14.04.2008 11:12
Февральын Сыктывкарын чукöртчылiс коми йöзлöн öкмысöд съезд, кöнi «Коми войтыр» öтмунöмöн юрнуöдысьöн делегатъяс бöрйисны Сергей Габовöс.
Сергей Иванович чужлöма Кöрткерöс районса Типöсиктын. Армияын служитöм бöрын велöдчöма Сыктывкарса университетлöн коми юкöнын, сэнi жö сэсся и велöдöма. Уна сикас войтырлысь министерство лöсьöдöм бöрын Сергей Ивановичöс корöмаöсь уджавны сэтчö. Oнi сiйö — Коми Республикаса Юралысьлöн сöветник.
«Коми войтырын» зiльö нёльöд чукöртчылöмсянь, пырö öтмунöмлöн исполкомö, бöръя вояссö юрнуöдiс Сыктывкарса представительствоöн.
Съездсянь колис нин кык тöлысь, тырмымöн, медым öтмунöмöн выль веськöдлысьлы пырöдчыны уджас, пасйыны аслыс, кутшöм могъясö колö медвойдöр кутчысьны. А могъяссö урчитöма съездлöн помшуöмын да вöзйöмъясын. Сергей Ивановичöс кывкутана уджö босьтчöмöн чолöмалöм бöрын медводз юалi, мыйöн коми войтыр чукöртчöмлöн помшуöмыс торъялö вöзйöмсьыс.
- Сэнi пасйöма гырысьджык могьяссö, миян уджын шöр туйвизьяссö индöма, - висьталiс Сергей Иванович. - А общественно-политическöй, социально-экономическöй, культура да йöзлöн дзоньвидзалун, велöдöм да том йöзкöд удж секцияясын видлалöм вöзйöмьясын гырысь могьяссö стöчмöдöма нин. Помшуöмсö и вöзйöмьяссö вынсьöдöма сьездöн, и найöс öтмоза колö пöртны опöмö. Чукöртчöмлысь кывкöртöдьяссö сетiм республикаса Юралысь Владимир Торлоповлы, сiйö тшöктiс министерствояслы видзöдлыны, мый колö вöчны сьездлысь шуöмьяссö збыльмöдöм могысь. Кöсьям кö ми бурмöдны вужвойтырлысь олöмсö, миянлы колö уджавны власьт кутысьяскöд öтув.
Сьездьяс миян чукöртчылöны нёль вонас öтчыд, а кар-районын коми войтырлöн конференцияяс и водзö быд ар лоасны. Бöръя конференцияясыс ловьяджыкöсь вöлiны, йöзыс веськыда сёрнитiсны и правительствосянь быдлаö ветлiсны. Буретш карьясын да районьясын уджнымöс колö öддзöдны, сиктса районьяс кö - мед эськö быд сиктын водзмöстчысь морт вöлi, кодi эськö нуöдiс öтмунöмлысь нырвизьсö.
—Съезд вылас и чукöртчöм водзын нуöдöм «гöгрöс пызанъяс» сайын коми йöзлöн вель уна тöжд-мог йылысь вöлi сёрнитöма. Ставнымлöн жö висьö сьöлöмным чужан кыв вöсна, кыдзи эськö ныв-зонмöс ышöдны сiйöс велöднысö?
- Медым челядьлöн кывнымöс велöдны кöсйöмыс эз быр, чайта, ичöт классьясын найöс ёнджыка колö велöдны сёрнитнысö ворсöмöн. Поснияслы кö тшöктыны правилöяс велöдны, позьö и öтдортны кывсьыс. Роч челядьлы коми кыв велöдан небöгьяссö дзоньнас комиöн колö вöчны. Финньяс тадзи вöчöны, налöн учебникьясын ставсö ас кыв вылас гижöма.
