Ов да выв, коми сьыланкыв! (на коми языке)

Эг кö вöв газетын уджалысьöн, Василий Яковлевичкöд öдвакö коркö тöдмаси син на син. А öнi кыла ачымöс шудаöн, тайö енбиа югыд мортыскöд аддзысьлi да. Сылысь сьыланкывъяссö радейтöны менам пöчöй, мамöй да батьöй, чойöй, натöг оз кольлы гортын некутшöм кыпыд гаж. Абу веськодь на дорö и ме.

Василий Гущинлöн шыладыс йиджö сьöлöмöдзыд, вирöдзыд. Овлö весиг, кывъяссö он тöд, а мурган, мурган вомгорулад. И лöсьыд...

Этша кывъя, абу уна куплета, дженьыдик строчкаа, войтырлысь нэмöвöйся олöмсö да ловкылöмсö петкöдлысь, быдöнлы матыс да гöгöрвоана - буретш татшöм сьыланкыв, Василий Яковлевичлöн висьталöм серти, паськыда нималö. Сiйöс радейтöны, окотапырысь сьылöны да шуöны йöзкостсаöн, некор вунöдны позьтöмöн. Василий Гущинлöн гудöк улысь татшöмыс лэбис уна-уна!

Луздорысь - Эжва йылö

Меным нимкодь, Василий Яковлевич ас районса морт да. Кöть и Луздорын чужлöма, сёрнитö сöдз коми кывйöн, дзик Эжва йывса ног. Абу и дивö, Кулöмдiнын öд нэм джынсö нин олö. Та вöсна и сёрниным артмис матысса йöзлöн кодь шоныд.

Чужлöма сiйö Леткаын, быдмöма Слудкаын. Батьыс вöлöма партия райкомса видз-му овмöс юкöнöн веськöдлысьöн, мамыс, Украинаын чужлöм морт, - бурдöдысьöн. И вöлöма налöн зэв аслыспöлöс семья:

—Миян рöдыс ставнас сьылысьйöктысь: кодi гудöкöн ворсö, кодi баянöн. Бурöн казьтыла мамöс и батьöс. Зэ-эв уна сьыланкыв вöлi тöдöны! Ми быдмим витöн, и ичöтсянь пыр сьылiм. Пуксям вöлi шойччыштны ли, чай юны ли пызан гöгöр, батьным восьтас гудöксö, горöдас сьывны, и ми сы бöрся, некымын гöлöсöн. Эз бара-й ков вина ни сур! Ливкйöдлiм и казак, и украина, и роч сьыланкывьяс. Сэтшöм лöсьыда вöлi артмö! - казьтылö Василий Яковлевич.

Но ичöт дырйиыс кöсйöма лоны бурдöдысьöн. Весиг мединститутö экзамен кежлас заводитлöма дасьтысьны. Сöмын тай Енмыс мöд ордымöд тшöктöма олöмас писькöдчыны.

Сэки Луздор районса культура юкöнöн веськöдлöма Владимир Камбалов. Сiйö и «вомöналöма» том мортлысь водзö олöмас бöрйöм туйсö:

—Школа помалан экзаменьяс сдайтны вöлi лöсьöдчам, кор пырис миян классö Владимир Павлович. Юалiс, кодi пö сьывны да гудöкасьны кужö. Ставöн чуньнас ме вылö индiсны. Чина мортыд бура дыр сёрнитiс мекöд да кывкöрталiс, лоан пö культпросветучилищеса студентöн. Тадзи и ковмис челядьдырся ыджыд кöсйöмöс вежны... — висьталiс Василий Яковлевич.

Велöдчöм бöрас бöр бергöдчöма Слудкаас, уджалöма культура керкаын. Сэнi жö гöтрасьöма мича бурдöдысь вылö, лöсьöдöмаöсь семья. Сэсся вуджöмаöсь овны Абьячойö. Сэтчöс клубын Василий Яковлевич директоралöма вель дыр.

