Пожöг вожыс сетiс вынсö (на коми языке)

Он и тöдлы, кольöны вояс. Сöмын аслад олöмысь гöгрöс тшупöдъяс пасйигöн казялан налысь мунан öдсö. И нимкодь овлывлö сьöлöм вылад, эм кö мый казьтыштны, мый йылысь висьтасьны. Збыльысь, унатор йылысь казьтылiсны столяр Николай Алексанарович Поронинлöн бур ёртъясыс да матыссаясыс Эжваса коми культура шöринын сылы 55 арöс тырöмсö пасйигöн.

Сыктывдiн районса Шыладор сиктын чужлöм-быдмылöм тайö мортыс нималö оз сöмын кужысь киясöн. Медводз сiйö талун уналы тöдса аслас корсьысьöмьясöн. Дас кымын во сайын Н.А.Доронин босьтчис туявны Доронин ова йöзлысь вужьяссö. Сёрнитiс рöдвуж войтыркöд, корсьысис архивьясын, ветлiс весиг Москваö. Кыдзи висьталö, чукöртöма аслас ордпуысь 235 ов да гижöма 1.343 морт йылысь. Сылöн рöдвужыс талун олöны Коми Республикаса став районын, Россияса уна обласьтын, Москваын, Санкт-Петербургын, Болгарияын, Германияын, США-ын. А сэсся авторлон петiс аслас ордпулы сиöм торья небöг. Сiйöс отсалiс лэдзны и Коми Республикаса Юралысь Владимир Торлопов, кодлöн батьыс Шыладорысь жö петлöма.

Таысь öтдор Николай Александрович гижö неыджыд висьтьяс, кодъясöс йöзöдлывлö «Коми му» да «Йöлöга» газетьясын, «Чушканзi» журналын. Сылöн петiс торья небöгöн и «Шондiбанöй-олöмöй» поэма, кöнi автор висьтасьö аслас олöм йылысь. Тайö луньясö Н.А.Доронин лэдзис нин «Сказ о родной земле». Чужан му йылысь висьтасьöм» витöд небöг. Сiйöс дасьтiгöн Николай Александрович выльысь видзöдлiс чужан мулы, аслас ордпулы сиöм коркöя гижöдьяссö, унатор стöчмöдiс, пыртiс выльясöс.

Лыддян небöгсö да син водзад сувтö Пожöг юлöн шуйга берег вылö пуксьöм важся Шыладор сикт. Сэнi олысь зiль да енбиа войтыр пöвстысь петiсны нималана гижысьяс, повтöм воиньяс, бур врачьяс, инженерьяс, велöдысьяс. Тайö йöзыскöд и тöдмöдö автор.

Сэк жö Н.А.Доронин оз вермы веськодя видзöдны сы вылö, мый гажа Пожöг юлöн берегьяс пöлöн пуксьöм сикт-грездьясын бöрья кадö олöмыс оз ёна бурмы. Томджыкьяс мунöны татысь бокö, гортаныс уджыс абу да. Чужанiнас кольччöны сöмын олöмаяс. Кöть эськö Пожöг вожö нюжалiс асфальта туй. А кутшöм мича танi вöр-ваыс! Со и вöвлöм олысьясыс стрöитöны чужанiнас дачаяс. Николай Александрович зэв ёна эскö, мый буретш найö отсаласны бöр кыпöдчыны Шыладорлы да сыкöд орчча сикт-грездлы.

Уна бур кыв вöлi висьталöма Н.А. Доронинлы олöмас гöгрöс тшупöдсö пасйигöн. Казьтыштiсны и сы йылысь, мый Николай Александрович да школаса велöдысь Анна Ивановна быдтiсны Александр пиöс да Людмила нылöс, кодьяс быдторйын отсалöны бать-мамыслы. А Н.А.Доронин оз кöсйы сувтны шедöдöмтор вылас, водзö туялö Шыладор сиктлысь, аслас ордпулысь историясö, гижö аслас поэмаö содтöд юкöньяс. Сылöн гижöдьясыс йиджöмаöсь чужан му да ас войтыр дiнö помтöм муслунöн. И мед жö тайö муслуныс отсалас Н.А.Доронинлы чужтыны выль да мича гижöдьяс.