А видла кö таысь пызан вöчны? (на коми языке)

—Мый нö Сергеевичыс керъясас бöрйысьö? Ставыс öткодь, сöмын дзажгы, — сувтовкерис öшинь улас пилитчысь мужичöй дорö ветлысьмунысь.

—Тайö дiнышсö тай видзöдала, гашкö, кытчöкö туяс.

—Мый вылö нö татшöм чукыль-мукыльыс туяс? — водзö шензис уличтi восьлалысь.—Пачö тöрмöн весиг поткöдлынытö он вермы.

—А ме ог и поткöдлы. Мыйта колö чинта да бокö кольöдла, — крукöн быгыльтiс «синмалöм» керсö пилитчысь. — Кад лоас да думыштла, мый вöчны.

Кулöмдiнса олысьяс пиысь унаöн, кöнкö, оз на тöдны, кыдзи коллялö прöстджык здукьяссö налöн öти сиктсаыс, ДРСУ-са уджалысь Алексей Сергеевич Уляшев. Мортыс вирнас и ловнас йитчöма чужан вöр-вакöд да, ставныс чайтöны, мый сöмын кыйсьöмöн и олö. Но Эжва йывса Вöльдiнын чужлöм мортлöн вöлöма и мöд радейтана делö. Пыравлöй Вичко шорбокса сылöн ыджыд да кыпыд керкаö, видзöдлöй-доньялöй, мый сяммöма думыштны-вöчны öнтай кодь бöрйöм пу вужлясьыс, мичлун дорас öдвакö колянныд веськодьöн.

Во вит-квайт сайын вöралiгöн лёк васöд нюрын сылöн син улö усис зэв ыджыд йöга пу. Йöгыс ёна гартола, чорыдсьыс-чорыд. А мый, видла кö таысь кутшöмкö пуклöс ли пызан вöчны?—мöвпыштiс мунiгмозыс. Туйсö сэсся эз вунöд да пилаöн волiс нюрас. Кыйсянiнсянь воöм бöрын упкöм сорöн катöдiс пыжсяньыс гортас — прöмыс тыра нопсьыд ёна сьöкыдджык вöлöма. Гортсаясыс первойсö эз гöгöрвоны, дивитiсны на, мыйла пö нинöм абусö кыскалан, нинöм абунас ноксян. А кад колис да, тайö «нинöм абусьыс», уна пöсь кисьтöмöн, ки сöньяс мудзтöмöн петiс авкариум улö мичасьыс-мича пызан. Ставсö, мый пуктöма-ляскöма нэмöвöйся быдтасас вöр-ваыс — быд ногыс шыльöдiсмольöдiс выльöн чужöм мастер, а бöрыннас мавтiс югыд лакöн. Шогмö видзöдлыны быттьö мойдысь петöм вöчöмтор вылас!

Тасянь Алексей Сергеевич и «висьмис» выль «хоббинас». Кöть и кадыс колö уна—сöмын косьтынысö куим во, но мыйсö сöмын эз удит нин тiльны-вöчны. Со ыджыд жырьяс öта-мöдыскöд орччöн сулалöны дзоридзьяслы да телевизорлы вужляысь вöчöм джуджыд подувьяс. Он и шу, мый тайö вужляясыс нитшкöн да кырсьöн вевттьысьöмöн коркö сулавлiсны зумыш пармаын. А со дзоридзьяслы жö джадж сяма. Чорзьöм тшак-капысь вундалöмшыльöдöм уна йöга вöчöмторсö пуктöма джоджö. Сы вылын зэв ёна радейтö пукавны ичöтик Алёша внукыс—мичлуныс, тыдалö, кыскö жö. Танi жö стенас пукалö бордьяссö шевкнитöмöн кутшöмкö шензьöдана лэбач. Быттьö мойдысь жö. А челядьлöн узьланiнын аслыспöлöслуннас чуймöдö кöлуй видзан ыджыд шкап. Кык öдзöса, джаджьяса—ставыс пу йöгысь жö.