Уна во нин вöзьям коми кыв велöдiгöн классö кык пельö юкны, медым урок дырйи велöдысьыс вермис быдöн дорö матыстчывны, юавны-висьтавны. Тайö мöвпнас юксим нин и республикаса Юралыськöд. Сьöмыс оз уна и ков. Артавлiм да, Сыктывкарса школаясын классьяссö юкны вонас 1 миллион гöгöр шайт тырмымöн. Но йöзöс велöдан да вылыс тöдöмлуньяс министерство, карьясса управлениеяс оз на водзмöстчыны таын, ыстысьöны öта-мöд вылас. Ми и водзö ог эновтчöй тайö уджсьыс.
Колö и мукöд ногöн ышöдны челядьöс. Мыйла оз позь вузьясö пыран экзаменьяс сдайтiгöн абитуриентлы, кодi бура тöдö коми кывсö, содтыны 1 балл? Уна оз и ков - ректорьяслöн кöсйöмыс сöмын мед вöлi. Гашкö, коми кыв тöдысьлы личöдсö оланпасöн колö вынсьöдны.
Сьезд вöзйис 2009 восö шуны Коми кывлöн воöн. Быд кар-районын öнi видзöдöны, мый вермасны нуöдны тайö воыслы сиöмасö. Мöвпьяссö чукöртам да национальнöй политика министерствокöд вöзьям правительстволы видлавны. Ме серти, тайö воыс колö сы могысь, медым комиыс быд районын юргис, öд быдлаын эм аслыспöлöслуныс. Неважöн вöлi Усвавомын. Сиктас торья удж абу, кöкьямысдас километр сайö Усинскö унаöн ветлöны. Но Усвавомын бур школа, музеяс весиг нималана художник Василий Игнатовлöн серпасьяс эмöсь. И сэнi нуöдöны «Шондiбан» гаж. Мед эськö Коми кывлöн воас быдлаын гораджыка тыдалiс налы лöсялана аслыспöлöслуныс.
- Комилöн вужйыс сиктын. Видз-му овмöстöг, йöзлы уджаланiнтöг сiйö вермас косьмыны. Кыдзкö позьö-ö коми сиктыслы отсавны?
- Войвылын видз-му овмöсыд ыджыд водзöссö некор эз вайлы. Россияын вöчöм сёян-юансьыд войвывсалöн пайыс, гашкö, öти прöчентыслöн дасöд ли сёöд юкöныс да федеральнöй власьтсянь ыджыд сьöм виччысьны он вермы. Миян республикаса правительство вöчö видз-му сöвмöдöм могысь воськовьяс, шуам, ас овмöсьясын мöс-порсь лöсьöдiгöн сьöмöн отсалö. Неважöн Важкурьяын мöс видзан карта лои кыпöдöма, кöнi пемöсьяссö видзöны выль ногöн. Вöчöма и мукöдтор.
Сьезд вылын уна вöзйöм жö вöлi, кыдзи эськö и му-видз вöдитысьяслы стсавны, уджаланiньяс лöсьöдны. Нэ сэтшöм мöвпсö, кодi эськö збыльысь бурмöдас став сиктас олöмсö, эг на аддзы.
- «Коми войтыр» - общественнöй котыр, и сылы колö овны аслас нажöвитöм сьöм вылö...
- Ми топыд йитöдын уджалам национальнöй политика, культура, йöзöс велöдан да мукöд министерствокöд. Мыйкö кö öтув котыртам-нуöдам, найö водзвыв урчитöны колана мында сьöмсö. Колö и аслыным нажöвитны. Чайта, эм позянлуныс сöвмöдны туризм, тöдмöдны татчö волысь йöзöс коми войтырлöн оласногöн, культураöн. Збыльмöдны зэв позяна мöвп — Печора кузя Усинсксянь Семöндрейöдз теплоходöн йöзсö нулыны, юбокса сиктьясас сувтлыны. Усинскö Москвасянь самолётьяс лэбалöны, мытшöдыс сэтчö воöдчынысö некутшöм абу. Изьва район миян зэв аслыспöлöс, и сэнi этнотуризмсö колö жö сöвмöдны. Но воöдчыны сэтчö сьöкыдджык. Финляндияысь саамьяс дасьöсь сöвмöдны туризм миян Войвылын - Комиын да Ненеч кытшын. Дас миллион шайт пö вермам та могысь торйöдны, но мед и республикаыд ассьыс пай пуктас.
