На главную страницу
Отправить сообщение
Карта сайта

Закрыть
Логин:
Пароль:
Забыли свой пароль?
Регистрация
 Войти  Регистрация













Календарь

Югдiн карысь важся гижöдъяс корсьöм (на коми языке)

28.12.2016 10:00

Дзонь нэм да вит во Коми му вöлöма Вöлöгдаса губерния да обласьт бердын. Топыд йитöд кутöмаöсь кыкнан муыс каръяскöд и сиктъяскöд. Вöлöгдаысь Коми муö мöдöдлöмаöсь тöдöмлунъяс кыпöдöм вылö вежа айъясöс, вотъяс чукöртöм вылö бояраöс да му туялысьясöс. Сыктывдiн кар да Вöлöгда бердса каръяс вöлiны муясöн веськöдлöм, йöз лыдсö видзöм вылö медся ён вынöн. Уна вичкоа да пу керкаяса сöстöм карсö коми йöзыс шулöмаöсь Югдiнöн, рочöн Устюгöн. Шливкнитчöма сiйö Сухона ю пöлöн. Медводза йöзыс овмöдчылöмаöсь нёль километраöн öнiя карысь улöджык, веськыд берег вылас, медся джуджыд кыр вылас. Овмöдчан мыльксö нимтöмаöсь Гледенöн (Синъяланаöн), тасянь пö верман зэв ылысь ставсö аддзыны, кыпыда овны. Карсö артмöдöмаöсь Ростовса да Суздальса князьяс. Но абу дыр сулалöма тайö карыс. Чудьяс тöдлытöг усьласьлöмаöсь тайö мыльк вылас, да и сэн жö кутöма быд тулыс кырсö ва босьтны, Сухона да Юг юяс. Сэсся йöзыд вуджасны да овмöдчасны шуйга берегас, и 1212 воын кыпöдасны Михайло-Архангельскöй монастыр. И та бöрын на налы оз сетны лöня овны. Квайтысь дорвыв усьласясны новгородечьяс. Устюгсаяс пыр асьнысö дорйöм вылö шыöдчывлöны вöлöм Мöскуваса князьяс дорö. Сöмын Мöскуваса вына öксы (князь) Василий – I вермис найöс босьтны ас борд улö. XYI-öд нэмсянь Устюг заводитiс сöвмыны кыдз ва туйбердса вузасянiнлöн шöрин. Тайö жö кадсяньыс Иван Грозный чукöртö вот и ыджыд вот мынтöмысь тайö карсö нимтiс Великий Устюгöн. XYIII нэмын Пётр – I юкö Россияöс кöкъямыс губерния вылö и Югдiнöс пыртö Архангелогородскöй губерния улö. Югдiн ассьыс бур славасö воштö, йöзсö пöртöны дормуын олысьясö. А 1780 восянь Екатерина- II индö татчö места вылын веськöдлысьöс, наместникöс. И Югдiнöс пöртö Вöлöгда губернияса уезднöй карö. Öнöдз на тайö карыс пырö Вöлöгдаса область улö. Чуймöдö сiйö, мый тайö карыс оз кыпöд асьсö сынöдлань, а пыр видзö кык судтаа оласногсö. Дзонь уличаяс сулалöны кык судтаа пу керкаясöн, а найöс кытшалöны уна-уна еджыд юсь кодь вичкояс. Öти вичко весьтын сувтöдöма ылi муяс туялысьлы, Югдiн бердса олысьлы – Ерофей Павлович Хабаровлы памятник. Мортыс прöйдитöма Сибырса муяс, вöчöма на йылысь öнöдз на колана мусерпас (карта). 1653 воын Ерофейöс корöмаöсь Амур юбердысь Мöскуваö да сетöмаöсь боярин пи ним. Олöма квайтымын вит арöсöдз да кулöма Иркутска областьын 1670 вося август тöлысьö. Амур да Уссурийск юяс öтлаасянiнö вöлi вöчöма военнöй пост 1858 воö, а сэсся 1893 воö тайö карсö нимтöмаöсь Хабаровскöн. Со кыдзи войвывса морт кольöма ассьыс нимсö ылi Сибырса муö. Тайö памятник саяс сулалöны Михайловскöй монастыр да Преображенско-Сретенскöй вичко. Тайö вичкоас ме мырдöн вöзйысьлы корсьны 18-öд нэмся документъяс. Вичкоас вöчöмаöсь архив. Медводдза корсьысян луныс менам документъяс видзöдöмöн и колис. А мöд луннас аддзи, аддзи 1747 вося медводдза Российскöй переписьысь, Ревизскöй сказкаысь, öкмысöд кöленаысь (вожысь) ассьым рöдöс. Öдйö босьтi гижöдсö тетрадьö, быттьö полi воштыны зарни чиръяс да кутчыси тайö кадся йöзсö, Керчомья вöлöсьтсö, дзоньнас гижны тетрадьö. Тайö кадö став орчча сиктъяссö вöлi пыртöмаöсь Иоанно-Предтеченскöй вичко улö. Зэв дыр ковмис уна ним расшифруйтны, унаöс восьттöг кольлi, но коймöд лунас меным отсалiс нимъяссö восьтны Светлана Юрьевна Савельева, кодi корсьысис Серёгово да Ляли сиктса олысьясöс. Эз коль кадыс Дереваннöй сикт туялöм вылö и ме кори, медым меным разрешитiсны фотографируйтны. И вöлi нимкодь, мый документъяс видзысь Елена Сергеевна Решетникова сетiс снимайтны. Лыдди, меным колö вöлi снимайтны 44 листбок. Сэк жö Ревизскöй сказка видлалöм бöрын аддзи 1775–öд вося Исповедальнöй роспись, кöнi вöлi бара жö Керчомса вöлöсть. Чуймöданаöн вöлi сiйö, мый татысь Титлысь медводдза Степан писö, 28 арсöн 1771 вося август 16-öд лунö мöдöдöмаöсь Сибыр туялöм вылö. Степан Титович – тайö пра-пра-пра-пра-пра-прадедлöн пиыс. Тит Ивановичлöн (1704 воын чужлöма) мöд пиыс – Андрей – менам батьлöн вужйыс. Аддзи и Титлысь гöтырсö – Настасья Елфимовнаöс. Тайö меным вöлi вывтi донаторйöн. Тайö документсö ме кындзи некод на абу восьтлöма. Дереваннöй сикт кöть лои босьтöма 1747 вося Ревизскöй сказкаысь, но лыддьыны документсö зэв сьöкыд.   