Изкар, Сыктыв, Ёма да мукöд (на коми языке)

Бура-ö öнiя челядь тöдöны Сыктывкарлысь историясö, Коми муса юркар йылысь важся казьтылöмъяс, былинаяс мойдъяс? Дерт жö, оз на сiдзи, кыдзи эськö колö. А öд аслад ичöт чужанiнлысь кольöм кадсö тöдтöг сьöкыд гöгöрвоны сылысь талунъя лунсö, велöдчыны радейтны сiйöс. И лоасны-ö талунъя нывкаяс да зонкаяс водзö вылö ас му нимöдысьясöн?

Та йылысь мöвпыштi Сыктывкарса администрациялöн ыджыд залын паськыда тöдса журналист да гижысь Леонид Лыткинлöн мойд серти «Изкар и Сысола» спектакль видзöдiгöн. Петкöдлiс сiйöс том йöзлöн «БИС» театр, кытчö öтувтчöмаöсь Сыктывкарса вузъясысь студентъяс да школаясысь гырысь классъясса велöдчысьяс. А юрнуöдiс тайö уджнас Коми Республикаысь культураса заслуженнöй уджалысь Александр Куликов.

Зал тырыс челядь, Сыктывкарса школаясысь ичöт классъясын велöдчысьяс. Найö оз вермыны веськодя видзöдны сцена вылын петкöдчöмсö да корсюрö гораа донъялöны том артистъяслысь висьтасьöмъяссö. То серöктасны, то дöзмöмпырысь мыйкö горöдасны. Видзöдысьяслöн син водзын воссьö Сыктывкарлöн тöрытъя луныс. Сизим мыльк вылö пуксьöма сiйö. Сыктыв да Эжва юяс видзöны татчöс пармасö омöль войтырысь. Oти бöрся мöд петкöдчöны гундыр Яраш Изкар, рочакань Сыктыв, налöн Голик, Чутик, Дозмöр, Вонюй, Кокуль пияныс, Ёма баба, йöра да вöркань. Сцена вылын петкöдчысьяс дивитöны омöльсö, ошкöны бур вöчысьöс.

Oтчыд тулыснас Сыктыв ю вылын тыдовтчис пыжа, кöнi пукалiсны квайт том зон. Тайö вöлiны йöз муысь воöм войтыр. Гораа горöдiс сэки Изкар да шыбитiс пыжас паличöн. Пыжыд пасьмунiс, сэнi пукалысьяс вöйисны. Мöд тулыснас куим пыжа нин тыдовтчисны ю вылын. И бара Изкар вермис найöс. А коймöд тулыснас ю вылын кылiс мича рочакань Сыктывлöн гöлöсыс. И ворсiсны сэки Изкар да рочакань Сыктыв гажа кöлысь. Сэк жö эз во сьöлöм вылас выль том гозъяыс пöрысь Ёмалы да кырнышлы. И  шуисны  найö вöйтны рочаканьöс Сыктыв юö, кор Изкар эз вöв гортас. Но багатыр Изкар юис Сыктыв юысь васö да петкöдiс нылöс берег вылö, а сэсся койыштiс сы вылö Дырнöс юысь вайöм ловъя ваöн, да нылыд ловзис. Изкарлöн да рочакань Сыктывлöн чужис сизим пи. Найö овмöдчисны сизимнан мыльк вылас. А сэсся танi быдмис-паськалiс Коми мулöн юркар. Спектакльсö аслысногöн мичмöдiс паськыда тöдса сьылысь Виктория Пыстиналöн мыла гöлöсыс.

—Тайö мойдсö кывлi аслам пöчсянь на, — висьталö Леонид Александрович. — Бöрынджык нин гижи сылысь висьталöмсö рочöн. А сэсся вуджöдi коми вылö да йöзöдi газетъясын. И со режиссёр Александр Куликов пуктiс мойд сертиыс спектакль, кодi ёна воис ичöт арлыдалы сьöлöм вылас. А таöдз «БИС» театр петкöдлiс нин Каллистрат Жаковлы сиöм «Сын пармы» спектакль.

Выль спектакльын, Леонид Лыткинлöн кывъяс серти, петкöдчö, кыдзи уна нэм сайын чужисны вок сяма йитöдъяс сiйö кадся Москваса княжество да Коми муын олысьяс костын. Коми да роч войтыр торйöдны позьтöма йитчöмаöсь öта-мöдныскöд. И тайö йитöдъяссö нинöм оз вермы торкны.