Снимок, рисунок, карикатура... (на коми языке)

...Помасьöны 20-öд вояс, заводитчöны 30-öд вояс. Oнiя Киров нима да Коммунистическöй уличаяс вомöнасянiнын сулалö пу керка. Танi уджалö «Югыд туй» газетлöн да «Ордым» журналлöн редакция. Сёрöнджык танi жö уджалiсны «Коми сикт» да «За новый Север» выльöн котыртöм газет редакцияяс. Танi жö уджалö и Коми госиздат.

Дас сайö газетчик да журналист вöчöны газетьяс да редактируйтöны медводдза коми книгаяс. На пöвстын том йöз: Изьюр Иван (И.В.Изьюров), Выль Паш (П.А.Шеболкин), Василий Елькин, Педь Гень (Г.А.Федоров), Сандрик Ёгор (Е.А.Шахов), дзик том Ананий Размыслов.

Редакцияö частö волывлiс Нёбдiнса Виттор. Сiйö вайлывлiс ассьыс кывбурьяс, фельетоньяс.

Неыджыд комнатаын — редактор. Тайö вояс чöжöн найö унаысь вежсьывлiсны. Первойсö уджалiс Н.А.Шахов, сiйöс вежис И.А.Меньшиков, некымын вочöж редакцияöн юрнуöдiс Н.П.Попов.

Тайö воясас ме веськöдлi издательстволöн да редакциялöн художественно-графическöй отделöн. Менам мог—сетны газетьяслы снимокьяс, карикатураяс, рисунокьяс, отсавны мичмöдны газетьяссö. Кокни шуны—сетны, но сэки эз на вöв асланым цинкография. Та вöсна ковмис пöльзуйтчыны дась клишеясöн, кодьясöс мöдöдавлiс Москвасянь «Пресс-служба». Регыд лöсьöдiсны и ассьыным цинкография. Oнi газетьяслöн лои позянлун иöзöдны татчöс снимокьяс да рисунокьяс. Но и сэки на эз вöв кокни. Эз на вöвны велöдчöм фотокорреспондентьяс, уджалiсны сöмын любительяс, кодьяслöн вöлiны зэв гырысь омöлик фотоаппаратьяс. На лыдысь чужисны медводдза «фотокоръяс», кыдзи найöс сэки шулiсны. Найö велöдчисны öтамöдыслысь, уджалiсны ас вöчöм проявительясöн да тадзи вöчалiсны газетьяслы фотоснимокьяс.

Бур кывйöн колö казьтывны тайö медводдза коми фотокорреспондентьяссö, кодьяс став сьöкыдлунсö венöмöн ас кадö вöчисны газетлы колана материальяс. Татшöмьяс лыдö пырöны сэтшöмьяс, кыдзи этша сёрниа, но зiль уджалысь Василий Семёнович Исаков, а сэсся Ермолин, кодi локтiс уджавны татчö сёрöнджык да кутiс сетны газетлы зэв бур снимокьяс.

Миянлы отсасисны районьяссянь Трошев, Коняев, Боярченко. Луздорсянь мöдöдалiс снимокьяс Порошкин, а Сыктыв районсянь Морозов.

Медым отсыштны татчöс фотографьяслы, ми вöчалiм «Пресс-фото» клишеяс вылысь да асланым фотографияяс вылысь оттискьяс. Сэсся видлалiм тайö снимокьяссö. Тадзи зiлим велöдны фотокорреспондентьясöс, кыдзи колö снимайтчыны, кыдзи лöсьöдны кадрсö да с.в. Ковмис велöдчыны быдторйö.

Газет эз вермы петны и художникьястöг. Юргижöдьяс, заставкаяс, агитрисунокьяс, медбöрын, карикатура, кодi сiйö воясын заводитiс босьтны пыр ыджыдджык тöдчанлун—ставыс тайö колö вöлi газетлы. Ставыс тайö требуйтiс специалистьясöс, газетнöй художникьясöс. А сэкся кадö сэтшöмьясыс эз вöвны.

20-öд вояс помын вель уна карикатура вöчис любитель-художник Арнольд Гелфельман. Найöс вöлi вöчöма циркуль да линейка отсöгöн. А йöзыс виччысисны бурджык рисунокьяс.

30-öд вояс заводитчигöн газетын заводитöны сотрудничайтны Коми госиздат бердысь ИЗО кружокын участвуйтысь том йöз. Тайö—Валерий да Владислав Крюков вокьяс, Николай Проскуряков, Николай Оплеснин. Найö велöдчисны Сыктывкарса техникумьясын, но уджалiсны и печатьын: вöчалiсны газетьяслы юргижöдьяс да заставкаяс, агитрисунокьяс, мичмöдiсны коми книгаяс. Сёрöнджык заводитiс уджавны художник Михаил Павлович Безносов, кодi воис издательствоö велöдчöм бöрын.

30-öд вояс заводитчигöн карикатура босьтö миян газетьяслöн лист бокьяс вылын вель ыджыд места. Асывсянь редакторьяс индылiсны тема, а 11-12 час кежлö колö вöлi карикатурасö сдайтны цинкографияö, медым клише вöлi дась рыт кежлö, газетлöн аскиа номерö. Тайö вöлi сьöкыд, но интереснöй удж.

Нэм кежлö колисны паметьö бур казьтылöмьяс В.А.Савин, Н.П.Попов, П.Г.Доронин, И.И.Оботуров, З.А.Старцев да уна мукöд йылысь, кодьяс сiйö воясö лэдзисны коми газет.