалысьяс, зэв уджач, мелi да вежöра аньяс. Конференцияöн юрнуöдысьнас вöлi Виталий Леонидович Баяндин, сылы отсасьысьöн – Лихачёв М.П. нима библиотекаöн юрнуöдысьыс Валентина Ивановна Югова. Лыддьысьöмъяс заводитчытöдз миян водзын петкöдчисны сьылысь-йöктысь «Шондiбан» котыр, асланыс востерлунöн миянöс ышöдiсны сьöлöмсянь матыстчыны лыддьысьöмъяс вылö, гöгöрвоöдiсны тшупöда пасыслысь донсö да коланлунсö.

Восьта неуна Михаил Павловичлысь олан туйвизьсö. Михаил Павлович чужлöма 1901 вося ноябр 2-öд лунö Кудымкар районса Ёгва посадын крестьянин семьяын. Велöдчис Ёгваын двукласснöй училищеын, а сэсся Юсьваса учительскöй семинарияын. Уджавнысö босьтчывлiс Поносовскöй начальнöй школаын, но босьтiсны армияö. Армияысь локтöм бöрын велöдiс челядьöс Ёгваса школаын. Такöд тшöтш восьтiс ликбезъяс, кöнi пемыд отирсö велöдiс грамотаö, лыддьысьны да артасьны. А сэсся 1924 воын ыстiсны Шипицынса начальнöй школаö заведующöйöн, а сэсся во уджалöм бöрын вуджöдiсны Кудымкарса народнöй образованиеö. И тасянь олöм туйвизьыс сылöн паськалiс да сöвмис. Заводитiс уджавны «Гöрысь» газетса редакцияын. Командировкаяс дырйи вочасöн кутiс чукöртны сьыланкывъяс, мойдъяс, кыввезъяс. Зэв бур йитöд кутiс Андрей Никифорович Зубовкöд, кодi 1923 воын коми-перым интеллигенциякöд медводдза съезд вылын кыпöдiс сёрни коми-перымса литературнöй кыв лöсьöдöм йылысь. Кыкнанныс заводитiсны дасьтыны челядьлы да верстьöлы велöдчан небöгъяс. Кыкнанныс унаысь волiсны Коми муö. Со мый гижлöма: «Весиг недыр кежлö Усть-Сысольскö волöмыс бордйöдö менö творческöй уджö». Тайö сёрникузяыс Субботин-Пермяк музейса архивысь, 14.12.1936 вося письмöын. М.П.Лихачёв письмöысь казялан, мый эм ёнысь-ён да вына эскöм коми-перым кывлöн сöвмöм вылö. Та могысь босьтчö и Москваса радиостанциясянь сёрнитны перым-коми кывйöн: «Сашук, декабр 15-öд лунö кылан аслад Мишукыдлысь гöлöссö. Ме эска аслам вынлы, кыдзи багатыр-исполин, и ме чайта, мый олöмас вермытöмыс да воöдчытöмыс нинöм оз вермы лоны. Вынöн, вöляöн да вежöрöн верман венны дзик ставсö да мый кöсъян», Субботин-Пермяк музейса архивысь, 05.12.1930 во. Тадз гижис гöтырыслы радио пыр «Быдмам да ёнмам» поэма лыддьöм йылысь, кор пасйисны 13 во Октябрьскöй революциялы. Уна письмöысь казялан, мый мортыс сюртчис коми-зырянакöд öтув олöм лöсьöдöмö: «Миян туйяс, кыв шутöг, зырянакöд öтувъя, да торйöн нин коми литературнöй кыв лöсьöдöмын. Мед менö таысь эз нин öтчыд «нöйтны», но ясыдджыка, пыдiджыка наысь кута мöвпавны тайö проблемаяссö». Музей Субботина-Пермяка, 04.12.1936 во. Василий Ильич Лыткин 1926 воын лэдзис аслас сьöм вылö Москваын медводдза «Коми гижысьяс» небöг, кытчö пыртiс М.П.Лихачёвлысь нёль кывбур, а 1929 воын сылöн петiс торъя небöг «Виль туйöт» («Выль туйöд»). И тайö повесьт бердö Василий Ильич Лыткин гижö медводдза критическöй статья. Тасянь и заводитчö коми литература бурмöдöм вылö топыда кутчысьöмыс. «Тайö зэв этша гижöдъяс пытшкас эмöсь синмö шыбитчана гижöдъяс. Татшöм синмö шыбитчана гижöднас ме лыддя М.П.Лихачёвлысь «Виль туйöт» нима висьтсö» ( Журнал «Ордым», л.70-71, № 10, 1929 во). Водзö Василий Ильич Лыткин 4 номерас гижö, мый гижöдъястö колö видлавны пытшкöслунсяньыс да кужанногсяньыс, а оз ков öта-мöд йылысь лёк сёрни лэдзны, а вöчны литературасö бурмöдöм вылö. М.П.Лихачёв 1927-1937 воясö ассьыс гижöдъяссö лэдзлiс «Ордым» да «Ударник» коми журналъясын. Медбöръя гижöднас вöлi Иван Васильевич Изъюровкöд öтвылысь А.С.Пушкинлысь комиöдöма «Борис Годунов» поэма. Кыкнаннысö, кыдз национальнöй буржуазнöй элементъясöс арестуйтöны.

