Сиктын олысьлы - коми мортлы (на коми языке)

Неважöн Коми Республикаса вужвойтырлöн шылада-драмаа театрысь артистъяс ветлiсны Кöрткерöс районса öткымын сиктö. Тувсов уджъясö сэнi эз на босьтчыны да йöзыс окотапырысь волiсны клубö видзöдны спектакльяс. Кыдзи и пыр, артистъясöс  вочаалiсны зэв пöся.

Василий Лекановлысь «Олöмын бужöдъяс» драма видзöдiсны Вомын да Нёбдiн сиктса олысьяс. Ёна и ваксисны-сералiсны Чушкан Иван да Кариса костын вензьöмъяс вылын, нормылiс сьöлöмныс Шаховлöн да Исаковлöн жугыль олöм вöсна.

«Олöмын бужöдъяс» — ветымынöд вояс йылысь драма, но и талун вöрзьöдö спектакль радейтысьясöс. Oд сцена вылын — ловъя йöз, найö радейтöны, вежöгтöны, вензьöны, мудеритöны, бöрдöны да сералöны. Театр кöть и гежöда, но волывлö сиктö да козьналö тайö гажсö сэнi олысьлы — коми мортлы.

Луннас артистъяс волiсны школаясö да петкöдлiсны челядьлы и «Ёма да Чача» мойд, кодöс лöсьöдiс театрын ворсысь Андрей Епанешников. Спектакляс Гöнапель да ичöт нывка Чача венласьöны Ёмакöд да сылöн мути-бесъяскöд. Тайö мойдсö видзöдiсны Адзорöмса, Кöрткерöсса, Нёбдiнса, Висерса, Одыбса челядь.

Апрель 25 лунö «Олöмын бужöдъяс» спектакль петкöдласны Визинын, а 29 лунö — Абъячой сиктын.