15.04.2008 11:16
Сизим воöн том гижысьяслöн Гожся университетын велöдчис сёысь унджык ныв да зон. Медводдзаяссьыс кодсюрö уджалöны нин редакцияясын, уналöн гижöдъясыс петавлöны газет-журналын, небöгъясын.
Июнь 23 лунö восьтас öдзöссö кöкьямысöд Гожся университет. Документальнöй (журналистика, литературнöй критика, вуджöдчöмьяс) да художествоа (проза, поэзия) гижöд лабораторияясын велöдчыны корöны 15-20 арöса том йöзöс, кодьяс кöсйöны пырöдчыны коми филологияö. Медым веськавны университетö, июнь 1 лунöдз колö комиöн гижны висьт, кывбур, очерк да ыстыны гижöдтö татшöм адрес серти: 167000, Сыктывкар, Ленин улича, 73-öд керка, Россияса финн-йöгра кулыура шöрин. Видлаласны и коми литература туялан уджьяс, комиöдöм роч гижöдьяс, республикаса да районса газет-журналын йöзöдлöмторьяс.
Уджьяссö доньялöм бöрын жюри, кытчö пырöны коми гижысьяс да редакторьяс, бöрьяс кöкьямыс мортöс. Найöс вежон кежлö, июнь 23-29 луньясö, корласны велöдчыны Гожся университетлöн медводдза курсö. Ныв-зон аддзысьласны да сёрнитасны гижысьяскöд, журналистьяскöд, учёнöйяскöд, тöдмасясны «Коми гор» телерадиокомпаниялöн, газет-журнал редакцияяслöн, типографиялöн уджöн, ветласны музейясö, выставкаяс вылö. Университетлöн пресс-центрын велöдчасны босьтны интервью, дасьтыны гижöд да вöчны газет. Курс помалöм бöрын велöдчысьяслы сеталасны сертификатьяс.
Гожся университетын ныв-зонмöс велöдасны, видзасны-вердасны дон босьттöг, мынтысьны налы ковмас сöмын Сыктывкарö локтöм-мунöмысь.
Юалöмьясöн позьö шыöдчыны Россияса финн-йöгра культура шöринö (8212) 44-03-40 да 24-73-89 телефоньяс пыр.
Источник:
Газета "Коми му" (Республика Коми) от 15 апреля 2008 года