М.П.Лихачёвлы сиöм лыддьысьöмын медводдза сёрнитысьöн вöлi Перым кытшöн веськöдлысь министр Виктор Васильевич Рычков. Зэв зумыда да ясыда стöчмöдiс Михаил Павловичлысь бöръя кадся олöмсö. Став пукалысьыс залын вöрзьöдчывтöг кывзiсны сылысь висьтсö, а ме гижи видеокамера вылö. Кыдз историк, В.В.Рычков дыр корсьöма арестантлысь документъяссö и Кудымкарысь, и Москваысь, и Сыктывкарысь… Аддзöма Куликовкöд сёрнитiгöн Ижкарса Госархивысь. Чуйми пö. Öд мортсö босьтiсны гортас август 26-öд лунö 1937 воын, и тöдлытöг воши. Гöтрыслы гижöмаöсь юöр, мый босьтiсны верöссö «без права переписки на 10 лет». Гöтырыс, Александра Ивановна, шыöдчывлöма энкэвэдэшникъяс дорö, мыйла та дыра оз лэдзны, но гижöмаöсь, мый 1945 воын мортыс кувсьылöма «от кровоизлияния мозга». Тайö юöрсö вайöмаöсь 1955 воын. А 1956 воас кызь лун водзджык 20-съезд водзас воас гижöд М.П.Лихачёвöс реабилитируйтöм йылысь. Съезд вылас Н.С.Хрущёв восьтас Россияса интеллигенцияöс бырöдöм йылысь документъяс. Но тайö сöмын ышöдiс йöзсö мустöмтны Сталинскöй режимсö. В.В.Рычков аддзас да стöчмöдас став кадсö и сёрнияссö, допросъяссö. Допросъясын аддзöма и Василий Ильич Лыткин йылысь юöръяс. Мый сiйö суйöрса агент волöма Перым муö да лöсьöдöма гуся повстанческöй армия, вын; медым коми-пермякъясöс, карелъясöс, коми зырянаöс öтувтöмöн сетчыны финнъяслöн власть улö. Пожваса заводö пö чукöртöмаöсь винтовкаяс, кöнкö нöшта на пö эм налöн куим пулемёт. Найöс пö поддерживайтöны Германия да Финляндия. Весиг пö А.Зубовлы да М.Лихачёвлы сетöмаöсь дас тысяча шайт виавны Москваысь чина йöзöс. Шемöсмöданаöн вöлi сiйö, мый 1937 воас Лихачёвöс йöршытлöмаöсь сöмын куим тöлысь кежлö. Ноябр 2-öд лунас тырас сылы 36 арöс, а кык лун мысти лыйласны, оз весиг тöдны кöнi, но стöча позьö шуны, кыдзи и В.А.Савинöс, не ас муын, нуöмöн… либö нуöдöмöн. Со кутшöм судьбаыс вежöра мортлöн, ас кыв да культура дорö сулалысьлöн.     Сьöлöмöй ыркнитлiс сэк, кор Надежда Александровна Мальцева петкöдлiс слайдъясöн 20-öд да 30-воясся гижысьяслысь фотографияяс да сувтыштлiс, мый унаöс татысь оз тöд. А меным синмö шыбитчис вит морт пытшкысь шöрас пукалысь Виктор Савин, кодi 1925-öд воас ветлiс Кудымкарö, та йылысь эм юöр «Югыд туй» газетын. Ме весигтö сёрниас пыри да индi, мый тайö коми зыряналöн медвына вежöра мортыс, Нёбдiнса Виттор. Став докладыс вöлi зэв мöвпалана, выль видзöдласа, пыдi пытшкöслуна да кывзана, кыдз Алевтина Степановна Лобановалöн, Перым карса государственнöй университетса доцентлöн; Öньö Лавлöн, кодi коми-перым кывлы дасьтö электроннöй библиотека; Елена Евгеньевна Анисимовалöн – Ижкарса Национальнöй библиотекаын краведческöй литература юкöнöн веськöдлысьлöн, кодi висьтасис кыдзи уджалöны удмурт кывъя гижöдъясöн; сьöлöмсяньыс висьтасис и коми-перым кыв велöдöмын Лихачёвлысь гижöдъяссö пыртöм йылысь Валентина Васильевна Федосеева, а сылöн велöдчысь Федосеева Любовь, 4-öд курсса студентка петкöдлiс мультимедийнöя, кыдзи бур сямöн да наука подув улын вöчны Лихачёв йылысь лыддьысян урокъяс.

