Кытчö бара шыбöлитас-а? (на коми языке)

Oнiя олöмын унатор шензьöдö. Серпаскудйысь позьö видзöдны быдсяматорсö, радио мыйсö сöмын оз висьтав и. Весигтö унаторйö сьöкыд вöлi эськö эскыны 10-20 во сайын на. Висьтала со мый йылысь.

Таво урасьöм тöлысь 27 лунö ветлi республикаса филармонияö «Асья кыа» котырса хорлöн концерт вылö, важöн нин коми сьыланьяссö налысь эг кывзыв да. Сьылiсны важ репертуарсьыс нёль коми сьыланкыв, и ставыс! Водзö пондiсны ливкйöдлыны вичко сьыланьяс рочöн, сэсся вуджисны роч попсаö, а бöрас нин кутiсны сьывны мудорсайса кывьясöн, «Бесамемучо» да «Естэдэй» роч акцентöн шняпуритiсны. Кытчö бара шыбöлитöма коми сьылан паськöдан ансамбльнымöс? Этша öмöй кылам рочöн да англия-италия кывьясöн быдласянь нин? А мыйла эськö öнiя коми зэв юргана сьыланкывьяссö оз сьывны? Со тай Кулöмдiнын «Василей» гажыс дас витöдысь нин пансьылöма, мыйта мелi шылада сьылантор сэнi чужöма? Мый вöчсьö «Асья кыаас»?

Серпаскудйысь öнi коми сёрниыс кылö зэв этша, быд лунья уджтасыс сöмын кык—«Талун» да «Сёрни-басни». Баснисö кылан 4-5 минутысь он дырджык, коми йöз быдсямасö висьтавлöны. Тайö бур нин. А вот «Талун» уджтасас зэв шоча сёрнитöны ас кывйöн, век рочöн шарöдöны. Асьныс жö нуöдысьясыс вель тшöкыда медся прöст да бергалана коми кывьяссö, тыдалö, вунöдöны. Али оз нин тöдны, кыдзи коминас шусьö крыша, разберитны, избиратепьнöй участок. Рака тöлысь 21 лунся «Талун» уджтасысь шогöдiс. Нуöдысьыс, том морт, университет помалысь, син лапниттöг шуис: «Козинöн аньяслы лои сунислöн нёль моток»; «Данияысь пловечлöн лои сереброысь медаль». Со и воим—сунис тупыль, варччысь да эзысь медальтö лои сьöкыд шуны. А гашкö, уджтассö бöрья здукас комиöдöны код тöдас кутшöм тöдöмлуньяса йöз? Коми кыв тöдысь видзöдысьлы тайö шыбöлясьöмыс пинь дой кодь: висьö-юкапö, а бурдöдчаныс абу.

Вайö, журналистьяс, энö нин янöдöй ассьыныд велöдысьяснытö, уна йöз водзад колö комиöн сöстöма, дерт, сёрнитны. Татшöм удж кö нин бöрйинныд.

Дай рочнас кыдзсюрö сёрнитöны. Шуам, зэв тшöкыда миян Коми Республикаöс öнi шуöны регионöн, республикаса Юралысь пыдди—губернатор региона. А öд тайö каналан каналын уджалысьяс паськöдöны абутöмсö. Россияса Оланподув серти, федерациясö артмöдöны республикаяс, дормуяс (крайяс), обласьтьяс, автономияа кытшьяс да обласьтьяс, федерацияа тöдчанлуна кык юркар. Некутшöм регион кыв сэнi абу. А миян республикаын медыджыд мортыс юралысь, рочöн кö, глава. А гашкö, тадзи тöдöмöн вöчöны, дасьтöны ми вокöс öткодь балаа лöсьöдана кутшöмкö регионын нин олöм кежлö? Шыбöлясьöны, вермас лоны, тöдöмöн? А тэ кыдзи чайтан, коми лыддьысьысь?