Киас ворсö шöрт и сюмöд (на коми языке)

Чёрнöй Ярö ветлыны миянöс чуйдiс «Емдiн» овмöдчöминса администрацияöн веськöдлысь Василий Кажиков. Висьталiс, олö пö сэнi зарни киа енбиа морт Николай Ёлышев, районса мастер. Кор пö Емдiнö волöны нималана йöз, ас муысь да суйöр сайысь пыдди пуктана гöсьтъяс, налы пыр козьналам Николай Николаевичлысь вöчöмторъяссö.

Ёлышевьяслысь керкасö öдйö аддзим. Посёлокас сiйöс бура, вöлöмкö, тöдöны. Дзирьяа завор дорас матыстчим да, керкабокса неыджыд сараяс заводитiсны эргыны поньяс, кылiсны, буракö, тöдтöмьяслысь воöмсö, лёкысь кутiсны увтны. Шы сертиыс кö, вель гырысьöсь. Весиг кöзяиныслöн миянлы воча петöм бöрын эз öвсьыны.

Синмö шыбитчис пос помсьыс войтва вияланiныс. Ыджыд сяма мортлöн и татчö киыс сибалöма. Мастеритöма сiйöс пластик дозьясысь. Помьяссö вундалöма, шöрьяссö йитлöма, вöчöма ворга да нюжöдöма сiйöс керка вевтсяньыс бакöдзыс. Ыджыд тöвру кö пöльыштас либö ёна зэрны кутас, ва войт весиг бокö оз усь, ставыс пытштiыс бакас визувтас. Васö пö ылысь колö ваявны да, войтванас и пывсьöны.

Николай Николаевич вочаалiс миянöс шоныда. Нюмьялöмöн корис пырны. Олöны, вöлöмкö, гöтырыскöд кыкöн, нылыс да пиыс важöн нин лэбзьöмаöсь мам-батьныслöн борд увсьыс.

Мастерлöн керка пытшкыс югыд да сöстöм, куим жырья. Пусян-пöжасянiнсö юкöма аркаöн. Пызанулöсыс, джаджьясыс — ставыс ас киöн вöчöм, унджык дозмукыс—сюмöдысь. Керкаыс ставнас быттьö кыдз пу кöра, сöстöм сынöда.

Гöтырыс тэчöма туисьяссö радöн-радöн, ки пыдöс пасьтасянь гырысьджыкöдз—синтö гажöдöны. Меным торйöн нин воис сьöлöм вылö пызан весьтас стенмын öшалысь чача кодь ичöтик пестер. Николай Николаевич сiйöс мастеритöма пуртьяс улö. Кокньыд судзöдчыны, и оз уна ин босьт.

Николай Ёлышевлы 63 арöс, чужлöма Челябинскын. Помавлöма военнöй училище. Том офицерöн веськалöма Комиö, Айкатыласа райвоенкоматö. Сiдзи и кольччöма. Сэсся военнöй службаысь эновтчöма, и кöкьямысдасöд воын корöмаöсь уджавны школаö. Лоöма труд урок велöдысьöн.

Коркö тöдöмлун-сям кыпöдансöвмöдан курсьяс дырйи тöдмасьöма нималана коми мастерьяскöд, видзöдлöма, кыдзи найö уджалöны. Сьöлöм вылас воöма. Ыззьöма да гортас локтöм бöрын тшöтш видлöма мыйкö вöчны «Береста в руках школьников и учителей» небöг серти. Дыр нинöм абу артмöма. Мöд кö эськö эновтчис, но Николай Николаевич зэв асныра морт. Босьтчас кö мыйкö вöчны, быть помöдзыс вайöдас. Буракö, мастерыдлы татшöмöн и колö лоны.

Кытчö вöлöм оз мун, быдлаысь ньöбö сюмöдöн вöдитчöм йылысь небöг. Джадж тырыс чукöртöма. Висьталiс, сэки пö зэв на и шоча татшöмыс вöлi сюрö. Лыддьысигмозыс и нокöма сюмöдтö. Медводдза вöчöмторнас вöлöма ичöтик туис. Николай Николаевич козьналöма сiйöс радейтана гöтырыслы. Надежда Афанасьевналöн öнi став овмöсыс, позьö шуны, туисьясын. Oтиын кизьяс, мöдын лекарство, коймöдын дöмас чукöр. И быд туис пыдöсö пасйöма, кор вöчöма.

