Лызьöн, пыжöн, подöн... И пыр ас кадö (на коми языке)

«Маяк Сысолы» газетысь корреспондент Елена Куратова пырöдчис «Пошта: тöрыт, талун, аски» став Россияса фотоконкурсö да шедöдiс коймöд места.

Унджык снимоксö вöчöма Сыктыв районса Заречье грездын. Сэтчöс поштаöн веськöдлö Александра Лушкова. А газет-журналсö вежоннас кыкысь разöдö Анна Куратова. Луннас оз öти километр ков мунны. Тöвнас, ылi ичöт грездъясö туйяссö оз весавны да, — лызьöн, гожöмнас — велосипедöн, тулыс-арнас — подöн. Мукöддырйи öти газет нуöм ради. Унджыклаас сöмын пöрысь йöз нин кольöмаöсь. Найö грездысь воясон петавтöг олöны. И та понда налы торйöн нин окота тöдны, кыдзи мукöдлаас йöзыс олöны да мый мирас вöчсьö. Заречьеса войтыр тшöкыда пыралöны поштаö газет-журналла, телеграмма-письмö ыстöм могысь либö пенсияла. Татысь позьö тшöтш и унатор ньöбны. Поштаын вузалöны сотöвöй телефонысь мынтысян картаяс, небöгъяс, тетрадь-ручка, майтöг-порошок, тасьтi-пань, ки чышкöд, мукöд колана шылльö-мылльö.

А кодлыкö поштаыс и клуб пыдди, кöнi позьö аддзысьлыны да варовитыштны ёртаёрткöд. Видзöдан да, кадыс öдйö и кольöма. Конкурсса жюри вылö донъялiс да пасйис дипломöн уджъяссö и Мылдiн районса «Заря» газетысь журналист Ирина Шамановалысь. Рöспута дырйи Мылдiнсянь Приуральскöй посёлокöдз колö воöдчыны 9 часысь дырджык. Поштальонъяс ветлöны ылi грездъясö пыжöн, вöла-доддьöн, мотоциклöн, «Буранöн», медас кадö вайны лыддьысьысьлы радейтана газетъяс, тшöтш и «Коми му».