Öтлаын сöвмам да кыпалам (на коми языке)

13.05.2008 09:47

Дас кыкöдысь нин Кöрткерöсса администрацияö чукöртчылiсны енбиа челядь. Тайö «вит» вылö велöдчысьяс, спортсменъяс, киподтуя войтыр, сьылысь-йöктысьяс. Ставыс нелямын гöгöр морт.

Юрсиктö волiсны Шойнатыысь, Пöддельнöйысь, Висерысь, Ыджыдвиддзысь, Одыбысь, Мордiнысь, Намысь да районса мукöд сиктысь бура велöдчысь да киподтуя ныв-зон. Пöся чолöмалiс найöс районса юралысь Евгений Мамонтов. Быдöнлы вичмисны и сьöлöм шонтана кывъяс, и дипломъяс да сьöм.

Школаын бура велöдчысьяс оз сöмын урокъяс да олимпиадаяс вылын ассьыныс тöдöмлунсö петкöдлыны, но и пырöдчöны спортö да культураö. Вермывлöны республикаса да войтыркостса ордйысьöмъясын.

2008 восö шуöма Семья воöн да та вöсна унаöн волiсны бать-мамныскöд. Аддзысьлöмыс вöлi зэв кыпыд. Помас нин Евгений Мамонтов шуис: «Зэв бур, мый унатор нин шедöдiнныд. Сиа и водзö водзмöстчыны. Лача кута, верстяммöм да профессия босьтöм бöрын мöданныд зiльны ас районын. Oтлаын водзö сöвмам да кыпалам».

Автор: Любовь Кирушева
Источник: Газета "Коми му" (Республика Коми) от 13 мая 2008 года