Ласта пыр нимавлiс кыйсьысьясöн (на коми языке)

Изьва районса Ласта грездын Пётр Канев лыддьыссьö медбур вöралысьясысь öтиöн Вöралысь рöдысь да. Ачыс висьтасьö, детсадйö на ветлысь вöлöма, лызьöн вöрö мунöма — кыйсьыны быттьöкö.

- Вель ылöдз мунсьöма сэки. Эз кö öти кыйсьысь паныдась да öлöд водзö мунöмысь, гашкö, код тöдас кытчöдз и соби, — казьтылö Пётр Семёнович. — Сы бöрын сэсся батьöй аскöдыс нин кутiс босьтлыны.

Ошйысьны Пётр Канев оз радейт. Но грездсаяслöн кывъяс серти, вöрысь кыйдöстöг оз волы. Ошкöд ныр на ныр паныдасьлöм йылысь оз жö висьтась. А öд абу öтчыдысь пармаса кöзяиныд сылы туйсö пöперегавлöма.

—Ош вылö важöн нин эг ветлы, во вит. Но йöзыс и татысь, и мукöд районысь звöнитчöны да тшöкыда юасьöны, эм абу ош гос. Но тайö зверь вылас понтöг ме ог мун. Бур отсасьысь колö. Oнi кык кычанöс быдта-велöда. Госыс уна висьöмысь бурдöдö да, йöз радиыс ошсö колö кыйны.

Ичöт зверыд да пöткаыд вöрö быд пöрйö ветлiгас шедö. Кольöм во Пётр йöраöс кыйöма.

—Зверь-пöткаыс вöрас эм. Абу важ моз уна, но кыйсьыны позьö. Парманым зэв на озыр да лышкыд. Вöралысьыс тай эз ло. Водзтi кö быд керкаын вöрса пемöс яйнад семьясö вердысьыс вöлi, öнi том йöзöс велöдны некодлы... Да и асьныс зонкаяс оз окотитны пармаöдыс собны-ветлöдлыны.

Аслас Пётр Семёновичлöн ныв быдмö. Куим арöс на и эм кагаыслы, а батьыс аскöдыс нин вöрö босьтлö. Вера гöтырыс вöзйысьлö жö кыйсьыны. Сiйö зэв бура лыйсьö.

Водзтi верöсыс заготконтораын уджавлöма, öнi уджтöмалö да, вöр-ва вылö надеяöн и олöны и Каневьяс, и ластасаысь унджыкыс.

Ластасаяс, на лыдын и Пётр Канев, нёль во сайын водзмöстчисны да котыртiсны вöралысьяслысь гаж. Сэки кöкьямыс морт ордйысисны ас костаныс винёвлунын да лыйсьыны кужöмын, лызьöн котралöмын да пу йылö кавшасьöмын. Таво нёльöдысь гажсö нуöдiсны, и петкöдчисны сэнi Ластаысь да Изьва районса мукöд сикт-грездысь матö 20 вöралысь. Медся олöмаыслы — 72 арöс, медся ичöтыслы, кодi муртса на лызь вылö сувтöма, — куим.

—Кольöм во йöзыс унджык вöлi, — висьталiс Алексей Канев, гаж котыртысьясысь öти, «Изьватас» öтмунöмын нырщик, Россельхознадзорса государственнöй инспектор. — А таво районса веськöдлысьяс шуисны нуöдны гажсö юрсиктын, мед пö унджыклöн лоö позянлун пырöдчыны тайö праздникас. Но ластасаяс пыксисны, ми пö лосьодiм таио гажсо да миян грездын и водзö нуöдам. Ласта пыр нимавлiс аслас кыйсьысьясöн. Да и казьтыштны кö кольöм кадсö, буретш танi 1927 воын вöлi котыртöма районын медводдза промыслöвöй кооператив.

И гажсö таво Ластаын нуöдiсны жö. Медбур кыйсьысьнас шуисны Виктор Филипповöс. Сiйö СПК-ын бригадир, Ластаын олысь. Неуна кольччыштiс Пётр Канев. Петкöдчис ордйысьöмын Пётр Семёновичлöн и Вера гöтырыс. Таво нывбабаясысь сiйö öтнасöн вöлi.

Доньялiсны и вöралысьяслысь паськöмсö. Медбура пасьтасьöмаöн шуисны Мокчойысь 17 арöса Алексей Каневöс. Козинтöг некод эз коль. Oтилы вичмис палатка, мöдлы кузь гöленя резина сапöг, кодлыкö кыйсьысьлöн жилет, термос, примус... Пасйисны и артистьясöс.

—Таво козиньясыс миян донтöмджыкöсь, сы вöсна мый спонсорьясöн вичмöдöм кызвын сьöмсö районса веськöдлысьяс шуисны видзны юрсиктын татшöм праздник вылас, — висьталiс Валентина Ануфриева, «Изьватас» öтмунöмöн веськöдлысь, гажсö котыртысьясысь öти. — Но ми дженьыд кадколастöн корсим мукöд спонсорöс. И сьöмыс тырмис на и рок да пöжас вылö. Наöн чöсмöдлiм быдöнöс, кодi волiс тайö праздник вылас.

Гажсö нуöдöмын ёна водзмöстчисны и асьныс ластасаяс. Неважöн найö, кызвыныс вöралысьяс да чери кыйысьяс, котыртчисны общинаö. Ассьыныс котырсö нимтiсны «Яг мортöн».

—Миян мог — видзны поль-почлысь оланногсö, культурасö, а сiдзжö сöвмöдны районын туризм, — висьталiс Алексей Канев.

— Унаöн нин кутiсны гöгöрвоны, мый олöмыс, шудыс асланыс киын, дугдiсны юны, босьтчисны уджавны. Зiльöны ассьыныс олöмсö вежны бурланьö. Со и тайö гажас водзтi вöралысьяс яндысисны петкöдчыны, öнi жö окотапырысь ордйысьöны.

А юрсиктын выльысь праздниксö нуöдiсны вежон мысти, кольöм шойччан лунö. Ёнасö Ластаса гажысь эз и торьяв: позьö шуны, сiйö жö программаыс, сiйö жö ордйысьöмьясыс. Сöмын унджык вöралысь локтiс, тшöтш и нывбабаяс. Сэнi вöлiны нин мукöд вермысьяс. Сiдз, «Буранöн» ордйысьöмын водзö петiс Изьваса энергоучастокын зiльысь Константин Бизенков, гираöн шыбласьöмын

- Гамысь Ипат Чупров да Мокчойысь 17 арöса Алексей Канев. А медбур кыйсьысьöн шуисны Ластаысь Василий Сайнаховöс. Сiйö медбура лыйсис винтовкаысь, шыблалiс чер да пурт, öтчыдысь шыбитöмöн веськалiс нярталаöн кöр сюрö, медсюся кавшасис пу йылö, котöрöн вуджис «шор вомöн» кер кузя... Василийлöн вужьясыс Обь ю бокысь, кыйсьыны батьыс велöдлöма, детинкаöн на кор Василий вöлöма. И öнi прöст кадас ветлывлö вöрö да чери кыйны. Сылы козинöн лои резина пыж. Мукöдыслы — палаткаяс, узьлан мешöкьяс, вöралысьлы колана кöлуй.

Нывбабаяс пиысь медся сюсь да винёв вöлi Красноборысь Татьяна Прокопьевна Терентьева.

—Мед кöть и шуöны, аньлöн уджыс пö — пусьыны да челядьöс видзны. Но кор быдтор кужан, пикö некор он во. Век жö миян мужичöйяс медбур кыйсьысьясыс на, — висьталiс Изьваса ань.