Бöр восьтiсны (на коми языке)

Удораса Важгорт школа бердын уна во вöлi краеведческöй музей. Юрнуöдiс сiйöн школаса велöдысь, историк Б.И. Петров.

Борис Ивановичлöн да велöдчысьяслöн зiльöмöн уна экспонат чукöрмылiс: тайö и важся йöзлöн гортса кöлуй-эмбурыс, и гражданскöй да Великöй Отечественнöй войнаса участникъяс йылысь казьтылöмъяс, фронтвывса снимокъяс, важ документъяс.

Сэсся музейсö тупкылiсны. Но йöзлöн корöм серти бöр восьтiсны. Oнi сiйö меститчö детсадлöн вöвлöм жыръясын. Музейнас веськöдлö школаса вöвлöм велöдысь Лия Афанасьева.

Кыдзи  висьталiс сiйö, музеисö кыпыда восьтiсны март шöрын. Праздник вылас волiсны районса администрацияын уджалысьяс, национальнöй музейöн веськöдлысь Надежда Багаева. Йöз водзын сёрнитiсны Б.И.Петровлöн быдтасъясыс, чужан му туялысьяс Мария Матева, Нина Шлопова, Альбина Игушева да мукöд.

Сиктсалы, дерт жö, зэв нимкодь, мый музейыс бöр воссис. Кыдзи висьталiс Лия Афанасьева, öнi Важгортса музейын 800 сайö экспонат. Верстьö и челядь вермасны пыравны татчö быд лун, тöдмасьны сиктлöн историяöн, а сiдзжö кодъяслöн зiльöмöн сöвмис уна во чöжöн Важгорт.