Кадам тыöй шонтö менсьым сьöлöм... (на коми языке)

Oти во коставлöм бöрын Эжва йылын нёльöдысь мунiс чери кыйысьяслöн конкурс. Сiйöс вöлi сиöма Эдуард Тимушевлöн паметьлы. Водзтi йи улысь вуграсьысьяс ордйысисны Кулöмдiнса Кöдж тыын, Керчомъяса Кельчанкаын, Мысса куръяын, а тайö пöрйö чукöртчылiсны Ыджыд Кадамын.

Мыйла буретш Кадамын, абу öмöй матыссаджык да чериаджык кыйсянiныс? Да сы вöсна, мый Эдуард Алексеевич, республикаын бура тöдса поэт, прозаик, журналист да тайö конкурсыслы подув пуктысь медьёна радейтлiс татчöс куим тысö. Ичöт, Шöр да Ыджыд Кадамьяслы сiйö козьналiс сы мында кывбур-висьт, мый позис эськö лэдзны кызкодь небöг. Тулысарся, гожся-тöвся фотографияясысь öтдор мортыс вочасöн чукöртiс озыр видеосерпасьяс, мед вöчны быдса фильм. Жаль, эз удит — воысь унджык сайын томöн-бурöн кувсис. Но чужан му, ас вöр-ва вöсна висьысь гижысьлысь панассö водзö шуисны нуöдны ёртьясыс, енбисö пыдди пуктысьяс. Найö, кодьяс сы моз жö, позьö шуны, гöг сюрöснаныс йитчöмаöсь парма-мамыскöд.

Керчомьясянь Кадамöдз кöкьямыс верстсö ковмис пырны «Буранъясöн». Дас гöгöр снегоходöн йöзсö нуисны некымынысь волöмöн. Сiдз шусяна базаö чери кыйысьяс чукöртчисны Керчомьяысь, Кулöмдiнысь, Зимстанысь, Помöсдiнысь, Сыктывкарысь, Эжваысь да весиг Мурманскысь. Кык вöр керкаа тайö шойччанiныс — Керчомьяысь ас вылас уджалысь Н.Гичевлöн. Кадамлысь юкöн, кыдзи и Сьöд Кöджпысь да Ручгуяг тылысь, сiйö босьтiс кöртымö, шойччöдö танi дзик быдлаысь, весиг суйöр сайысь волысь туристьясöс да чери кыйысьясöс. Николай Алексеевич ёртасьлiс Эдуардкöд, та вöсна ордйысьöм нуöдöмас петiс нырщикöн.

Пансис ордйысьöмыс йи вылö петысьясöс чолöмалöмöн да Э.А.Тимушевöс здук чöв-лöня казьтыштöмöн. Юргисны и сылöн Кадамлы сиöм кывбурьяс. Шуам, тшöтш и тайö:

Гулыд яг вылас кежа,

Кöнi чöсмася

гöрд вина кöрöн.

Бур, мый некод

эз пежав

Oнöдз мусаöс да

сьöлöмшöрöс.

Быттьö ойбырысь

ловзя,

Сямöй тырмис кö,

сьыланкыв панi.

Мыйöн му вылас

овсяс,

Менö гуалöй

сöмын танi.

Но нор ловшысö разöдiс «Старт!» команда. Медводз вын-сямсö петкöдлiсны йи розьöдысьяс. Дас ордйы-сьысь пиысь жюри бöрйис куим «медся-медсяöс». А сэсся пансис ачыс кыйсьöмыс. Флажокьясöн торйöдöм йöртöдын вуграсьысьяслöн командаяс бöрся сюся видзöдiс жюри. Сiйö пыр жö пасьялiс, кодi медводз кыйис черисö, кодi лэптiс медунаöс, кодлöн ёкышыс медыджыд либö медiчöт да с.в. Тадзи жö доньялiсны торйöн кыйсьысьясöс. Кöть и бырöдыс кайис пидзöсöдз, кöть и ёкышыс видлалiс омöля (а танi сöмын тайö чериыс да сир и уялöны), конкурсö сюртчысьяс эз воштыны лачасö. А кыпыдлунсö пестiс яр гудöк — Керчомьяын да кыдзи нö сытöг! Ыззьöдiс и йи весьтын öшалысь юква кöр, кодтöг кыйсьöмыд абу кыйсьöм. Но медся бура ышöдöм-ыззьöдöмыс артмис «висьысьяслöн». Кодкö вöзйис пысавны выль сам, кодкö тшöктiс писькöдны выль розь, а карса öти морт босьтчылiс корсьны черисö весиг торья приборöн. Да абутö тай он на кый. Но öд эз сöмын вуграсьöм понда локны татчö йöзыс, а мыйкö ыджыдджыкторла, мый сьöкыд гöгöрвоны вöр-вакöд йитчытöм мортлы. Ылiысь локтöм кык гöсьткöд сёрни тöдчöдiс тайöс жö. Мурманскысь вöвлöм моряк Олег Вячеславович Нестеров, кодi аслас машинанас татчöдз вайöма и «Буран», шуис:

