Сöмын комиöн сёрнитам (на коми языке)

Кольöм вося ноябрь 5 лунö заводитiс юргыны «Коми йöзкостса радио» Воссис сiйö Коми Республикаса Юралысь Владимир Торлоповлöн водзмöстчöмöн. Став передачасö радиоас дасьтöны да нуöдöны комиöн. Заводитлiсны суткинас куим чассянь, мартсянь эфирö петöны кöкъямыс час нин, а во помланьыс тайö радиоыс, кöнi шеф-редакторнас уджалö Виктория Пименова, быд лун кутас юргыны 12 час.

«Коми йöзкостса радиоын» зiльöны том йöз, но налöн неыджыд котырыс кывкутöмöн босьтчис уджас да öнi нин дасьтö уна аслыспöлöс передача. Тöдмöдны журналистъяскöд да паськыдджыка  висьтавны асланыс уджтасъяс йылысь кори шеф-редактор Виктория Пименоваöс.

- Радиолöн юргыны заводиттöдз тöлысь кыкöн водз пондiм корсьны уджалысьясöс. Унаöн шыöдчылiсны, кöсъям пö коми радиоын зiльны, - висьталiс Виктория Вячеславовна. - Ми медводз видзöдiм, кодi мый кужö вöчны, кутшöм передача вермас дасьтыны аслас вын сертиыс. Радиоад öд нöшта на и мортыслöн гöлöсыс зэв тöдчана. Шуам, стрöгджык гöлöсалы лöсялас нуöдны выльторъяса уджтас, а небыдджык, мелiджык сёрниалы - йöз да налöн олöм-вылöм йылысь передачаяс лöсьöдны.

Антонина Микушева велöдчылiс Сыктывкарса университетлöн филология факультетын, дасьтö да нуöдö «Выль юöръяс». Oнi и веськыд эфирын нин тшöтш. Сiйö жö вöчö финн-йöгра войтыр йылысь «Рöдвуж ордын» передача. Быд уджтасö корсьö рöдвуж войтыр йылысь юöръяс, лöсьöдö передачаса гöсьткöд интервью, бöрйö да сетö эфирö финн-йöгралысь сьыланкывъяс, музыка.

«Выль юöръяссö» Антонина Микушева дасьтö Евгений Ракинкöд, кодi локтiс миян дорö уджавны апрельын. Сылöн кывкутöм улын и мöд передача - «Ме - коми». Радио кывзысьяслы сьöлöм вылас воöма тайö уджтасыс. И гöгöрвоана, öд кывным миян зэв озыр, а ми тшöкыда ог нин кужöй комиöн шуны пемöсъясöс, быдтасъяс, дозмук. А Евгений тайö передачаас быд лун казьтыштö миянлы найöс. Талун висьталас, кыдзи комияс шуöны рöдвужсö, аски лэбачьясöн, а аскомысь чериясöн тöдмöдас.

Университетысь финн-йöгра факультет помалысь Анна Шомысова дасьтö «Кöсъя тöдны» да «Кыдзи оланныд?» тематическöй передачаяс. Бöръяыс зэв аслыссикас: Анна звöнитö республикаса сикт-грездö да юалö, мый сэнi талун кежлö медыджыд выльторйыс. Кöнкö выль ФАП восьтöмаöсь, кöнкö нöшта мыйкö. А Сюзяыбысь öти ань висьталiс, миянöс пö кöинъяс дöзмöдöны, понъяснымöс косявлöны. И тайö тшöтш юöр.

Аннаöн жö дасьтöм «Ме танi чужи» передачаын йöзыс висьталöны асланыс чужанiн йылысь. Сиктсаяс кö сёрнитöны, векджык тöдчöдöны, аслам чужанiнысь пö ме некытчö ог мун. А карсаяслöн бать-мамыскöд олöмсö казьтылiгöн век петкöдчö чужан сикт-грезд дорас муслуныс.

Семьялы сиöм «Шуда поз» да видз-му бердын зiльысьяс  передачаяс вöчö Евгения Каракчиева. Быд уджтасын геройяссьыс кындзи сёрнитöны и психологъяс да юристъяс.

Валентин Королев велöдчö на Сыктывкарса университетлöн коми юкöнын. А «Коми йöзкостса радиоын» нуöдö «Вашкöдчыштам» да «Чолöм, радио!» уджтасъяс. Кутам лача, велöдчöм бöрас Валентин локтас уджавны миян дорö.

