Менам радейтана гижысь (на коми языке)

«Коми войтыр» регионъяскостса öтмунöм, национальнöй политика, йöзöс велöдан да вылыс тöдöмлун министерствояс 2008 вося март — май тöлысьясö нуöдöны «Менам радейтана гижысь» конкурс. Сiйöс котыртнысö отсалöны  Сыктывкарса университет, «Коми гор» телерадиокомпания, «Коми му» газет редакция» госучреждение да «Коми йöзкостса радио».

Конкурсас пырöдчыны вермасны 5-11 классъясын велöдчысьяс. Комиöн гижöм сочинениеясöн татшöм ордйысьöмыс отсалас ёнмöдны чужан му дорö быдмысь войтырлысь муслун, пыдди пуктыны ас войтырлысь культура, литература, ышöдас енбиа том йöзöс гижан уджö. Коми гижысьяс да налöн небöгъяс йылысь висьтъяс, казьтылöмъяс, эссеяс, кывбуръяс донъялiгöн медвойдöр видзöдласны, кыдзи ныв-зон сяммöны аддзыны гижöдлысь сюрöссö, восьтыны шöр мöвпсö. Тöд вылö тшöтш босьтасны, петкöдчö-ö уджас коми кывлöн мичыс.

Дас кык лист бокöдз гижöдъяс позьö ыстыны 2008 вося май 15 лунöдз «Коми войтыр» öтмунöмö татшöм адрес серти: 167010, Сыктывкар, Коммунистическöй улича, 8-öд керка, 632-öд жыр. Гижöдыскöд тшöтш авторыслы колö ыстыны ассьыс снимок, пасйыны ним-вич-овсö, чужан восö, велöдчанiнсö, гортса адрессö да телефонсö. Конкурс вылö воöм уджъяссö донъяласны «Коми войтыр» öтмунöмын, национальнöй политика, йöзöс велöдан да вылыс тöдöмлун министерствоясын, Коми наука шöринса Кыв, литература да история институтын, Сыктывкарса университетын коми юкöнса уджалысьяс, а сiдзжö гижысьяс да журналистъяс.

Вермысьяссö бöръясны «Прозаын, поэзияын медбур удж», «Темасö тыр-бура восьтöм», «Сöдз, мича коми кывйöн вöдитчöм», «Медся аслыспöлöс удж» нимпасъясын. «Тайö кыв мем дона» нимпас вöзйöма 11 классын велöдчысьяслы. Найöс корöны гижны быд мортлöн да ставнас республикалöн олöмын коми кывлöн тöдчанлун йылысь, юксьыны чужан кывнымлöн аскиа лун йылысь мöвпъясöн.

Быд нимпасын вермас лоны некымын вермысь, налы вичмасны козинъяс, а гижöдъяссö йöзöдасны «Йöлöга», «Коми му» газетъясын, «Войвыв кодзув» да «Арт» журналъясын.