Дас кöкьямысöд «Тулыс» (на коми языке)

Таво «Сыктывкарса тулыс» фестиваль мукöд воын серти воссяс вежонöн сёрöнджык — апрель 27 лунö. Опера да балет радейтысьыд, шуöны театрын, и эскысьяс пöвстын уна, да мед пö найöс эз ло öтдортöма, Ыджыд лунö лоас фестивальыслöн медводдза концертыс.

Тайö дас кöкьямысöд «Сыктывкарса тулыс» нин. А кыдзи пансьылiс фестивальыс? Медбура та йылысь висьталас, дерт жö, опера да балет театрса художественнöй веськöдлысь Ия Бобракова:

- Миян видзöдысь оз век вермы ветлыны Москваса, Петербургса театрьясö, и ми мöвпыштiм нималана сьылысьясöс корлыны Сыктывкарö. Медым фестивальным лоис Россияса тшупöдаöн, колiс странаса культура министерстволöн тшöктöм. Тешкодь öнi казьтыштны, а та йылысь сэкся министр Юрий Соломинкöд ми сёрнитчим Сочиса санаторийын, сибдiм лифтö да. Комын вит минут виччысим, кор мездасны. Юрий Мефодьевич вöлi паныд, öдвакö пö мый тi верманныд петкöдлыны фестиваль вылас. А театрын миян пыр вöлi «Евгений Онегин» кодь классикаыс. Медбöрын шуис, республикаса Министрьяс Сöветыд кö пö отсалас тiянлы, нуöдам фестивальтö. Рытнас жö лэби Сыктывкарö, а асывнас нин Иван Кортошкинкöд, кодi вöлi культураса министрöн, локтiм Совминöн веськöдлысь Вячеслав Худяев дорö. Воим сыкöд öти кывйö, ыстiм Москваö телеграмма, час мысти вочакыв воö, 1991 воын пö позьö нин нуöдны «Сыктывкарса тулыс» фестиваль. Со тадзи миян карын и «чужис» тайö фестивальыс. Дас сизим воöн миян дорö волiс 463 гöсьт. А видзöдысьяс и Ухтаысь, Воркутаысь локтöны. Мылдiн сиктысь кыв да литература велöдысь Евдокия Ивановна быд фестиваль вылö волö, кыдзи и Карл Файт, Баварияысь БМВ компанияöн öти веськöдлысь.

Oнi фестивальыс лоис нин войтыркостсаöн, тавося «Сыктывкарса тулыс» вылын петкöдчасны Россияса, Швейцарияса, Германияса, Испанияса сьылысьяс да йöктысьяс. Кöкьямыс лунöн лоö петкöдлöма нёль опера, öти балет да кык ыджыд концерт.

Апрель 28-29 луньясö позяс видзöдны Доницеттилысь «Фаворитка» опера. Кольöм вося ноябрын миян театрын ворсысьяс медводдзаысь петкöдлiсны сiйöс Швейцарияса Дюдингенн карын.

- Россияын тайö спектакльыс мунö сöмын Сыктывкарын, - висьталö театрса директор Валентина Судакова. - Сцена вылын сiйöс пуктö Москваысь режиссёр Ольга Иванова. Нималана сьылысьяскöд петкöдчасны и томьяс. Ольга Сосновскаякöд, Михаил Журковкöд öтлаын сьыласны гöсьтьяс - Швейцарияысь Светлана Афонина, Москваысь Сергей Байков да Испанияысь Рафаэль Лледо. Дирижёрыс - Виктор Бокман (Швейцария).

Вердилысь «Риголетто» опера петкöдласны апрель 30 лунö. Санкт-Петербургысь Николай Копылов да Константин Котельников сьыласны Риголеттолысь да Герцоглысь партияяс, Альфия Коротаева да Ольга Сосновская - Джильдалысь да Чепрано графинялысь.

Фестивальвывса дзик öти балет - Чайковскийлысь «Лебединое озеро» - петкöдласны май 1 лунö. Сыктывкарса видзöдысьяс радейтöны тайö спектакльсö. Водзтi кö сiйö мунiс куимысь коставлöмöн, öнi, мед дыр эз нюжав, öти костöн вöчöмаöсь. И сцена вывсö выль ног мичмöдöмаöсь. Шöр геройяссö, Одетта-Одилияöс да Зигфридöс, йöктасны Москваысь Анна Иванова да Нариман Бегзанов.

Май 2 лунö позяс видзöдны Россинилысь «Севильский цирюльник», май 3-öдö - Бизелысь «Кармен». Тайö спектакльясас сьыласны миян землякьяс Эдуард Цанга да Михаил Макаров, кодьяс öнi уджалöны Санкт-Петербургса театрьясын.

Ыджыд лунö воссян фестиваль вылын юргас сiдз шусяна духовнöй музыка, кык опера лоö сьылöма сiйö кывьяснас, кутшöмöн гижöмаöсь: «Фаворитка» - италия, «Кармен» - франция кывьяс вылын. Спектакльяссö видзöдасны и суйöр сайысь импрессариояс: Германияысь Петер Шуберт да Швейцарияысь Виктор Бокман. Бурджык петкöдчöмьяснас кöсйöны корлыны гастрольöн Европаса театрьясö. Воласны Сыктывкарö и Россияса театрын уджалысьяслöн котырысь критикьяс.

Фестивальсö котыртны республикаса бюджетысь торйöдöма 250 сюрс шайт. Кыксё сюрссö арталöны вештыны корöм артистьяслы гонорар пыдди.

«Сыктывкарса тулыс» йылысь висьтасигöн Ия Бобракова шуис, миян театр пö кöсйö лоны Москва-Питерса театрьясысь оз омöльджыкöн. Таысь медся нимкодь сыктывкарсалы, кодьяс кöсйöны ас карын видзöдны медбур операяс, балетьяс, опереттаяс.