Колö гöгöрбок артыштны и, позьö-ö нажöвитчыны небöгьяс лэдзöмöн. Неважöн роч кыв вылын петiс Геннадий Юшковлöн куим тома гижöд чукöр. И ме кывлi нин рочьяслысь шензьöмсö, кутшöм пö бур коми литература вöлöма, а ми эг на и тöдлöй. Позьö вуджöдны и мукöд гижöд, чайта, найöс лыддьысьыс сюрас. Тайö кыпöдас мукöд кывья войтырöн коми литературанымöс доньялöмсö.
— Финн-йöгра войтырлöн Таллинса конгресс вылын шöр сёрниыс вöлi том йöз йылысь. «Коми войтырлöн» бöръя съезд вылын налы сиисны торъя секция. Тайö петкöдлö томъяскöд уджлысь ыджыд тöдчанлунсö. Кутшöм йитöдъясыс «Коми войтырлöн» мукöд общественнöй котыркöд, диаспоракöд?
- Том войтырлöн «Ми» котыркöд топыд йитöдын уджалам. Лачаыс на вылö миян ыджыд. Йитöдсö кутам и республикаысь бокын олысь комияскöд. Мурманск обласьтса Ловозероысь Ольга Яровая Комиысь делегациякöд ветлас Ханты-Мансийскö финн-йöгра войтырлöн став мирса конгресс вылö.
Нöшта кöсья висьтавны, мый «Коми войтырö» öтувтчöны уна сикас партияö пырысь йöз. Олöмыс вочасöн вежсьö, öнi Россияын эм ыджыд ён партия. И, тöдöмысь, миянлы колö кутны топыдджык йитöд «Единая Россиякöд», медым эг кольччöй опöмсьыс. Кутшöмджык ногöн тайöс позяс вöчны, дерт, колö на мöвпыштлыны.
- Неважöн Ыджыдвиддзын нуöдiсны «Коми войтырлöн» призъяс вылö лызьöн ордйысьöм. Тi и асьныд котöртiнныд. Кыдзи донъяланныд ордйысьöмсö?
- Ыджыдвидзса спортшколаысь тренер Афанасий Габовлöн водзмöстчöмöн татшöм ордйысьöмыс нуöдсьö мöд во нин. Котыртöмаöсь зэв бура. Бара жö пасья, мый ставыс тайö отсалö видзны коми русö. Ме аскöд нылöс босьтлi. Карын олiгад эз на тырвыйö гöгöрво коми кывлысь коланлунсö, а Ыджыдвиддзын, кöнi ставöн комиöн сёрнитöны, чужан кывсö бура тöдны кöсйöмыс сылöн бара öзйис. Локтан во эськö исполкомö пырысьяскöд ставнымлы ветлыны да сувтлыны лызь вылö. Гашкö, ордйысьöмысь öтдор и сьылыштны-йöктыштны. Мукöд сиктысь видзöдысьяс на воласны и татшöм гаж вылас.
Oнi национальнöй политика да йöзöс велöдан министерствояскöд нуöдам «Менам радейтана гижысь» конкурс. Школа помалысьясöс тшöтш корам пырöдчыны сэтчö, медбурьяссö тöд вылын кутасны университетлöн коми юкöнö примитiгöн.
Сьезд вылын бöрйöм исполкомлöн чукöртчылiгöн «Коми войтыр» öтмунöмöн веськöдлысьöс вежысьясöн бöрйисны Валерий Марковöс, Василий Киселёвöс, Галина Князеваöс. Секретарöн вынсьöдiсны Маргарита Низовцеваöс.
Автор:
Павел Симпелев
Источник:
Газета "Коми му" (Республика Коми) от 12 апереля 2008 года
