Сьöлöмтö вöрзьöдö (на коми языке)

Сыктывкарын öти лунö мунiс поэзиялы сиöм кык гаж. Эз на помась искусствоын уджалысьяслöн керкаын поэтическöй марафон, а Иван Куратовлöн музейын выльысь нин чукöртчисны кывбуралысьяс. Марафонсö кö республикаын котыртöны нёльöдысь нин, гижысьяслöн да лыддьысьысьяслöн музейын аддзысьлöмыс, позьö шуны, вöлi медводдзаысь на. Нимöдiсны Василий Лодыгинлысь «Гыбад» небöгсö.

Авторсö республикаса олысьяс бура тöдöны. Поэт, прозаик, журналист, сьыланкыв гижысь аслас енбиöн миянöс шензьöдö 1972 восянь нин, кор йöзöдiс медводдза «Менам улича» книгасö. А кывбуръяссö тэчны босьтчылiс школаас велöдчигöн на. Поэт зэв шоныд кывъясöн казьтывлö Керчомъяын ассьыс велöдысьяссö — Александра Дмитриевна Поповаöс да Алексей Степанович Тимушевöс, кодъяс водзö лöдсалiсны Воч школаын велöдысь Дмитрий Иванович Гичевöн казялöм енбисö да быд ногыс  ышöдiсны  гижан уджö.

Василий Григорьевичлöн талунöдз петавлiс кывбур-висьтъяса 200 гöгöр аслас да öтувъя небöг. Воддза воын на лыддьысьысьлы воис «Чалльöг». Кольöм во — тайö «Гыбадыс», таво дась нин челядьлы выль сборник. Азыма, мудз тöдтöг уджалö авторыс. Сэсся и сьыланкывъяс гижны аддзö кад. «Василей» гаж котыртысьясысь öти, 15 во сайын кö сцена вылö петкöдлiс сöмын гоз-мöд сьыланкыв, öнi сылöн кывъяса, аслас да мукöд композиторлöн шылада матö 200 сьылан нин. Кыдзи шуö сизимдасланьö нин восьлалысь гижысь, олöмыд — тайö опыт, и сiйö воысь-во содö. Oнi эм мöвп босьтчыны романö. Таысь öтдор, чöжöм сямыс сылы отсалö и томъяскöд уджын. Василий Григорьевич водзö нуöдö сiйö бур панассö, кодöс пуктывлiс «Ленин туйöд» газетса вöвлöм редактор Николай Трофимович Пунегов. Газет бердас вöлi ён литературнöй котыр, кытысь петiс уна нималана поэт. Том авторъяскöд аддзысьлöмъяссö, семинаръяссö «Парма гор» (öнi тадзи шусьö газетыс) сiдзжö нуöдö быд во. Со и тавося апрельын редакция, кодöн веськöдлö В.Г.Лодгин, корис кык лун велöдчыны 20 ныв-зонмöс. «Эжва» литкотырлысь зiльöмсö пыдди пуктöмöн районса босьтчысь гижысьясöс велöдны-туйдны волывлiсны тшöтш республикаса гырысь поэтъяс да прозаикъяс, кыдзи Серафим Попов, Юрий Васютов, Пётр Шахов, Егор Рочев, Нина Куратова, Елена Козлова да мукöд. Эз öти том мортлы отсав шедöдны ним тайö ышöдöмыс. Коми   му  пасьтала  нин  тöдсаöсь Алёна Ельцова, Алёна Мальцева, Анастасия Шомысова. Наысь водзынджык «югнитiсны» Эдуард Тимушев, Вячеслав Бабин, Александр Лужиков, Александр Шебырев — ставнысö он лыддьöдлы.

Диана Григорьевна Холопова, И.А.Куратов нима музейöн веськöдлысь, поэзиялы сиöм рытсö восьтiгöн гöрдитчöмöн шуис, мый Керчомъяас сiйö велöдчылöма Василий Лодыгинкöд öтлаын. И кыдзи шензисны залын пукалысьяс, кор тайöс жö висьталiсны рыт вылас корöм паськыда нималысь гöсьтъяс Виктор Напалков да Виталий Уляшев. Найö уна пöсь кыв сиисны чужан Эжва йылыслы да эз дзебны, мый буретш сiйö и отсалö бур ёртныслы моз ыджыд творческöй уджас. А выль небöг йылысь сёрнитiгöн Виктор Напалков стöча пасйис авторыслысь шöр мöвпсö. Миян став олöмным гыбад кодь. Кыдзи тай нюр вуджигöн он тöд, кытчö сувтны, сiдз и йöзкостса йитöдъясын, войтырлöн оласногын. Уна вын колö, медым эн веськав зыбучас. Висьт, повесьт, шмонь пыр Василий Лодыгин аслысногöн индö миянлы сэтысь петан туй.

Рыт дырйи книга гижысьлы вичмис донъялöм и мукöдсянь, торйöн кö, землякъяссяньыс жö —  Алексей Безносиковсянь да Вячеслав Бабинсянь. Коми войтырлöн öтмунöмын водзмöстчысь морт, Алексей Семёнович чуксалiс тöждысьны мам кыв вöсна сiдзи жö, кыдзи тайöс вöчö Василий Лодыгин. Вячеслав Леонидович аттьöалiс ассьыс велöдысьсö литературалöн паськыд ордым вылö петкöдöмысь.

Книгалöн коланлун да коми гижöдъяс сöвмöдöм-паськöдöм йылысь сьöлöмсянь петысь кыв шуисны тшöтш Диана Григорьевна Холопова, челядьлы небöгъяс вылын уджалысь Мария Алексеевна Плоскова, Сыктывкарса канму университетын велöдысь Елена Васильевна Остапова, залын чукöртчöм студентъяс.

А ставнас аддзысьлöмас мича серъяс пыртiс искусствоса колледжысь «Коми сьылан» котыр, кодöн веськöдлö Аркадий Юрьевич Исупов. Кор ансамбль ливкйöдлiс Василий Лодыгинлöн кывъяс вылö тэчöм «Лэбö джыдж», «Еджыд Райда» сьыланкывъяс, мöвпавсис: мед эськö дыр на оз ям юкмöсыс, кытысь гижысь гумлалö сьöлöм вöрзьöдана  серпасъяссö.