Гижoдъясыс сьoлoмo вoзйысянаoсь (на коми языке)

Март тöлысся «Войвыв кодзув» восьтö Александр Ульяновлöн Коми Республикаса Госсöветöн веськöдлысь Марина Дмитриевна Истиховскаякöд воча сёрни. Марина Дмитриевна висьталыштö ас йывсьыс, тöдмöдö лыддьысьысьöс медшöр тöжд-могьясöн да водзö вылö кöсйöмьясöн.

«Мед быд асыв лоö ясыд...» кывбур чукöрöн петкöдчö Владимир Тимин.

Нёль висьт — «Прöститчан кытш», «Емен Варлöн несйöмъяс», «Сира тöня» да «Заремка» — вöзйö Удораса гижысь Алексей Вурдов.

Сöмын Енмыс тöдö,

вöлöм,

Кытöн мортыдлы   и бур:

Сиктад колö

винёв сьöлöм,

Карад колö винёв юр.

Медся майшöдланасö да сьöлöм нюкыртанасö водзö на «öктöма» олöмсьыс Геннадий Юшков да сiдзи и шуöма кывбурьяссö — «Октасъяс».

Аслыспöлöс неыджыд висьтьясöн журналын петкöдчö Мария Остапова.

Окотапырысь тöдмöдам лыддьысьысьöс Саранскса гижысь Лариса Меркушкинакöд. Лариса Георгиевна чужöма военнöйлöн семьяын, образование сертиыс историк, дыр кад уджалöма велöдысьöн, а сэсся öнöдз на юрнуöдö Саранскса А.С.Пушкин нима Национальнöй библиотекаöн. Гижö челядьлы висьтьяс, повесьтьяс, мойдьяс. Сылöн гижöдьясыс кокниöсь, мичаöсь, сьöлöмö вöзйысянаöсь да быд войтыр чукöрлы гöгöрвоанаöсь. Лариса Меркушкиналысь «Мозаика» небöгысь висьтьяссö коми вылö вуджöдöма Мария Плоскова.

«Ыбын тыртöммис гажа керка» гижöдторйöн Геннадий Беляев казьтылö томдырсяньыс нэм кежлас лоöм бур ёртсö — Владимир Иванович Безносиковöс.

Журнал редакциясянь Владимир Безносиковöс казьтылöмöн сетам гижысьлысь «Войвыв кодзулö» ыстылöм бöрья письмöсö да «Чошö» висьт.

Евгений Семёнович Гуляевлöн, республикаса тöдчана учёнöйлöн, кыв туялысьлöн олöм да удж йывсьыс «Сись кодь пожöмыс парма шöрын...» статьяын гижö Анатолий Ракин.

Ыджыд удж вöчöма Валерий Мартынов. Учёнöй корсьысьöма да доньялöма коми да мукöд странаса литература костын йитöдьяс. Журналлöн тайö номерас Валерий Иванович вöзйö Финляндиякöд, Венгриякöд да Франциякöд татшöм йитöдьяс йылысь гижöд.

«Треска юр» висьтöн петкöдчö Михаил Ладанов.

Журналлöн бöрья лист бокас — гижысьяс да гижны босьтчысьяс пöвстын «Эзысь борд» литературнöй конкурс йылысь юöр.