1980 воын мöдысь паны-дасьöма Владимир Камбаловыд. Сэки министерствоын зiльысьöн нин вöлöма. Вöзйöма Василий Гущинлы выль удж - веськöдлыны Кулöмдiн районын культура юкöнöн. Мöдыс ёнасö абу и пыксьöма.

—Кулöмдiныд воис сьöлöм вылö. Петi сиктнас тöдмасьны, ва дорас лэччи. Буретш вöлi май, Эжва юыс ставнас туöма-ойдöма. Шемöс босьтiс: сы мында ваыс! И сэтшöм лöсьыд лои! Миян öд Летка юыд ичöт да, та мында васö ме эг на и аддзыв. Зэв ёна воис сьöлöм вылö.

Да и сэтчöс войтырыс бура вочаалiсны. Та вöсна и овмöдчи сэтчö семьяöн, — казьтылö Василий Яковлевич.

Гущиньяслöн öнi куим челядь: Сергей, Ольга да Анастасия. Медыджыдыс - Чилимдiн районса Трусовоын география да биология велöдысь. Шöрыс - госслужба академия помалöм бöрын уджалö «Коми гор» ГТРК-ын, кадрьяс юкöнöн веськöдлысь. Каганыс велöдчö СГУ-ын филология факультетын, мöд курсса студентка. Куимнанныс тöлкаöсь, шаньöсь да енбиаöсь. Сергей сьылö да гитараöн ворсö. Нывьясыс помалöмаöсь Кулöмдiнса музыкальнöй школа. Мича гöлöсаöсь, бура ворсöны фортепьяноöн. Кыдз шуласны, мам-батьныслы челядьсьыс йöз водзас абу яндзим.

Кöть и 28 во нин Василий Гущин Кулöмдiнса, чужанiныскöд топыд йитöдсö абу орöдöма. Слудкаса музейö мöдöдавлö ассьыс диск-кассетасö, эм кö позянлун, ветлывлö Луздорö концертöн.

«Эжваса дзоридзьяс»

Кулöмдiн районын культура юкöнöн веськöдлысьöн Василий Яковлевич вöлöма 7 во. Тайö кадколастас помалöма Перымса культура институт.—«Эжваса дзоридзьяс» котыр сэки вöлi нин. Сöмын швачкисны-сьылiсны рочöн, ёнджыкасö партия, Ленин да Родина йылысь. Сэки, дерт, кадыс сэтшöм вöлi. Но ме вöзйи дугöдчыны рочасьöмысь да босьтчыны велöдны йöзкостса сьыланкывьяс. Мися, асьным тшöтш мöдам гижны. Сэки вöлi нин некымын сьыланкыв Василий Чувьюровлöн, Александр Уляшевлöн, менам. Лöсьöдiм выль программа. Тадзи и лои хорнас веськöдлысьöн, 22 во нин сэнi уджала.

Уна буртор вöчим «Эжваса дзоридзьяскöд»! Миянлысь сьыланкывьяснымöс заводитiсны сьывны Ухтаын, Паджгаын, Абьячойын, Визинын, Выльгортын. Чужисны выль котырьяс. Миян репертуарным вöлi и медводдза «Шондiбанлöн» подувнас, — казьтылö Василий Яковлевич.

«Эжваса дзоридзьяс» котырлы сетöма Вениамин Чисталёвлысь ним. Oкмысдасöд воясö республикаса правительствосянь вичмöма почёт ним. Хорас став пырысьыс - Виктор Савин нима премияа лауреатьяс. Сьылысьыс 24 морт, кызвыннас аньяс, медолöмаыслы 72 арöс нин. Василий Гущин сьöлöмсяньыс аттьöалö Ольга Ивановна Липинаöс да Екатерина Ивановна Битнерöс «Эжваса дзоридзьяс» сöвмöдöмö ыджыд пай пуктöмысь.

Народнöй хорлöн быд концерт аслыссикас, театрлöн петкöдчöм кодь, шмонь сора. Тадзисö пö гажаджык, шуö Василий Яковлевич. Сiйö ачыс режиссёралö. Медшöр отсасьысьыс - Надежда Груздева, кодi «Эжваса дзоридзьясын» ичöтсяньыс. Юрас кутö став öнiя и важ йöктöмсö. Бöрья кадас котырыс ёна томмöма да, сiйö и вöлöма йöктыны велöдысьнас.