Татшöм жö шкап, сöмын нöшта на мичаджыкöс, бать козьналiс карын олысь Надя нылыслы. Сэсся и орччöн стрöитчысь Вова пиыслöн эм татшöм жö козин. Кор челядь, гöтырыс аддзисны, гöгöрвоисны батьыслысь кужöмлунсö, асьныс нин кутiсны ышöдны вöчасьнысö. Ия Ивановна шуö, мыйтакö пö и лоö мырсьыны сьöкыд, уль, няйт дiнышьяссö вöр керка да пыж дорö петкöдiгöн. А май помад—июняд, кор медся лöсялана кадыс капсö перйöм вылö, вöрас лолавнысö он вермы ном-гебсьыс. Торйöн нин увтасiнын, зыбуч нюрьясын, кытысь и корсьöны гартола да йöга пуяссö. Ия Ивановна ачыс Канаваысь, позьö шуны, вöр-валöн быдтас. Чери кыйигад сiйö верöсыслы веськыд ки, и со выль уджас медводдза отсасьысьöн лоис.

—Медся мисьтöм, медся гартола пуас сэтшöм мичлун дзебсьöма,—шуö кöзяйка. — Сiйöс перйигöн тай уна жö вын колö пуктыны-а.

Алексей Сергеевичлöн мастерскöйын öнi эм быдсяма вöчасян кöлуйыс. Пу йöгыд зэв асныра, колö на тöдны, кыдзи сiйöс вундавны, кодарсянь босьтчыны. Быть мед вöлi и художниклöн видзöдлас. Лентаа пила, рубанок, шлифуйтчан машина, лобзик—став электроприборыс чукöрмис дас сайö нин, на отсöгöн мастер и перйö мичлунсö.

Первойысьсö корсюрö весиг ачыс оз тöд, мый артмас. Oтчыд тай вöлöм мунö вöлöн нюрöд да ки улас веськалас уна гартола кузь, вöсни да косьмöм нин коз. Перйöма нитшсьыс, васöдiнсö вуджигöн бедь пыдди вöдитчöма, а сэсся жаль лоöма шыбитнысö. Oнi тайö шыльöдöм-мольöдöм, лакöн мавтöм бедьсö корлöны Кöдзыд пöльлы детсадйын Выль во пасйигöн.

Мый сетö пуöн ноксьöмыс? Юалöм вылö мастер эз вочавидз. Сöмын на пö сибöдча ремеслö дорас. Батьыс, вöвлöм фронтöвик Сергей Терентьевич, война туйяс талялiгöн веськавлöма быдлаö, быдсяма йöз дiнас. Мукöдлаас пö, пиö, сэтшöм дивö вöчалöны пусьыд. Ми вöрын олам да позьö жö на моз кöть нин дозмук-чача лöсавны, майбыр, та могысь коланаыс кок улын. Овмöсад ставыс сгöдитчас. Тайö кывьясыс эз вунны Алексейлöн, и со уна во мысти, пенсия вылö петöм бöрас нин, босьтчис выль делöас.

—А мыйла тi он вузавлöй вöчöмторьястö либö он петкöдлöй выставкаяс вылö?—юалiм зiль мортлысь—Век нин содтöд сьöм воас.

—Да сöмын сьöм ради али мый олам свет вылас, — кылiм воча. — Он кö куж аддзыны да доньявны тэныд Енмöн сетöм мичлунсö, весиг зарни тыра нопйöн он ло шуда. А ачыд кö пöжан, лелькуйтан, сöвмöдан тайö мичлунсö, медся лöсьыда бурмöдан ловтö.

Збодер, сöнöд, крепыд кабыра—татшöмнас лоны Алексей Уляшевлы, тыдалö, и отсалö лов кыпöдан уджыс.