08.05.2008 10:34
Евгений Степанович Канев уна во велöдiс челядьöс Вомынса школаын. Некор эз ошйысьлы, мый вöлöма Ыджыд война вылын.
Пенсия вылас петöм бöрын нин öтчыд вочаасьлiгöн ёнакодь варовмылiс. Висьталiс, мый Великöй Отечественнöй война вылö сiйöс босьтлöмаöсь 1943 воын. Веськалöма десантö. Мойвилöма сылы чеччавны парашютöн и вöрöглöн тылö.
А сэсся налысь часьтсö ыстöмаöсь Венгрияса Будапешт дорö, кöнi 1945 вося январь тöлысьын мунöмаöсь вир кисьтана косьяс.
—Быттьö и зэв нин матын вöлi Победаöдз, но Венгрияын немечыд пинь-гыжнас кутчысис, эз кöсйы сетчыны, — казьтывлiс вöвлöм фронтöвик. — Мадьяр мусö вöлi тшöтöма эсэсовецьяслöн дивизияясöн. Вöрöглöн киын уна на вöлi и пушка-танкыд. Дерт, ломтас-мавтас тырмытöм вöсна сьöд креста танкьяс да самоходкаяс эз вермыны пырöдчыны тышö. Но немечыд косясис мудера: став лыйсян техникасö сюйöма муö, танк-самоходкаяссö нöшта и цементируйтöмаöсь. Башняясыс сöмын бергалiсны да быд пöрйö öрудиеяссьыс грымгисны-лыйсисны. Сэки миян вель уна сапдат-офицер пуктiс юрсö венгр му вылын.
—Будапешт дорын косьясыс зэв дыр кыссисны. Медбöрын босьтiм жö карсö, сэсся водзö вöтлiм немечтö, — казьтывлiс Евгений Степанович.
Комиысь зон повтöма нöйтöма немечöс Секешфехервар, Папа да мукöд мадьяр кар мездiгöн.
Евгений Степанович вайöма мездлунсö тшöтш и Австрияса войтырлы. А Победа бöрын бергöдчöма чужан сиктас. Кызвын кадсö сэсся школаын челядьöс велодiс, нуодiс черчение да труд урокьяс. Прöст кадас войнаса ветеран радейтiс вöрö ветлыны вотчыны. Тшöкыда вöлi аддзылан татшöм серпас: мöдлапöлысь ветки пыжöн вуджö киас кöрзинаа, неыджыд тушаа морт, кайö кыр йылö. Неуна сэнi шойччыштö, а сэсся нин восьлалö гортланьыс.
...Матö дас во сайын эновтiс таладор югыдсö Евгений Степанович Канев. Но вомынсаяс пыр кутасны казьтывны сiйöс бур кывъясöн.
Автор:
Миян корр. Кoрткерoс р.
Источник:
Газета "Коми му" (Республика Коми) от 8 мая 2008 года
