Медым синмыд эз мытшась (на коми языке)

Неважöн тöдмасим Егор Рочевлöн «Кöрысь тэрыбджык» выль небöгöн. Сiйöс лыддьöм бöрын сьöлöм вылын эз ло долыд. Лыддигас синным кугiс мытшасьны кывъяс гижанног торкöмъясас.

И öвтыштiс кутшöмкö кöдзыдлун, коми кыв дорас веськодя матыстчöм, гижанног правилöяс кедзовтöм. «Коми орфографическöй словарь» небöгыс кöть и зэв нин важöн петалiс (1985 воö), век жö сэтчö пыртöм гижанногсö некод на эз кирит-бырöд, сы вылö пыр на мыджсьылiсны. Е.Рочевлысь небöгсö йöзöдысьяс кö шыöдчисны тайö орфография кывкуд дорас, эз эськö петны татшöм öшыбкаясыс: гожöм быд (77 л.б.), няньтор (кусöк) (6 л.б.), вутшьюр (32 л.б.), тöвныр (78 л.б.), сир пиян (84 л.б.), асногыс (91 л.б.), туйбоксьыс (105 л.б.), сьылидзир (107 л.б.), ичöт дырйи (102 л.б.), том дырйи (45 л.б) да с.в.

Колö-ö торья тöдчöдны тыр-бур гижанноглысь коланлунсö? Oд ставлы тöдса, мый, öти-кö, грамотнöя гижöм текстсö лыддьысьыс бурджыка гöгöрвоö; мöд-кö, сэтшöм текст сертиыс велöдчö ачыс грамотнöя гижны, кыпöдö сёрни да гижан культурасö, зiльö видзны кывйыслысь сöдзлунсö. А öшыбкаяса гижöд оз вылö и доньявсьы. Сы серти петкöдчö, мый гижысьыс сiдз-тадз тöдö и оз зэв пыдди пукты коми кывлысь грамматикасö. Oд став кывйыслысь гижанногсö подулалöма коми кыв шыкуд, кыввор, кыв тэчас, кыв артманног нормаясöн.

Коми кывьяслысь гижанног туялöмыслöн, нормаяс лöсьöдöмыслöн вужьясыс ёна пыдынöсь. Медводдза воськовьяссö таиö уджас вöчисны нималана коми кыв туялысьяс В.А. Молодцов, В.И.Лыткин, И.И. Разманов да мукöд. 1930 воö петiс И.И.Размановлöн медводдза «Коми орфография кывöктöд» небöг, кöнi вöлi сетöма гижанног правилöяс, индöма шöр подувьяссö.

1939 воö петiс «Орфографический словарь коми языка», кодi лои подулöн сёрöнджык йöзöдöм кывкудьяслы. Коми орфография сöвмöдöмö ыджыд пай пуктiсны А.И.Подорова, М.А.Сахарова.

Тайö уджьясыслöн тöдчанлуныс зэв ыджыд, öд лои пуктöма зумыд подув коми гижанноглы коми кыв сёрни шыяслысь, кывворлысь, грамматикалысь аслыспöлöслунсö тöд вылö босьтöмöн.

Бöрья «Коми орфографическöй словарсö» вöлi йöзöдöма 1985 воö. Лöсьöдiсны сiйöс М.А.Сахарова, Р.И.Коснырева да Н.Н.Сельков. Сэнi сетöм кыв гижанногьяс вылö мыджсьöны и öнi.

Но кузь кадколастнад унатор вежсис: чукöрмис кыв материал коми гижанногöн вöдитчöм боксянь; уна кыв гижанног вылö лоис выль видзöдлас; петiсны коми грамматикалöн выль небöгьяс, кöнi мöд нога доньявсьöны кыв тэчас, кыв йитöдьяс, кыв формаяс да кыв артманног; сöвмис паськыд выль кыввор. 1999 воö Коми Республикаса уна сикас войтыр министерство бердын котыртöм кыв комиссия стöчмöдiс да вынсьöдiс рочысь пырöм кывьяс гижанног. Вынсьöдöм правилöяссö вöлi йöзöдöма 1999 вося 4-öд номера юöр гижöдын.

Коми орфография мыджсьö медводз коми кыв фонетика законьяс вылö. Тайö тöдчö й, к, м, т шыяслöн да нуль звук, лив кывьяс гижанногын да пив вежласян шыяса кывьяс гижанногын.

Кывлысь гижанногсö тöдчöдiгöн, лöсялана правилööн вöдитчигöн колö кутны тöд вылын: кыввора вежöртассö, шуам, кутшöм шыпас гижны с(?)сь кывйын; кутшöм кывсикасö пырö кывйыс, шуам, мукöд(дырйи), и сы серти гижны торйöн либö öтлаын; кутшöм морфемаясысь артмöма торьякывйыс, шуам, гажö(?)чыны. Уна кывлöн гижанногыс подуласьö морфология вылö. Тайö петкöдчö аскодясян шыяса кывьяс гижанногын, шуам, вотчыны [воч"ч"ыны].

