Сыктывкарыште - "Марий Ял" (на марийском языке)

24.01.2008 12:12

Российын финн-угор культура рўдерыштыже (тудыжо Сыктывкар олаште верланен) 15 январьыште "Марий ял финн-угор фотохудожник-влакын ончалтышышт дене" куснылшо выставка почылтын. Тудо тў‰алтышым Морко районысо Унчо селаште ыштен, вара Йошкар-Олаште лийын. Коми Республика деч ончыч марий ялым Ямал-Ненец да Хант-Манси автономный округлаште, Карелийыште, тыгак Финляндийыште ужын кертыныт. 

Фотовыставка почылтмо кечын рўдерын кумда залыштыже марий муро, сем-влак йо‰галтыныт, марий калыкын илыш-йўлаж нерген фильм-влак ончыкталтыныт. Зал кумда гынат, погынышо калыклан тыште шыгырын чучын - финн-угор фотохудожник-влакын пашашт шкеж дек шукыштым сымыстарен. Саламлыме шомакым Коми Республикын культура министрже Н.Боброва ден национальный политика министрже В.Коробов ойленыт. Вара Коми национальный гимназийын "Горадзуль" ансамбльже шке мастарлыкшым ончыктыш: коми, марий да руш йылмыла дене муро-влакым шергылтарыш. Инта ола гыч "Пеледыш аршаш" ансамбльын марла кушталтымыже пуйто шочмо-кушмо верыштак улмо шижмашым шочыктыш. 

Тиде куснылшо фотовыставка шочмашке изи огыл надырым Финн-угор журналист-влакын Российысе ассоциацийыштын президентше А.Абдулов, Морко районысо "Передовик" ял озанлык артельын председательже Г.Григорьев пыштеныт. Нунын тыршымышт денак Унчо селаште фотограф-влакын усталык семинарышт эртен. Тудым кызытат порын шарнат. Семинарын ик участникше, Коми Республика гыч фотограф Е.Казаковын шомакше почеш, тиде мероприятий марий калыкын илыш-йўлаж дене гына огыл, тыгак Российысе финн-угор кундемлаште тыршыше коллега-влак денат палыме лияш йєным ыштен. Вет Унчо селашке Башкортостан, Мордовий, Марий Эл, Карелий, Коми республикыла гыч коло утла фотограф миен.

Выставкым почмеке, министр В.Коробов дене ынде тыгай семинарым Коми Республикысе Ижемский районышто эртарыме нерген кутырен келшыме. Тыште илыше-влак кокла гыч 85 процент наре калык - коми. Июль тў‰алтыште финн-угор фотохудожник-влак Ижма да Печора э‰ерла воктенсе пўртўс, ты кундемысе калык-влакын илыш-йўлашт дене палыме лийын кертыт.
Автор:  Д.Речкин
Источник:  Газета "Марий Эл" (Республика Марий Эл) от 19 января 2008 года