18.03.2008 16:45
Быд гажлöн эм кутшöмкö да пас. А тайö гажыслöн – катшасинъяс. Сьöлöмöн ме эг йиджтысьлыв шылад гижысьыслöн олан руас, а пыр вöляöн да бöрйöмöн чукöртлi «Катшасин» сьыланкывлысь юргöмсö. Уна хорöн да челядь гöлöсöн юрган сьыланкывйыс пыр ачымöс кискис сьывны: «Катшасинъяс, катшасинъяс, мыйла восьсаöсь пыр тiян синъяс?»
Гажсö нуöдicны Шойнатыын, заводитчис сiйö школасянь, а сэсся ичöт бикиньсянь моз гажыс пыр паськалic да ёнмис, вынсялiс сиктса музейын. Музейöн веськöдлысь Г.И.Панюкова ёна дасьтöма тайö гаж кежлас посни челядьöсь, кодъяс бура висьтасисны Александр Георгиевич Осипов – Коми муса да Россияса шылад гижысьяслöн котырö пырысь йылысь. Сэк жö гаж вылö локтысьяслы морöсас пуктiсны еджыд синбордъяса кыöм катшасинъяс. Сьöлöмыд ыркнитлö. Тадзи пасйыны А.Г.Осиповлысь 85 вося тшупöдсö мöвпсö сетöма Челядь шöринöн веськöдлысь Татьяна Николаевна Попова. Тайöн абу сöмын мортсö пыдди пуктöм, но и ассьыд вежöртö да челядьлысь киподтуйсö петкöдлöм. Гажсö восьтicны Одыбысь Г.И.Поповлöн посни войтырыс. Найö быттьö видзвывса дзоридзьяс, нюдз веж, сöстöм, мича рöма паськöмъясöн петкöдлicны ас вылас да морöсас йиджтысьöм «Катшасинъяслысь» образсö. Тадз мöвпсö «кöтны» вермö сöмын Кöрткерöс районса мöд татшöм жö шылад гижысь Г.И.Попов. Нёль пыдди пуктана профессиональнöй шылад гижысьяс улö копыртчывлiсны А.Г.Осиповлöн творчестволы.
200 сайö мича, юргана да коми сяма шылад тэчöма ыджыд вежöра да кыпыд лола мортыс, на пиысь 26 сьыланкыв гижöма В.А.Савинлöн кывбуръяс вылö. Мича да бур кывъясöн висьтасис Коми шылад тэчан котырöн веськöдлысь Михаил Львович Герцман. Сiйöс кывзiгöн кажитчö, мый шылад гижысь войтырыд öти лолöн лолалöны, кылöны öта-мöдыслысь быд шы и кужöны öта-мöднысö гöгöрвоны. А.Г.Горчаков донъялiс и Кöрткерöсса челядьлысь сямлунсö да воысь во налысь кыпалöмсö. И.А.Латкина – Кöрткерöсса композитор сьылöмöн да йöктöмöн ас котырыскöд вöчис неыджыд музыкальнöй сюита А.Г.Осиповöс казьтывлöм вылö.
Музейын казьтывлicны и А.Г. Осиповлысь сьöкыд да олöмысь водз мунöмсö.
