На главную страницу
Отправить сообщение
Карта сайта

Закрыть
Логин:
Пароль:
Забыли свой пароль?
Регистрация
 Войти  Регистрация













Календарь

Сенюковса школаын казьтысяна рыт (на коми языке)

03.02.2017 11:46

Кембрий саридзса лоцман. Тадз коркö шулöма Василий Михайлович Сенюковöс Фёдор Пудалов, кодi гижлiс сы йылысь тадз жö нимтöмöн ассьыс небöгсö, но медшöр геройнас танi Василий Зырянов. Кембрийыс – му-матушкаыслöн медся важ кадся слöйыс, мый артмылöма сё миллион во сайын. А лоцманыс – сiйö капитанлöн веськыд киыс, кодi бура тöдö ва вывтi ветлан туйяс. Со и артмö, мый мортыс писькöдчывлöма кембрийö, мулöн медся пыдын куйлысь слöяс. Мый корсис мортыс Му пытшкöсысь? Медводз корсис мусир, а сэсся биару. Василий Михайлович Сенюков став олöмсö пуктiс тайö уджас. Калининградсянь Владивосткöдз, да и дзоньнас Сибырсö туялiс-восьтiс Россияса озырлунсö. Сiйö вöлi медся тöдчана геологöн, кодi регыдъя кадöн лои профессорöн, а сэсся академикöн. Став му пытшсьыс аддзöмторйыс да перйöмторйыс вöлi сэкся кадö Василий Михайловичöн вöчöма сы могысь, медым кыпöдны Россияса йöзлысь олöмсö да суйöрсаяс водзын Россиялысь авторитетсö. Уна учёнöй сы йылысь тöдчöдлiсны, мый тайö коми мортыс зэв сюсь, сылы кокниа сетчö наука, сiйö писькöс, быдтор кöсйö тöдны, повтöм, вывтi веськыд (честнöй), сылöн эм сэтшöмтор, мый он казяв мукöд войтырлысь, – быд ловъя лов сылы жаль. В.М.Сенюков чужлöма Емва бердса Онежье сиктын 1906 вося öшым 27-öд лунö важ стиль сертиыс. Батьыс и мамыс сылöн нэм чöжыс пöрöдiсны да кылöдiсны кер, тадз перйисны сёйöм вылö нянь да кöм-пась. Фёдор Щербаков В.М.Сенюков йылысь гижлiс поэма «Емваса зон», мый аслас «питшöгын» пыр на видзö 1974 вося коймöд номерын «Войвыв кодзув» журнал, со ичöтик юкöн «Емваса зонмысь»:

Öд Емва косьястi эз этша

Пыж катöдлыв и кылöд пур.

Но тайö этша, весиг ачыс –

Кор мамыс вуджис Емва кось –

Пур вылын чужис, шондi аддзис,

И гыыс сыв улас эз босьт…

Чужан кадсö вежöмöн авторыс визьнитiс, мый вöлi сьöкыд олöм öтка пилöн. Василий Михайлович йылысь гижлic «Парма пи» очерк «Войвыв кодзувлöн» öкмысöд номерын 1981 воын и сылöн земляк Серафим Алексеевич Попов. Выль петасъясын тайö гижöдъяссö некытчö абу пыртöмаöсь. Но радлам сы вылö, мый Емваса войтырыс Василий Сенюковöс пыр на казьтывлöны и тöдöны, мый тайö гижысьясыс ас кадö мортсö пыдди пуктылiсны да радейтлiсны кыдз ас мортöс.