Артмыныджык кутöма да, Николай Ёлышев аслас вöчöмторьяснас петкöдчöма сиктлы сиöм гаж дырйи. Сэсся районса ярманга вылын. Вочасöн Николай Николаевич лоöма культура юкöнын пыдди пуктана мортöн. 1993 воын петкöдчöма вöчöмторьяснас юркарын, Республикалöн лун дырйи. Oнi Николай Ёлышев ёнджыкасö уджалö шыöдчöмьяс серти. Весиг блокнот лöсьöдöма, кодлы, мыи да кор кежло колö вöчны. Емдiн районса мастерлысь нимсö сылы сетöмаöсь 1999 воын. Oнi Николай Ёлышевтöг районын оз коль ни öти тöдчана гаж, сiйö петкöдчö быд фестивальын да конкурсын. Та йылысь висьталöны ошкана письмöяс, дипломьяс, грамотаяс.

Николай Николаевич ёна радейтö ноксьыны сюмöдöн. Пенсия вылын, а уджыс юр выв тырыс, вои и лун мыйкö мастеритö. Ачыс куритчö да, весиг пепельничасö сюмöдысь вöчöма. Oти рытöн пö артмис. Кык-куим ведраа пестер 5-6 лунöн эштöдö.

Миянлы петкöдлiс вит во сайын вöчöм ыджыдкодь пестер, 22 литра пö татчö тöрö. Дзик выль кодь на. Босьтiс да öти здукöн сiйöс тубыртiс, быттьö абу и пестер, сэтшöм небыд да нюдз. Эз весиг эскыссьы.

Пуысь да сюмöдысь вöчасьöм кындзи Николай Ёлышев нöшта на и кысьыны кужö. Татшöм верöснад, чайта, шоч гöтыр ошйысяс. Надежда Афанасьевналы таысь зэв долыд. Аслам пö терпенньööй оз тырмы кысьынысö.

—Пу да сюмöд кö сетчöны, сiдзкö, и шöртысь вермас мыйкö артмыны. Окота лоис видлыны, —висьталiс Николай Николаевич. Ньöбöма шöрт, ем, «Вяжите сами» небöг да сы серти панöма носки. Кыöма сiйöс некымын лун. Кöть и коклябöртöм артмöма медводдза носкиыс, тайö уджсьыс мужичöй абу эновтчöма.

Oнi кык рытöн кыö кепысь гоз, вежонöн—джемпер. Николай Николаевич нывбабаысь бурджыка тöдö английскöй, рисöвöй кысянног, сылöн öтмоза лöсьыда артмö «кöса» и «жгут».

Шöртнас ноксьöмыс сылы шойччöм кодь. Радейтана нылыс карын олö да, сiйöс прамöя нин пасьтöдöма. Ачыс пö и вайö моднöй журнальяссö, кодьяс серти корö батьыслы кыны медмича жилетковтасö.

Ёлышевьяс ордысь петiгöн бара кылiс поньясыслöн эргöмыс. Николай Николаевич висьталiс, найö пö менам медшöр отсасьысьясöй. Oтиыс пö 46 килограмма овчарка—Барон, мöдыс лайка сора овчарка — Гром, 44 килограмма. На вылын пö тулыснас сюмöдсö вöрысь вая. Даддьö сöвта да ачым тшöтш пукся. Найö кыскöны. Таысь кындзи пö и горт гöгöрын отсасьöны. На вылын Николай Николаевич ва ваялö и пес кыскалö. Мед аддзылам, миян дырйи Громсö доддявлiс. Шемöс босьтiс, кутшöм рама да кывзысьöмöн понйыс вöчис кöзяиныслысь быд тшöктöм! Колö пасйыны, телегасö Николай Николаевич ачыс жö мастеритöма. Тöвнас, дерт, — пу дадь.

Oнi тулыс. Мастерлöн сюмöдöн заптысян пöсь кад. Тырмымöныс пö колö кульны матö 12 кыдз пу. Николай Ёлышев серам сорöн казьтылö воддза воö пу йылö öшйылöмсö. Мукöддырйиыс пö вылö кавшасьöмöн лоö уджавны. Коркö прöступитöма да увлань юрöн öшйöма пу вылас, сапöгыс кытчöкö сибдöма да. Мудзтöдзыс öшалöм бöрын кыскöма сапöгсьыс коксö да жмуткысьöма му вылас. Бур, абу ёна доймöма. Мышсö чашнитыштöма сöмын.

Мунiгмоз нин юалi Николай Николаевичлысь, кор петкöдчас республикаса «Мастер года» конкурсын. Ышловзис сöмын:

—Ме öд пöрысь нин. Ветлöм-мунöмсьыс, ноксьыс мудза. Да и пырöдчöмсьыс вель уна колö мынтыны, менам пенсияöй та вылö оз тырмы...