- Онi кутшöм радиостанция он кывзы, юöръяс кындзи унджык кадсö быдлаын юргö музыка. Татшöм пö могыс öнiя радиолöн - тöдмöдны йöзöс выльторъясöн да гажöдны найöс. «Коми йöзкостса  радиоын» уна жö коми сьыланыс...

- Коми радиолöн уна мог пöвстысь öти - ышöдны композиторъясöс да гижысьясöс лöсьöдны унджык коми сьыланкыв. Дерт, фонотеканым абу на вывтi озыр, мый петавлiс бöръя воясö дискъяс вылын, сiйö и эм. Но вочасöн содö сьыланкывъяса кудным. Тöда, мый элясьлöны, унаысь пö öти и сiйö жö сьыланкывйыс юргö. А кодкö и ошкö таысь - öтпыр пö и велöдам, и кывъяссö гижны удитам.

Матыстчылi Лидия Логинова дорö, юалi, кутшöмöн эськö сiйö кöсйö аддзыны радионымос, да возиис лöсьöдны сьыланкывъяс велöдан передача. Ачыс и босьтчис нуöдны «Кодыр сьывсьö» уджтассö, шойччан лунъясö сiйö юргö. Куим передача нин, «Зильзёль», «Тулысын му вывтi ветлöдлö любов» да «Гудöкъяс» сьыланкывъясöн, дась. Водзö уджтасыс и сэки миянöс кывзысьяс вермасны сьывны радио пыр Лидия Петровнакöд öтлаын.

«Йöзöдлытöм кывбуръяс» передачалысь мöвпсö вöзйис миянлы Галина Бутырева. Луннас некымынысь эфирын поэтъяс лыддьоны кывбуръяссö. Гижим нин асьсö Галина Васильевнаöс, Анжелика Елфимоваöс, Алёна Ельцоваöс, Василий Лодыгинöс, Нина Куратоваöс, Виктор Напалковöс. И водзö на мöдам гижны. Бöрас кöсъям йöзöдны кывбуръяса аудиосборник.

- Виктория Вячеславовна, «Коми мунымöс» лыддьысьяс газетö письмöаныс элясьлöны, лоис пö нач коми кывъя радио, а кывзынысö от вермöй. И збыльысь öд тадзи.

—«Коми йöзкостса радио» позьö кывзыны, радиоприёмниклысь коймöд кнопкасö кö личкыштан. Но куим программаа провода радиоыс абу быдлаын. Эм Сыктывкарын, Сосногорскын, Сыктыв да Изьва вожъясса унджык сикт-грездын. А, шуам, Кöрткерöс да Кулöмдiн районъясын куим-ö-нёль сиктын сöмын. Кöнi эм позянлуныс нюжöдны провода радиосö, вермасны та могысь шыöдчыны связистъяс дорö.

Апрель 17 лунсянь «Коми йöзкостса радио» кывзöны и республикаын да Россияын, и суйöр сайын öтуввезлöн www.krtk.ru да www.media.parma.ru лист бокъясö пыралысьяс. Oтуввезйö петöмыс кыскас и том йöзöс, тшöтш и школаын велöдчысьяслы позяс кывзыны коми уджтасъяс.

-Кывлi, неважöн нуöдiнныд «Быд керкаö - радио» акция. Кутшöм могъясöн нö?

-Тайö акцияыс мунiс март 10 - апрель 10 лунъясö. Oти-кö, кöсйим паськыдджыка юöртны, мый эм сöмын комиöн сёрнитысь «Коми йöзкостса радио». Мöд-кö, сьöкыд ньöбны куим программаа радиорепродуктортö. Ми козьналiм найöс «Вашкöдчыштам» да «Кöсъя тöдны» передачаясö звöнитчысьяслы. Тадзи миянöс кывзысьыс нöшта на содiс.

-Водзö кежлö кутшöм мöвпъяс коми радиолöн?

-Быд тöлысь миян выль уджтас чужö. Водзö вылö пондам дасьтыны и челядьлы передачаяс. Майын нин петас «Рытъя мойд» уджтас — посни войтырлы кутам мойдны. Сэсся лоöны и ворсана уджтасъяс, культуралы сиöм программа. Радио кывзысьяссянь тшöтш корам вöзйöмъяс - мый эськö найö кöсйöны кывзыны. Тшöкыда миянлы звöнитчöны, пырджык юалöмъясöн. Тайö квайт тöлысьнас уна нин «пöсь аттьö» кывлiм. Таысь муöдз копыр ставныслы.