Чукöртчылiсны том гижысьяс (на коми языке)

22.04.2008 11:43

Кулöмдiнын бара мунiс том гижысьяслöн семинар. «Парма гор» газетлöн редакциялы сiйöс нуöдны кольöм воын моз жö отсалiсны республикаысь национальнöй политика министерство да гижысьяслöн котыр.

Кык лунся творческöй удж котыртöмö ассьыныс пай пуктiсны райадминистрацияысь физкультура, спорт да туризм да культура юкöнъяс, шöр библиотека, юрсиктса шöр школа. Велöдiсны том авторъясöс Россияса гижысьяслöн котырö пырысьяс Василий Лодыгин, Александр Ульянов, Алексей Попов да Вячеслав Бабин.

Тайö пöрйö семинар вылö волiс районса сикт-посёлокъясысь 20 морт. Налысь уджъяссö донъялöм бöрын медбур кывбур-висьт гижысьясöн шуисны Ручысь том поэтесса Анастасия Главатскихöс да Пожöгысь босьтчысь на прозаик Анастасия Третьяковаöс. Эдуард Тимушев нима литературнöй премия сетiсны Помöсдiнса поэт Артур Уляшевлы, кодi öнi велöдчö Сыктывкарын.

Пасъям, гижны босьтчысьясöс «Вöр фронт» — «Ленин туйöд» — «Парма гор» газет öтувтö-велöдö кольöм нэмся 50-öд вояссянь нин.

Автор: Василий Игнатов
Источник: Газета "Коми му" (Республика Коми) от 21 апреля 2008 года