Тöвшöр 27-öд лунö Емваын да Сьöськаын пасйисны В.М.Сенюковлы чужöмсяньыс 110 во. Медводз Емваын памятнöй стелла дорын сёрниыс мунiс сылöн Россияса экономикаö ыджыд пай пуктöм йылысь, кöнi Михаил Николаевич Матвеев тöдчöдiс, мый Сенюков чужис ас кадö и ас кадö Россиялысь тöдчанлунсö зумыда кыпöдiс. Сёрнитiсны и кыдз В.М.Сенюков пöртiс олöмö ассьыс кöсйöмъяссö, та йылысь висьтасисны Емваса землячествоысь Ангелина Алексеевна Тихомирова, Валентина Сергеевна Коснырева. Зэв сьöлöмсяньыс сёрнитiсны и В.М.Сенюковлöн племянникъясыс да дядьöн шуысьясыс, кыдз Емва школаын биология велöдысь Тамара Николаевна Чеусова. Стелла дорö дзоридзьяс пуктöм бöрын мöдöдчим водзö, Сьöськаö. Танi кыпыда ставнысö паныдалiсны школаса веськöдлысь Валентина Ивановна Чекурдаева да коми кыв велöдысь Галина Евгеньевна Подорова. Казьтывлöмъяссö восьтiсны «Коми гор» теле-радио кампаниеса «Кембрий саридзса лоцман» фильмöн, мый вöлi снимайтöма 1978-öд воын. Танi

В. М.Сенюков йылысь, кыдз бур морт йылысь, висьтасисны Мария Павловна Лапина, Евгений Павлович Калинин, Валентина Александровна Витязева. Сьöлöмö йиджисны Валентина Александровналöн кывъясыс: «Тайö мортыс – мир пасьта нималана морт! Уна ми тöдмалiм сы йылысь и унаторйö ачыс велöдiс и миянöс!». Казьтывлан рытсö зэв кужöмöн нуöдiсны Пархачёва Людмила Ивановна, Наталья Евгеньевна Щанова, Валентина Ивановна Чекурдаева да Галина Евгеньевна Подорова. Став сёрни-висьтасьöмсö вöлi котыртöма сiдз, мый ас пытштiыд став олöмсö геологлысь йирмöгöн йиджтöдан и небыд руöн сывлан ас коми морт дорö, кодi пыр семья понда тöждысис, эскöдiс, мый воас на быдöнлы бур кад. Некор эг тöдлi, мый Сенюков кувсис полевöй испытание дырйи, тшöкыда кывлi, мый мортыс кувсис апендицитысь. Пыр юрын кутi юалöм: «Мыйла кувсис 68 арöсöн? Кыдзи вермис татшöмторйыс лоны Москваын?». Вöлöмкö, М.И.Циферов сетöма мöвп, мый вермам биарутö да мусиртö трубаястöг му пытштiыс нуöдны. И ракетаöн мусирлы кутасны мупытшса туйсö писькöдны да взрыв дырйиыс мортыс усяс воронкаас. Уськöдчасны корсьны, лэптасны геологöс, а сiйö кувтöдз доймалöма… Уна сьöкыдлун вуджöма морт весьтiыс, весиг Лаврентий Берийлы гыжъяс улас веськавлöма, кöсйöма бырöдны мортсö, но Сталин шуöма: «Ме тэныд сiйöс ог сет! Лэдз сiйöс!». И кыкысь Сталинскöй госпремияа морттö мездасны репрессияысь.

Василий Михайлович йылысь Емва библиотекаса уджалысьяс вöчöмаöсь биобиблиографическöй индöд. Библиотекаса веськöдлысь Ирина Васильевана Шашкова да сылöн ас му туялан юкöнöн веськöдлысь Нина Александровна Некрасова слайдъясöн петкöдлiсны, кутшöм небöгъяс эм библиотекаын Сенюков В.М. йылысь. Медся тöдчанаыс тайö аддзысьлöмъясын вöлi Марина Алексеевна Коюшеваöн Василий Михайловичлысь рöдвужсö туялан схемаыс. Сiйö вайöдöма кад серти тшупöдъясöн став рöдсö сылысь 1700 восянь öнiя лунöдз. Ас семья пытшкын Василий вöлi медся ичöт пиöн, сылöн вöлi вит чой. Тшыг кадö, кор заводитчис 1914-öд воын Первой мирöвöй война, заводитiсны кулавны йöзыс. Сэк бать-мамыс кык чойöс, Машаöс да Ольгаöс, йöзкöд пыжöн мöдöдас Вяткаса детдомö. Кывтасны нёль верст, а сэсся Машаыс вöзйысяс асмогасьны, дзебсяс – и бöр пышъяс гортас, а Ольгаöс нэмсö корсисны детдомъясысь, да сiдзи и эз аддзыны. Васялöн чойясыс: Маша, Анна, Лиза да Анисья – ставыслöн нин эм ыджыд мамöн да пöчöн шуысьяс. Найö быд чукöртчöм вылö локтöны Онежьеö да Сьöськаö, медым аддзывны сылысь чужан керкасö, сьöлöмö йиджтысян инъяссö, сыöн чукöртöм изъяссö.