Документса гижöдыс вушйöма, кельдöдöма и сырзьöма, кöть тайö документнас некод абу на вöдитчывлöма. Куим нэмся кадыс заводитöма сёйны гижöдсö. А 1775 вося Иоанно-Предтеченскöй Керчомса вичколöн документыс зэв бура видзсьöма. Тыдалö, вичкоса батюшкоыс черниласö бура вöчлöма. Эг удит ставсö вит лунöн гижны, но эм лача, мый позяс на ветлыны Югдiнö. Öд туялöм вылö босьтi öкмыс сикт: Канава, Дзоль, Габов, Улыс Воч, Вылыс Воч, Прупт, Носим, Керчомья, Дереваннöй. Найöс босьтi сы вöсна, мый танi став сиктыс топыда йитчöма öта-мöдыскöд: гöтрасьлöмаöсь, кагаясöс пыртлöмаöсь, кулöмаясöс сьылöдлöмаöсь Керчомса Иоанно-Предтеченскöй вичкоын. Став лыддьöдлöм сиктъясысь компьютерö пыртi нин 1790, 1811, 1834, 1854, 1858, 1865, 1874 вося документъяс – тайö вöлi вит вося удж. Син водзын пыр на важ кадся видлалöм документъяс: Ревизскöй сказка, Исповедальнöй ведомость, Клировый ведомость, Метрическöй книга, Воинскöй повинность, Хозяйственнöй книга, мый кольöмаöсь öнiя кадöдз, но уна документ октябрскöй революция дырйи красноармеецъяс вежöрттöг сотöмаöсь. Удайтчас кö лэдзны книгаöн, унаöн стöча аддзасны, ыджыд-ö вöлöма быдöнлöн семьяыс, кор чужлöмаöсь-гöтрасьлöмаöсь-кулöмаöсь рöдыс. Документъясысь вöлi аддзöма и Дереваннöйса велöдысь Александр Александрович Чевский йылысь стöч юöръяс: кор да кыдзи воöма Комиö, кодi да кöнi овлöмаöсь сылöн бать-мамыс. Став документъяс сертиыс тайö мортыслы Дереваннöйын важöн нин колö пуктыны памятник. Босьтчи сiйöс корсьны сы вöсна, мый ыджыд батьöс да мамöс репрессируйтöм бöрын, нёльнан челядьсö налысь сетлöмаöсь А.А.Чевскийлы видзöм вылö, тшöтш и ыджыд батьöн вöчöм выль мича керкасö. Таво удайтчис меным ветлыны Дереваннöй сиктö корсьны Вылыс Пöжöм ин, кöнi ёна быдтылöмаöсь таг, но керка местасö эг аддзи… Кыпыд сьöлöм вылын сiйöн, мый Югдiн вичкоса батюшкояс уна нэм чöж вермöмаöсь видзны зэв колана документъяс. Зэв лышкыда меным сетiсны Югдiнса архивысь корсьны вичкоса гижöдъяссö, но Кардорын (Архангельскын) важ документъяс дорö оз лэдзны весиг учёнöйясöс. Веськыда шуа, мый Коми муыд недыр вöлi Кардорса губерния улын и сэнi эм Коми му йылысь документъяс. Лача кута, мый коркö и татчö лэдзласны. Югдiнын став документъясыс зэв бура видзсьöны и зэв кокниа ставсö верман корсьны. Пыр архивса уджалысьяс вöзйöны ассьыныс отсöг. Танi Коми мулысь сэк кадся уна сикт мичаа гижöма, сöмын колö кужны найöс лыддьыны. Миян архивысь кö велöдчан лыддьыны 1791 вося гижöдъяссö (Коми муö кольöм «Ревизскöй сказка»), сэк кокни пырöдчан ёна сёрöнджык вöчöм гижöдъясö. Миян унаöн сюртчöны туявны ас рöдсö и медым бура тöдны ас рöд, колö пыр туявны дзонь сикт. Тадзи верман вöчны рöдвужлысь медся стöч да кузя нюжалысь вожсö.

Сыктывкар-Югдiн.

Снимокъясыс авторлöн.


Автор
  • Мария Плоскова, журналист

Фотогалерея

Возврат к списку







Архив публикаций
   
Пн Вт Ср Чт Пт Сб Вс
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2


Фотоальбом




Rambler's Top100


Главная | Новости | ФУКЦ РФ | Сообщество
Сайт находится в стадии информационного наполнения.
Ваши замечания и пожелания Вы можете оставить здесь.




© Филиал ГРДНТ им. В.Д. Поленова "ФУКЦ РФ", 2007-2017.
При использовании материалов
ссылка на сайт www.finnougoria.ru обязательна.
В оформлении сайта использованы работы Павла Микушева.
Республика Коми, г.Сыктывкар, ул. Ленина, д. 73,
тел./факс (8212) 440-340,
e-mail: fucult@finnougoria.ru