А ме кутчыси öти кывйö, сылöн пö батьыс вöлi клирикöн. Звöнитлi выльысь З.В.Шиликовалы да юаси, мый нöшта тöдö тайö тöдчана морт йывсьыс, шыладъяссö гижысь йывсьыс. Ачым öд ме тöда, мый «клир» либö «клира» нуöны кык вежöртас, тайö «вичкоса енлы эскысь котыр» либö «вичкоын сьылысьяс». Зоя Васильевна висьталiс, мый А.Г.Осиповлысь батьсö и мамсö тöдлöма. Батьыс вöлöма латшкöс тушаа, пыр банйöм чужöма, зэв югыд нюма и пыр вичкоса алтар дорас сьылöма. Нюркнитас пö сьывны, да гöлöсыс сэтшöм вына, сöдз руöн пуксьö быд морöсö да гулыда, кузь нюжöн кайö вичко юрйылöдзыс. Сэтшöм гöлöсыс пö некодлöн эз вöв. А батьсö шулöмаöсь шойнатысаяс Фома Тикöн Ёгорöн, а мамсö – Якö Дарьяöн. Мамыс нэм чöжыс олас Шойнатыын. Мичаник ань пö вöлi, смоль сьöд юрсиа, кöсасö пö век гартлiс юр весьтас, а разяс да – юрсиыс пожöм лап моз паськалö, пушыд, мича. Батьыс кытчöкö вошас. (Сiйö кадас став вичкоса енлы эскысьясöс гусьöн и явö кутавлiсны и ыстывлicны гортсянь ылi муясö, кыдз шуам, Улыс Вочö 1932 -1936 воясö вайöдлiсны 50 сайö енлы эскысьöс, вичкоса ыджыдджык чинаяссö пыртлiсны öкöсö, сэтчö найö и кольлicны ассьыныс лы-сьöмсö) Саша ичöтсяньыс быдмас Кулöмдiнса детдомын да сэнi заводитас ворсны балалайкаöн да гитараöн, а сэсся 15 арöсöн юрнуöдас Кулöмдiнса оркестрöн.
А.Г.Осипов велöдчывлöма Вологдаса музыкальнöй школаын, а сэсся мунлöма война вылö да сьöкыда ранитчöмöн волöма гортас. Шуйга киыс пö сылöн эз нин нинöм вермы кутны, ни ворсны, музыкантöн лоны, но кöсйöмыс венöма став пыкöдсö. 1947 воын вöлöдчывлöма Горьковскöй консерваторияын, сэсся помалöм бöрас мунлöма Москваö да велöдчöма водзö Гнесин нима музыкальнöй-педагогическöй институтын, а сы бöрын помалöма Москваса консерваторияын аспирантура. 1965 воын «Коми йöзлöн сьыланкывъясöн» лоис кандидатöн. 1969 воын сылöн петö книга «Коми музыка да музыкантъяс».
Унатор на абу туялöма, абу став сьыланкывсö да шыладсö чукöртöма А.Г.Осиповлысь. Мыйла кö официальнöй документъясын сылöн вичыс «Георгиевич», а чина йöз шуöны «Григорьевич», а батьыс сылöн Ёгор. Тайö праздникыс збыль вылас вöлi вывтi гажаöн, коланаöн да вежöр писькöданаöн. Долыд сыысь, мый юркарса хореографическöй школаысь петкöдчисны тайö праздник вылас куим йöктысь Артеев Артём, Митина Кристина, Паршукова Света. Найö вöлiны «Катшасин» гажлöн дзирдъясöн. Сьöлöмас быдöнлы йиджис культура колледжса йöктысь-сьылысь котыр. Окота вöлi аддзыны тайö йöктысь котырöн юрнуöдысьсö да пöся топöдлыны татшöм козинысь. Кöрткерöсса культураöн веськöдлысьяс дасьтöмаöсь тайö гаж вылас став сиктъясса кодзувъяссö и аттьö налы, мый став сьыльысь-йöктысь котырыс кыпыда пасйисны А.Г.Осиповлысь юбилейсö. Мед эськö пыр юргис А.Г. Осиповлöн став шыладыс, пыр мунiс Республикаса тшупöд вылын и эз бокö кольччыны юркарса чина йöз. Кöсъя, вывтi ёна кöсъя, мед Шойнатыса челядь сюртчисны А.Г.Осиповлöн олöм-удж туялöмö да вöчисны аддзöм да корсьысьöм уджъясöн мультимедийнöй проект. Верма сетны проектсö дасьтöмлы бур индöдъяс да колана туйвизь. А А.Г.Осиповлысь «Катшасинъяса» сьылантö и водзö кута öктыны Коми муысь видеокамераöн тiян музейлы.
Снимокъясыс да гижöдыс Мария Плосковалöн
