Ёртасöм ёнмo (на коми языке)

Март помын Сыктывкарын чукöртчылiсны Россияса финн-йöгра регионъясысь культураын уджалысьяс да тележурналистъяс.

Воöн-джынйöн сайын миян республикаса юркарын вöлi котыртöма Россияса финн-йöгра культура шöрин. Тайö каднас сэтчöс координаторьяслöн сöветыс нёльысь нин чукöртчылiс, и со медводдзаысь на- Сыктывкарын. Москваысь, Карелияысь, Удмуртияысь, Коми-Перым да Ханты-Манси кытшьясысь воöм войтыр Комиысь ёртьясыскöд видлалiсны 2008 во кежлö урчитöм могьяс да видзöдлiсны, культураын уджалысьяс мый вермасны öтув вöчны 2009-öдас. Пасйисны, мый ёнджыка колö тöждысьны этша лыда финн-йöгра войтыр - водь, ижора, сету - вöсна, отсавны налы видзны да сöвмöдны ассьыныс культура, оласног. Та могысь пырöдчыны Россияса уджтасьясö.

«Россияса купьтура» уджтас серти рöдвуж войтыр таво нин нуöдасны некымын фестиваль. «Финн-йöгра-транзит: войтырьяслöн культура» воссяс апрельын Кудымкарын, сентябрын вуджас Удмуртияö, декабрын - Карелияö, локтан воö волас и мукöд республикаö. Oтамöдсьыс ылын олысь сьылысь-ворсысь-йöктысьяс аддзысьласны да тöдмасясны ёртьясыскöд, а бöрья ыджыд концертсö петкöдласны Москваын.

Июньын Карелияö чукöртчыласны рöдвуж войтырлысь эпосьяс нимöдысь котырьяс. Быттьö «Калевала» ордö гöститны воласны, гажсö сiдзи и нимтiсны - «Финн-йöгра эпос гöститö «Калевапа» ордын». А арланьыс нин Ханты-Мансийскö «Югра-2008» фестивапь вылö чукöртчыласны киподтуя йöз. Сэки жö выльысь аддзысьласны и Россияса финн-йöгра культура шöринысь координаторьяс.

Дас вит во нин «Коми гор», «Марий Эл», «Удмуртия», «Мордовия», «Карелия», «Югория» телерадиокомпанияяс дасьтöны «Финно-угорский мир» öтувья передача. Сыктывкарын чукöртчылiгöн сiйöс вöчысь тележурналистьяс юксисны водзö кежлö мöвпьяснас, сёрнитчисны петкöдлыны ассьыныс выль уджсö Оренбург обласьтса Бугуруслан карын финн-йöгра телепрограммаяслöн фестиваль вылын.

Рöдвуж войтырлöн регионьясысь культураын уджалысьяс да тележурналистьяс аддзысьлiсны Коми Республикаса Госсöветöн веськöдлысьöс первой вежысь, финн-йöгра войтырлöн консультативнöй комитетöн юрнуöдысь Валерий Марковкöд, культураса министр Надежда Бобровакöд, национальнöй политикаса министр Валерий Коробовкöд, Сыктывкарса коми культура шöринын тöдмасисны вужвойтырлöн оласногöн, филармонияын видзöдiсны «Асья кыа» ансамбльлысь концерт.