—Гожöмнас ме Кадамö волывлi нин, мамöй öд Кулöмдiнысь. Но тыыслöн тöвся мичыс, помтöм-дортöм еджыд отыс нöшта на вöрзьöдiс сьöлöмöс. Збыльысь, поэт моз кö, кöть сьыланкыв пан.

А Коми Республикаса видз-му овмöс министерстволöн аквакультура да чери кыян юкöнысь ведущöй специалист-эксперт Татьяна Александровна Кузьминых тöдчöдiс, кутшöм пö бур эськö вöлi татшöм мича местаясас ловзьöдны чери рöдмöдан удж. Сэки тöлкöн позяс котыртны оз сöмын культурнöй кыйсьöм, но и озырмöдны сёян-юан рынок. Примерыс орччöн. Нювчимын чери рöдмöдан-быдтан овмöсыс уджалö куим во нин. Сэтчöс форель зэв бура инасьö.

...И со ордйысьöм матыстчис помлань. Жюри чукöртiс ставнысö, мед индыны вермысьясöс да пасйыны козиньясöн. Медбур писькöдчысьöн да медводдза чери кыйысьöн вöлöма Кулöмдiнса пöжарнöй часьтын уджалысь Алексей Николаевич Попов, медуна чери кыйысьöн — «Тепловодоканаллöн» юрсиктса юкöнын зiльысь Александр Юрьевич Прокушев. Тайö предприятиеыслöн жö командаыс босьтiс медводдза места öтув ордйысигöн. Мöдсö да коймöдсö юкисны МЧС-лöн районса юкöнысь да республикаысь дзоньвидзалун видзан министерстволöн командаяс. Козиньяс сiдзжö вичмисны медыджыд да медiчöт ёкышьясöс лэптысьяслы — Кулöмдiнысь Виктор Владимирович Воробьевлы да Виталий Васильевич Попвасевлы. Кадамкöд йитчöм викторинаын вермысьöн петiс Т.А.Кузьминых. А медбур юква пуысьöн лоис (некымынöдысь нин) Кулöмдiнысь жö Виталий Алексеевич Тарабукин.

Удал кыйсьысьясöс нимöдiгöн жюри эз вунöд казьтыштны найöс, кодьяс пуктiсны медыджыд пай тайö гажсö котыртöмас да нуöдöмас. Аттьöалана кывьяс юргисны ас вылас уджалысьяс Николай Алексеевич Гичевлы, Василий Николаевич Сметанинлы, Роман Иванович Катаевлы. Торйöн ставныс аттьöалiсны и Алексей Михайлович Тарабукинöс, кодi транспорт торйöдöмысь öтдор сетiс конкурс вылö ассьыс сьöм, да Владимир Викторович Булышевöс, кодi лöсьыда гудöкасис. Но, пöжалуй, ставсьыс уна бурсиöм кылiс Керчомьяса администрацияöн веськöдлысь Любовь Егоровна Траилина, праздникнас водзмöстчысьыс. Буретш тайö гажас тшукис сылöн чужан луныс. Бипур дорын сьылöм-йöктöмыс, тöдöмысь, дыроз вун.

Конкурс помасис. Кодкö, сьöлöмсö бурмöдöм ради, мунiс водзö корсьны ёкыш кельöб, кодкö выльысь пуис юква, кодкö сöвтiс нопъяссö «Буран» доддьö. А Эдуард Тимушевлöн медматысса ёртъясыс поэтлöн Людмила гöтыркöд да Татьяна нывкöд веськöдчисны Керчомъяса шойна вылö, дона мортныслöн куйланiнö. Вöр-пу костöд писькöдчысь кузь туйын налы, кöнкö, чайтсис, мый вот-вот паныд петас муса тыланьыс лямпа вылын шавксьöдысь Эдик. Эз öд прöстö сiйö шулы:

Ме чужан муöс пыдди пукта ёна, Ме бать моз танi лэдзи сирöд вуж. Мен ставыс танi сьöлöмöйлы дона И мöд му йылысь мöвпавны ог куж. Тан Кадам тыöй шонтö менсьым сьöлöм, Тан Эжва юöй ичöтдырсянь ас. Oд чужан муад медся лöсьыд вöлöм, И пыр кежлö тан коля ассьым пас.