Ворсöны ас сиктын олысьяс (на коми языке)

Абъячойса театрлы таво тыри 70 во. Тайö тшупöда пасыслы и сиисны быд вося театральнöй вежонсö, кодöс нуöдiсны апрель 25 лунсянь.

Луздор районса юралысьлöн администрациябердса изобразительнöй да декоративно-прикладнöй творчество шöринын котыртлiсны ыджыд выставка. Сэнi петкöдлiсны важся снимокъяс, Абъячойса театрлöн да Виктор Савин нима драмтеатрлöн история  йылысь  гижöдъяс. Та пöрйö жö нимöдiсны и «История театральной и музыкальной культуры Республики Коми. XX век» выль книга. Сэнi висьтавсьö нималана драматург Н.Дьяконов, народнöй артист да  режиссёр И.Аврамов, а сiдзджö И.Суханов, Л.Ильчуков, В.Худяев, Г.Горчаков, В.Есева, Г.Трофимова, Д.Багин йылысь, кодъяслöн творческöй туйыс заводитчылiс буретш Абъячойса колхозно-совхознöй передвижнöй профессиональнöй театрын.

1984 восянь Г.Д.Горчаков нима Абъячойса народнöй театрöн веськöдлö Коми Республикаса заслуженнöй уджалысь, В.Савин нима госпремияа лауреат Сергей Чуркин. Тавося юбилейнöй сезонö С.Чуркин пуктiс Лев Толстойлöн драма серти «Власть тьмы» спектакль. Лев Николаевич тайö драмасö гижис 120 во сайын нин, но сiйöс пыр на окотапырысь лыддьöны. И спектакльсö видзöдысьясыс вылö донъялiсны, зэв бура ворсiсны накöд öти сиктын олысь-уджалысьяс да.