Танi жö Тамара Николаевна Чеусова бур кывъясöн тöдчöдiс, мый медводз миянöс став рöдвужыскöд öтувтiс Виктор Савин нима драма театрöн веськöдлысь Михаил Николаевич Матвеев. Тайö пö пыдди пуктана мортыс ачыс Анюша грездысь, помавлiс Сьöськаса школасö, куим верст сайсянь пö котралiс татчöдз велöдчыны да öнi быд чукöртчывлöмын медся матысса морт, кодi чуйдöдiс ставлы топыд йитöд кутны ас школа помалысьяскöд, öд тайö школаыслы сетöма В.М.Сенюковлысь нимсö. Аддзысьлöмъяссö сигöртiсны Емваса Искусство школаысь Татьяна Юрьевна Бобсуновская юрнуöдöм улын баянöн да аккордеонöн ворсысьяс: Половина Михаил, Виноградов Павел да Светлана Колесникова. Тöдчис налöн ыджыд сямлуныс, ворсöмын визувлуныс и велöдысьлöн талантыс.

Вöлi школаса велöдысьясöн дасьтöма зэв озыр пызан, сэтшöм лöсьыда чукöртöмаöсь пызан вылас сёян-юансö, видзöдлöмнас пöтан. Мыйсö сöмын абу вайöмаöсь, ставыс пö ас йöрысь и картаысь, ас пачысь да залавкаысь! Тадз быд вит во мысти зэв югыда да мичаа пасйöны Василий Михайловичлысь тшупöда пасъяссö и найö дыр кежлö кольöны оз сöмын челядь вежöрö, но и локтысь верстьö йöзлы. Тадз жö пыр кöсйис дядьыслысь паметьсö видзны и Регана Ивановна Попова, мед жö пö пыр кежлö Сьöськаын коляс нимыс В.М. Сенюковлöн ыджыд да писькöс

мортлöн, Коми муöс нимöдысьлöн. Сьöлöмсянь аттьöалам став велöдысьсö, челядьöс лöсьыда дасьтысьöмысь да мичаа петкöдчöмысь. Збыль, сьöлöмö югыда письтiсны В.М.Сенюковöс бура казьтывлöм, Сьöськаса пыдди пуктана велöдысьяслöн рыт котыртöм да вежавидзысь челядьлöн сьылöм-йöктöм.


Автор
  • Мария Плоскова, снимокъясыс авторлöн

Возврат к списку







Архив публикаций
   
Пн Вт Ср Чт Пт Сб Вс
27 28 29 30 31 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30


Фотоальбом




Rambler's Top100


Главная | Новости | ФУКЦ РФ | Сообщество
Сайт находится в стадии информационного наполнения.
Ваши замечания и пожелания Вы можете оставить здесь.




© Филиал ГРДНТ им. В.Д. Поленова "ФУКЦ РФ", 2007-2017.
При использовании материалов
ссылка на сайт www.finnougoria.ru обязательна.
В оформлении сайта использованы работы Павла Микушева.
Республика Коми, г.Сыктывкар, ул. Ленина, д. 73,
тел./факс (8212) 440-340,
e-mail: fucult@finnougoria.ru