Сьöлöм серти уджыс (на коми языке)
24.04.2008 10:14
Дереваннöй сиктын клубыс коркöя столöвöйын. Абу и ыджыд, но зэв гажа танi овлывлö праздникъяс дырйи. Гажсö котыртысьыс — клубöн веськöдлысь Ксения Зезегова. Ачыс татчöс. Кольöм во помалiс Сыктывкарын культура колледж. Сэтчöс «Пелысь мольяс» сьылан ансамблькöд ветлiс Финляндияö. Oд Ксения и ачыс бура сьылö. Дерт, гажа вöлi Сыктывкарад велöдчыны. Но удж вылö окотитiс локны гортас.
—Праздникъяс дырйи петкöдлам концертъяс, ворсам спектакльяс, — висьталö Ксения Зезегова. — Сiдз, Геннадий Юшковлöн «Гöтыртöгыд абу олöм» пьеса серти куим тöлысь дасьтiм спектакльсö. Йöзыслы ёна воис сьöлöм вылас.
Ог сöмын ас сиктын петкöдчöй. Ветлывлам концертъясöн Немдiнö, Керчомъяö, Улыс Вочö, Донö. А шойччан лунъясö котыртлывлам гажа дискотекаяс.
Ксения Зезеговалы сьöлöм сертиыс тайö уджыс. Водзö сiйö кöсйö пырны культура институтö. Кутас уджавны и велöдчыны.
Кулöмдiн р.
Источник:
Газета "Коми му" (Республика Коми) от 24 апреля 2008 года
Возврат к списку
|