Унатор кывлiм, унатор колис вежöрö; пыр думайтам, кыдзи медся тöдчана разведчик Николай Кузнецов – коми-пермяк пукалiс Вылыс Човса дзескыдiнын да нöштана став сьöкыдсö вуджис война кадö. Ыджыд вежöра коми морт бура тöдiс вит кыв, торйöн нин немеч кыв. Тайö и лои помкаöн 1938 воын пуксьöдны дзескыдiнö. Коми-перымсаяс бура туялöны ас йöзöс. Выль вынöн босьтчисны дорйыны ас кыв и библиотекаса уджалысьяс. Öд Кудымкарысь перым кыв туялан институтсö пöдлалiсны, нинöм пö лишнöй сьöм шыблавны комын сюрса олысь карлы. Кодлы пö окота ас му да кыв туявны, мунöй пö уджавны Перым карö. Туйыс Кудымкарсянь Перымöдз 488 шайт. Со и ветлы, öтарö-мöдарö быд лун сюрс шайт кыскы зепсьыд. Унаöн воштicны уджсö, весиг наукаса кандидатъяс. Миянлы тайö вöлi зэв шогаланаторйöн.

Коми-пермякъяс Лихачёвлы сиöм лыддьысьöмъяссö сигöртiсны «Бичирок» ансамбльöн, кытысь казялiм налысь талант, ыджыд сямлун да лача кутана бур олöм. Пöся ми, Коми муысь волысь гöсьтъяс, аттьöалам Лихачёв нима библиотекаса уджалысьясöс лöсьыда примитöмысь да лыддьысьöмъяс дырйи миянöс кывзöмысь. Водзö на ми кутам аддзысьлыны.  


Автор
  • Мария Алексеевна Плоскова, журналист

Возврат к списку







Архив публикаций
   
Пн Вт Ср Чт Пт Сб Вс
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30


Фотоальбом




Rambler's Top100


Главная | Новости | ФУКЦ РФ | Сообщество
Сайт находится в стадии информационного наполнения.
Ваши замечания и пожелания Вы можете оставить здесь.




© Филиал ГРДНТ им. В.Д. Поленова "ФУКЦ РФ", 2007-2017.
При использовании материалов
ссылка на сайт www.finnougoria.ru обязательна.
В оформлении сайта использованы работы Павла Микушева.
Республика Коми, г.Сыктывкар, ул. Ленина, д. 73,
тел./факс (8212) 440-340,
e-mail: fucult@finnougoria.ru