Став юöрсö комиöн (на коми языке)

Республикаса войтырöс доръян да виччысьтöмторйысь видзан комитет лэдзис коми кыв вылын челядьлы небöгö пуктан пас. Сiйöс дасьтiс тайö комитетсьыс юöр сетан юкöнын уджалысь Елена Лодыгина.

Небöгö пуктан пассö вöчöма 1-8 классъясын велöдчысьяслы. Челядь сэтысь уна выльсö тöдмаласны. Шуам, мый оз ков вöчны уличын, кыдзи видзчысьны омöль йöзысь, скöр понйысь... А колин кö гортад ДЗИК OТКOН, МЫЙ 03 позь вöчны? Матын нин сiйö кадыс, кор зонпосни дугдасны велöдчыны. Жар пöрасö найö кутасны коллявны ю да ты дорын, ветласны и вöрö.

Танi жö гижöма и телефон номеръяс, кытчö колö звöнитны, виччысьтöг кö суас ускöттьöыс.

Елена Лодыгина пасйис, мый небöгö пуктан пасыс челядьлöн пыр син водзас. Восьтiс велöдчысь книгасö, и син водзас став колана юöрыс. Oтчыд дай мöдысь лыддьöм бöрын став вöзйöмторйыс кольö вежöрас.

Республикаса войтырöс доръян да виччысьтöмторйысь видзан комитет гожöмнас котыртлö ныв-зонлы безопасносьт школа, «Том спасатель» лагерь. Содтöд на быд во комитетлöн велöдан шöринын нуöдöны «Восьса öдзöс» акция. Сэки тайö велöдчанiнас волывлöны Сыктывкарысь да республикаса мукöд кар-районысь велöдчысьяс. Найöс тöдмöдöны спасательяслöн уджöн, оборудованиеöн, техникаöн. Быд татшöм аддзысьлiгöн овлöны конкурсъяс. Вермысьяслы и козьналöны небöгö пуктан тайö пассö да мукöдтор.