Выступайтан паськöмыс важмöма да, Василий Яковлевич таысь медьёна майшасьö. Вурлöмаöсь пö 25 во сайын нин. Аньяс асьныс найöс выльмöдöны, кыткö дöмыштасны, кыткö лöсьöдыштасны. Синнысö моз нин видзöны. Унаысь корлöмаöсь концертöн суйöр сайö, да небось киссьöм сарапаньяснад он мун. Таысь, дерт, шог. Выль паськöмсö ньöбны колö матö 600 сюрс шайт, а кытысь босьтны? Бур на, выль «Газель» кöсйысьöмаöсь вичмöдны. Автобусныс важöн нин люги-леги. Лоас, мыйöн ылi сикт-грездö петавны. А ас районсаыд «Эжваса дзоридзьяслы» век радöсь, кöть кутшöм паськöмаöсь найö...

«Василей»

Медводдза «Василейыс» юргöма 1994 воын. Oтувтчöмаöсь сьыланкывья эрдьяс вылын олысь куим енбиа Вась: Гущин, Лодыгин да Чувьюров — Коми Республикаысь культураса заслуженнöй уджалысьяс да Государственнöй премияа лауреатьяс. Сёрнитчöмаöсь быд во чукöртлыны сьылан-йöктан гаж, корлыны мукöд районысь композиторьясöс, сьылысь котырьясöс, мед сьыланкывьясыс разаласны став йöз костас. Ассьыныс бур мöвпнысö Васьяс збыльмöдiсны. Таво гажöдчисны 15-öдысь нин. «Василей» лоис виччысяна, радейтана, колана.

Oтувья уджысь, ыджыд вермöмьясысь, водзмöстчöмысь Василий Гущин аттьöалiс республикаын нималана йöзöс - Лидия Логиноваöс, Василий Лодыгинöс, Пётр Шучалинöс, Москваысь академикьясöс - Игорь Склярöс, Виктор Баккеöс, Санкт-Петерöургысь Вера Сивоваöс. Тайö йöзыслысь пö ме велöдчи уджавны, накöд венiм уна сьöкыдлун.

—Ми «Эжваса дзоридзьяскöд» öтитор вöсна майшасям - мед эськö тайö гажсö быд во нуöдасны официальнöя. Чина йöз шуисны «Василейсö» котыртлыны кык вонас öтчыд, быд вося гаж вылас пö мича да бур сьыланкывйыс оз тырмы да. Но öд найö оз босьтны тöд вылас, мый «Василеяс» петкöдчöны кызвыннас самодеятельнöй котырьяс. Окота эськö, мед сетасны позянлун быд во котыртлыны фестиваль-конкурс, республикаса бюджетысь чуктöдасны та вылö унджык сьöм. «Василейöн» таво ми вöлiм нин Визинын, Абьячойын, Кöрткерöсын, Емдiнын, Княжпогостын, юркарын - быдлаын миянöс радпырысь вочаалiсны, сувтöмöн аттьöалiсны. Аддзылам öд, коми йöзыслы колö татшöм гажыс, — висьталiс Василий Яковлевич, да сиис, мед эськö ставыс удайтчас.

Сёрнисьыс ясыда тыдалiс - тайö мортыс ловнас и сьöлöмнас тöждысьö коми сьылан вöсна. Мед эськö сiйö юргис быдлаын, кöнi пыдди пуктöны, вылö доньялöны да радейтöны чужан кыв. Медыджыд кöсйöмыс тай — «Василейöн» таво Москваöдз ветлыны, Коми представительство пö важöн корö да. И эм пö мыйöн ошйысьны пыдди пуктана йöз водзас.

Василий Яковлевич кодь войтырыс вöчöны миянлысь олöмнымöс югыдджыкöн, гажаöн, сöстöмöн. Мед нимкодясим да радлiм. Ми ради öд и зiльöны. Oтарö тай со и сьылам, кöть шог, кöть лöсьыд сьöлöм выланым...