Октябрьскöй революция бöрын коми кывлöн да литературалöн сöвмöмыс лои зумыдджык да писькöсджык. Коми муын сьöлöмсяньыс босьтчисны гижны Н.П. Попов (Жугыль), И.В. Изъюров (Изъюр Иван), И.М. Вавилин (Баярса Иван), В.А. Савин (Нивас), В.Т. Чисталёв (Тима Вень), И.И. Сажин (Ичöт Иван), М.Н.Лебедев (Юсь), Г.А.Фёдоров (Педь Гень), И.Е. Худяев (Кос Кабыр), Н.А.Фролов (Сук Парма), А.А.Чеусов (Гöрд Öльöш), Я.И.Чупров (Биа Öгыр) да мукöд. Накöд öтвылысь босьтчисны и коми-пермяк гижысьяс: Зубов Андрей Никифорович да Лихачёв Михаил Павлович. Найö ас водзаныс сувтöдiсны мог: петкöдны сьöд йöзсö, грамотатöм войтырсö, отирсö, выль туй вылö, веськöдны социализм стрöитöм вылö. Öта-мöд костаныс, коми-зыряна да коми-пермякъяс костын, вöлi топыд йитöд. Топыд творческöй йитöдъясыс кыссисны 1938 воöдз, кытчöдз Россия пасьта эз ылькнитчы "лёк висьöм": кык сюрс сайö вежöра гижысьöс вöлi лыйлöма, пуксьöдöма дзескыдiнö, "кöдзöма" налысь ловъяссö Сибырса да Ылi Асыввывса муясö.
Медводз "Сталин налькйö" шедiсны Коми муса гижысьяс, а сэсся и Перымсаяс. Тайö лунъясö менö корлiсны Кудымкарö Лихачёвлы сиöм лыддьысьöмъяс вылö и бур йöзыскöд аддзысьлöмъяс дырйи ме тöдмалi зэв унатор. Кадыс, кор сöстöм вежöра йöзыс кöсйисны бурмöдны олöмсö, артмис зэв шуштöм да сьöлöм вöрзьöдана. Кык гижысь: Василий Ильич Лыткин да Михаил Павлович Лихачёв велöдчисны революция бöрын Москваса государственнöй университетын. Öтиыс – коми-зырянин, мöдыс – коми-пермяк; öтиыс водзджык пырис велöдчыны, а мöдыс – неуна сёрöнджык. Кыкнанныс зэв бура öта-мöднысö тöдiсны. Кудымкарса музейын эм Михаил Павлович Лихачёвлöн письмöяс, кöнi гижö: "Тöрыт вель дыр пукалiм Илля Вась ордын. Волiс и Жугыль (Николай Павлович Попов) Титовкöд, Улитинкöд… сёрнитiм коми литература йылысь, лыддим ассьыным гижöдъяс. Ме сы ордын тшöкыда овла. Зэв бур морт Илля Васьыд, меным зэв ёна кажитчö. Став том йöз пиысь зэв делöвöй морт, сылы сöмын на 34 ар, а сiйö нин приват-доцент – профессор тагöс вылын нин. Веськыда шуа, зэв прöстöй морт, аслас учёнöй нимöн ньöти оз вывтiась". (08.11.1930, Александра Ивановна Лихачёвалы письмöысь).
Михаил Павлович Лихачёв чужлiс 1901 вося вöльгым 4-öд лунö Кудымкар районса Ёгва посадын крестьянин семьяын. Велöдчис Ёгваын двукласснöй училищеын, а сэсся Юсьваса учительскöй семинарияын. Босьтчылiс велöдны и Поносовскöй начальнöй школаын, но босьтiсны армияö. 1921 воын бöр воис армияысь да кутiс велöдны Ёгваса школаын. Такöд тшöтш йöз костас нуöдiс вежöрö сюртчан удж: восьтiс ликбезъяс, кöнi пемыд отирсö велöдiс грамотаö, лыддьысьны да артасьны. А 1924 воын ыстiсны Шипицынса начальнöй школаö заведующöйöн, а сэсся во уджалöм бöрын вуджöдiсны Кудымкарса народнöй образованиеö. И тасянь олöм туйвизьыс паськалiс и паськалiс. Заводитiс уджавны окружнöй газетса "Гöрысь" редакцияын. Командировкаяс дырйи чукöртiс сьыланкывъяс, мойдъяс, кыввезъяс. Мöдöдiсны велöдчыны Москваö. Сыöдз зэв бура ёртасисны Андрей Никифорович Зубовкöд, кодi 1923 воын коми-пермяцкöй интеллигенциякöд медводдза съезд вылын кыпöдiсны сёрни коми литературнöй кыв лöсьöдöм йылысь. Кыкнанныс, кыдзи и коми-зыряна войтыр, заводитiсны дасьтыны челядьлы да верстьöлы велöдчан небöгъяс. Унаысь кыкнанныс волiсны Коми муö. Со мый гижö М.П.Лихачёв: "Весиг недыр кежлö на дорö Усть-Сысольскö волöмыс бордйöдö менö творческöй уджö и мöдарö: кутшöм сьöкыда асьтö кылан, торйöн нин округса пинь пырыс гретшкысьяскöд, кодъяс веськодя да ылöсас босьтчöны миян корöмъяс вылö, мый миянöс медся ёна майшöдлö, медсясö коми литература да культура боксянь". (Субботин-Пермяк музейса архив, А.И.Лихачёва письмöысь,14.12.1936). Веж петлiс коми-пермъякъяслöн миян гижысьяс вылö, кодъяс топыда кутчысисны кыв сöвмöдöмö да литература кыпöдöмö. А коми-зыряналöн гижысь котырыс вöлi дзонь армия. Но М.П. Лихачёв письмöясысь казялан, мый эм ён-вына эскöм коми-перым кывлöн сöвмöм вылö. Та могысь босьтчö и Москваса радиостанциясянь сёрнитны перым коми кывйöн: "Сашук, декабр 15-öд лунö кылан аслад Мишукыдлысь гöлöссö. Ме эска аслам вынлы, кыдз багатыр-исполин, и ме чайта, мый олöмас вермытöмыс да воöдчытöмыс нинöм оз вермы лоны. Вынöн, вöляöн да вежöрöн верман венны дзик ставсö да мый кöсъян". (Субботин-Пермяк музей, архив, 05.12.1930). Тадз гижис гöтырыслы радио пыр "Быдмам да ёнмам" поэма лыддьöм йылысь, кор пасйисны 13 во Октябрскöй революциялы.
