Мича коми кыв (на коми языке)

Чужан кывлысь тöдчанлунсö кыпöдöм могысь «Коми войтыр» öтмунöмлöн Сыктывкарса представительство нуöдö «Мича коми кыв» конкурс.

Вужвойтырлысь кыв öнi велöдöны детсадъясын, школаясын, университетын, юргö сiйö радио да телевизор пыр, сы вылын петöны газет-журналъяс, öтуввезйын позьö аддзыны коми кывъя лист бокъяс. И век жö юркарын олысь вужвойтыр майшасьöны, мый бöръя воясö мам кывнымлöн тöдчанлуныс вочасöн чинö. Сы вöсна и нуöдöны конкурссö, медым ышöдны йöзсö паськыдджыка вöдитчыны коми кывйöн. Вермысьясыс лоасны таын бур примерöн, кодъяс вылö видзöдöмöн и мукöдлы окота лоö пуктыны коми кыв сöвмöдöмö пай.

Конкурсын шуöма бöрйыны квайт нимпасын вермысьöс. На серти нин тыдалö, мыйысь нимöдöны мортсö. Шуам, «Коми кыв велöдöмын ыджыд воськов вöчöмысь» пасъясны вужвойтырлысь кыв тöдмавны босьтчöмысь да таын гырысь вермöмъяс шедöдöмысь. «Сöстöм коми кывйöн сёрнитысь» нимпасын вермысьнас шуасны сiйöс, кодi джöмдавтöг да кыдъя рочасьтöг кужö сёрнитны ас кыв вылын уна йöз водзын. Коми кыв да культура сöвмöдны сьöм сетысьясöс пасъясны «Медся лышкыд морт» нимöн. Конкурссö котыртысьяс эскöны, мый татшöм йöзыс миян абу этша. Велöдысьяс пöвстын бöръясны аслас уджö выльторъяс пыртысьöс, тöдчана вермöмъяс шедöдысьöс. Нимпасыс шусьö «Водзмöстчысь коми кыв велöдысь». Мам кывным некор оз быр, сы вылын кö сёрнитöны быдмысь войтыр. Буретш найöс ышöдöм могысь лöсьöдöма торъя нимпас — «Сёрнитöны челядь». А внук-внучкасö медбура таö вермасны велöдны-туйдöдны пöль-пöчыс. Налы лöсьöдöма жö торъя нимпас - «Пöль-пöчöн шуысьöс коми кывйö велöдöмысь».

Вермысьяссö бöрйыны кутас «Коми войтыр» öтмунöмлöн Сыктывкарса представительствоöн индöм вит морта котыр. Нимпасъясын ордйысьысьясöс жö вöзйыны вермас республикаса быд олысь. Тiян тöдсаяс пиын кö эм морт (абу быть Сыктывкарын олысь), кодi лöсялö сiйö либö мöд нимпасö, верманныд ода кора (май) 5 лунöдз гижны юркарса коми культура шöринö (адресыс: 167000, Сыктывкар, Бабушкин улича, 31-öд керка, «Мича коми кыв» конкурс вылö) тайö морт йывсьыс да пасйыны, кутшöм пай сiйö пуктö коми кыв сöвмöдöмö.

Кывкöртöдсö лоö вöчöма май тöлысся коймöд вöскресенньö — Коми гижöдлöн лун — кежлö.