13.05.2008 09:48
Бать-мам кöсйöны, мед челядь быдмисны вежöраöсь, унатор тöдысьöсь, вежавидзысьöсь. Кыдзи тайöс вöчны?
Дерт, аслад примерöн. Туй дöм-вел öдöмöн. Сэк жö бур отсöгöн лоöны и небöгъяс. Челядь дырйи лыддьöм небöгъястö нэм помöдзыд он вунöд. Маршак нима национальнöй библиотека дасьтiс «Книжный мир семьи» уджтас. Библиотекаын зiльысьяс тшöкыда ветлöны детсадъясö да школаясö, котыртлöны челядьлы да налöн бать-мамлы аслыспöлöс гаж и библиотекаын. Неважöн нуöдiсны «Мама, папа, я - читающая семья» фотоконкурс.
Воис сё сайö снимок, кöнi кианыс небöга зонпосни асланыс бать-мамыскöд да пöль-пöчыскöд. Унаöн ыстiсны быдса альбомъяс, гижисны кывбуръяс, медым на пыр петкöдлыны, кутшöм тöдчана небöгыс налöн семьяын.
Вермысьяснас лоины Штаркъяслöн, Кошманъяслöн, Брусовъяслöн, Новиковъяслöн да Ишковъяслöн семьяяс. Найöс нимöдiсны кыпыда, котыртлiсны ыджыд гаж. Волiсны уна челядь асланыс бать-мамыскöд, велöдысьяскöд, воспитательяскöд.
—Мамöй кöть и мудзö удж вылас, небöгтö меным быд рыт лыддьö, — висьталiс Уля Гудина, кодi детсадйö на котралö да лыддьысьнысö ачыс оз на куж.
А Никита Гулигузовлöн батьыс уджалö мöд карын. И виччысьнысö зонка оз вермы, кор бара на сiйö гортас волас. Тайö кадыс налöн семьяыслы медся шуда. Торйöн нин Никиталы, сы вöсна мый рытъяснас батьыс лыддьö сылы небöгъяс.
Конкурс вылö воöм снимокъясысь библиотекаын вöчöмаöсь выставка.
—Сэтшöм бур фотографияяс! Меным зэв ёна воисны сьöлöм вылö, — висьталö ичöт классъясын велöдысь Наталья Ефанова. — Любö, кор аддзан снимок вылысь öтлаын лыддьысьысь зонпосниöс да налысь бать-мамсö. Бур йöзöн быдмасны тайö челядьыс.
Унаöн на пиысь, кодъяс тöдмасьöны тайö выставканас, книгатöг библиотекаысь оз нин петны.
Источник:
Газета "Коми му" (Республика Коми) от 13 мая 2008 года