Уна письмöысь позьö казявны, мый мортыс сюртчис коми-зырянакöд öтув олöм лöсьöдöм вылö, индö, мый коми нация (зыряна да пермякъяс) мунö социализмö кык туйöн: "Миян туйяс, кыв шутöг, зырянакöд öтувъя, да торйöн нин коми литературнöй кыв лöсьöдöмын… Мед менö таысь эз нин и öтчыд "нöйтны", но ме… ясыдджыка, пыдiджыка наысь кута мöвпавны тайö проблемаяссö". (04.12.1936). 1926 воö Василий Ильич Лыткин лэдзис аслас сьöм вылö Москваын медводдза "Коми гижысьяс" небöг, кытчö пыртiс и М.П.Лихачёвлысь нёль кывбур, фотография да сы йылысь неыджыд юöр. А 1929 воын торъя небöгöн петiс повесть "Виль туйöт" ("Выль туйöд"). И тайö повесьт бердö Василий Ильич Лыткин гижö медводдза критическöй статья. Тасянь и заводитчö коми литература бурмöдöм вылö топыда кутчысьöмыс. "Тайö зэв этша гижöд пытшкас эмöсь синмö шыбитчана гижöдъяс. Татшöм синмö шыбитчана гижöднас ме лыддя М.П. Лихачёвлысь "Виль туйöт" нима висьтсö". ("Ордым", л.70-71, № 10, 1929 во). Водзö 4-öд номерас Василий Ильич Лыткин гижö, мый гижöдъястö колö видлавны пытшкöслунсяньыс да кужанногсяньыс, а оз ков öта-мöд йылысь лёк сёрни лэдзöм вылö, а сы вылö, медым бурмöдны литература критикасö.
М.П.Лихачёв 1927-1937 воясö ассьыс гижöдъяссö лэдзлiс "Ордым" да "Ударник" коми журналъясын. Медбöръя гижöднас вöлi Иван Васильевич Изъюровкöд öтвылысь А.С. Пушкинлысь комиöдöм поэма "Борис Годунов".
Кыкнан гижысьсö удтiсны сыысь, быттьö найö кыкнан коми войтырсö ыззьöдöны öтувтчыны финнъяслöн борд улö. 1933 вося январын Василий Ильич Лыткинöс Москваын арестуйтöны да ыстöны вит во кежлö Хабаровскöй крайö. А М.П. Лихачёвöс 1937 вося октябрь тöлысьö пуксьöдöны тайö жö, "СОФИН" (Союз освобождения финских народностей) делö кузяыс да дзик стöч чужан лунас, ноябрь 4-öд лунö лыйлöны.
110 во тырис М.П.Лихачёвлöн чужöмсяньыс. Меным удайтчис ветлыны и Ёгваö, кöнi чужис-быдмылiс тайö вежöра мортыс, керка гöгöрыс кытшовтны да и пыравны. Олöны танi Олимпиада чойыслöн внук да внучкаыс. Сылöн Виктор вокыс ловъя на, олö пö Вильнюсын, да овсö пö вежöма, мед эз вöтлыны Литваысь. Зэв кыпыда тшупöда пассö нуöдiсны Кудымкарса национальнöй библиотекаын. Кык лун мунiс конференция библиотекаса куим ыджыд залын. Чукöртчылiсны куимсё сайö морт. Бура ставнысö примитiсны узьтöдiсны кык вой да зэв чöскыда вердiсны. Унатор петкöдлiсны, унатор и колим вежöраным. Ыджыд аттьö Галина Семёновна Гордеевалы, кодi эз сöмын чукöрт быд пельöсысь йöзсö, но и бара на, кыдз М.П.Лихачёв, босьтчис öтувтны кык коми войтырлысь творческöй вынъяссö.
Сыктывкар-Пермь-Кудымкар-Ёгва.
М.А.Плоскова, фотоясыс авторлöн.
