Бара на ворсыштам (на коми языке)

Быд кага радейтö ворсны, но мыйлакö верстьö морт вунöдö, кутшöм гажа овлö та дырйи. Быд лунъя нокыс шымыртö миянöс, но лэбöны вояс да быттьö виччысьтöг казялан, мый олöмыс кольöма нин.

Но пöрысьö-нэмö некод оз кöсйы лоны некодлы ковтöм öтка мортöн. Пенсия вылö петöм бöрын содö прöст кад, а öнiя олöма войтырлöн уна на выныс. Найö кöсйöны пуктыны ассьыныс пай политикаын да социальнöй юкöнын мытшöдьяс венöмö, пырöдчыны общественнöй олöмö. Мукöддырйиыс том йöз вунöдöны, мый олöмаыд - уна тöдысь, быдтор кужысь, енбиа морт. И став тайö озырлунсö сiйö вермас инавны, сетны кö позянлун.

Бöръя воясас ыджыд арлыда войтыр зiльöны пырöдчыны спортö, туризмö, содтöны тöдöмлунсö. Таын налы отсалöны социальнöй уджалысьяс. Во сайын «Олöма войтырöс да инвалидьясöс социальнöя могмöдан Сыктывкарса шöрин» государственнöй учреждение котыртлiс «Тöдан-ö тэ ассьыд картö?» ворсöм. А таво шуисны нуöдны сiйöс водзö да туявны олан туйсö юркарса нималана йöзлысь, кодъяс пуктiсны ыджыд пай политикаö, наукаö, культураö, спортö.

Чукöрмис куим кöленаа 5 семья. Медводз ставныс «Виктория» социальнöй шöринын петкöдлiсны «гортса удж». Сэсся мöдöдчисны экскурсияöн Национальнöй музейлöн история юкöнö. Экскурсоводьяс «нуöдлiсны» найöс Коми мулöн важся кадö. Нимкодь, мый зэв сюся кывзiсны, ставсö бура видзöдалiсны да быдторсö юасисны медся томьяс. Öд унаöн на пиысь татчö волiсны медводдзаысь.

Та бöрын быд команда мöдöдчис аслас туйöд, кодi веськалiс налы пудьясигöн. Ставныс волiсны витлаö, и быдлаын налы колö вöлi мыйкö да венны: «разьны» кроссворд, портрет серти тöдмавны карса нималана йöзöс да с.в. Медбöрын жюри вöчис кывкöртöд да бöрйис вермысьясöс. Но тайöс вöчны вöлi зэв сьöкыд, сы вöсна мый быдöн дасьтысьöма зэв бура. Та понда дзик ставнысö кутшöмкö боксянь да пасйисны. Медся бур артистьясöн шуисны Чекаленкояслысь семьясö, медся тэрыбöн - Самсоновъясöс, медся сюсьöн - Сазоновичьясöс, медся öтсöгласаöн - Вишневицкийясöс. А юркарса нималана йöзöс да на йылысь медуна тöдысьясöн петкöдлiсны асьнысö Кондратьевьяс.

И, дерт жö, ставныслы вичмисны дона козинъяс.

Пасъям, тайö ворсöмыс абу медбöръя. Гожöмнас нуöдасны нöшта öтиöс. Куим кöленаа семьяяс, кодъяс кöсйöны видлыны ассьыныс вынсö, вермасны шыöдчыны карса социальнöй шöринъясö.