Кывьяс гижанногыс тöдчö и быд сикас кывкуд дасьтiгöн, шуам, гижам кö вом ёрт, сiйöс колö пыртны вом кыв словарнöй гижöдö, гижам кö вомъёрт, колö тöдчöдны сiйöс торья гижöдын.

Бöрья кадас чужис коланлун лöсьöдны выльмöдöм орфография кывкуд, кодi эськö шымыртiс став шедöдöмторсö, стöчмöдiс-зумыдмöдiс коми кывьяс гижанногсö наука боксянь подулалöмöн, бырöдiс правилöяссьыс тырмытöмторьяссö.

Вöзьян выльмöдöм кывкудйыс куим юкöна. Oти юкöнас, воддза кывкудьяслысь бур традициясö пыдди пуктöмöн, öтувтöмöн сетöма гижанног правилöяс. Лыддьысьысьлы тайö зэв лöсялö, отсалö тöдмасьны гижанног нормаяснас да вöдитчыны наöн, öд велöдчан небöгьясын гижанног правилöяссö йитöма велöдан темаяскöд, сiдзкö, сетöма разöдöмöн. Пыртöма сiдзжö комиöдöм кыв велöдан-туялан терминьяс.

Мöд юкöнас видлавсьö коми кывьяслöн шуанногыс.

Коймöд юкöнас торья кывьяссö сетöма колана гижанногöн. Юркывьяссö тэчöма анбур арт серти.

Воддза кывкудкöд (1985) орччöдöмöн кö, вöзьян кывкуд йöрышас эз пырны: «кокни» гижаннога кывьяс, рочысь пырöм, комилыдзик ладмытöм кывьяс, векниа вöдитчан сёрнисикас кывьяс. Подув, вужьясьöм нин гижаннога кывьяс кындзи пыртöма уна выль кыв, шуам, вомъёрт, уджъёрт, изэрд, шöртуй дас.в.

Вензян кывьяслысь пыртöма медся тшöкыда паныдасьлан гижанногсö, шуам, юръяндзим, сьöлöмкылöм, вомъёрт, кöть и паныдасьлö юр яндзим, сьöлöм кылöм, вом ёрт. Oтсяма тэчаса кывьяслысь гижанногсö öткодялöма, шуам, сьöлöмкылöм, ловкылöм, аскылöм; лöддза-номъя, одакора; бабаюр, нывъюр.

Лыддьысьысьяс аддзасны сiдзжö тöдтöм-гöгöрвотöм кывьяслысь вежöртассö тöдчöдöмьяс. Тайö сетас позянлун паськöдны-озырмöдны кывворсö. Кывкуд помын таблицаясын сетöма торьякыв формаяслысь гижанногсö.

Кывкудъяс вайöдöма системаö гижанног правилöяссö орфограмма сикасьяс сертиыс. Тöдчымöн чинтöма торья пасйöдьяслысь (исключение, примечание) лыдсö. Воддза кывкуд серти гижлiм карбердса, но Сыктывкар бердса, ме бердса. Татшöм тэчаса (кыв+кыв+суффикс) кывбердьяс вöзйöма гижны öти ног — öтлаын: эжвайывса олысьяс, асгöгöрса олöм. Аснимьясысь артмöмаяссö—ичöт шыпассянь: эжвабердса сиктъяс.

Вöзйöма торйöдны гижанногнас öткодя юргысь урчитаньяс да кывбöра тэчас: томдырйи, дзолядырйи, мукöддырйи и том дырйи, дзоля дырйи, мукöд дырйи (эн видчы). Стöчмöдöма гижанногсö урчитаньяслысь: лёкногöн (пöрны), серамсорöн да мукöд.

Рочысь пырöм кывьяс гижанног правилöяс сiдзжö стöчмöдöма, матыстöма коми шуанногдорö, шуам, шыяса кывьяс ь пастöг гижöм, кыдзи пöнар, пöнöмар: буквар — букварсö—букваръяс, звер да с.в.; сть шытэчаса кывьясын сьт гижöм: вöлöсьт, власьт, гöсьтца с.в. Тайö гижанногьясыс ёна нин пырöма-вужьясьöмаöсь.

Но эм торья видзöдлас и рочысь пырöм мукöд кывьяс коми шуанног серти гижöм йылысь: счёг, зачёт, почёт, учёнöй, счот гижны о шыпасöн, кыдзи и чорыд, чом да с.в. либö семья, копьё пыдди семъя, копъё.

Щ шыа рочысь пырöм став кывьяс гижны тш либö ш, кыдзи тшöть, тшель, тшöка кывьясын; гижны плаш, плашасьны; борш, боршевик; тьöшша, ешшö дас.в.

Тайö кывьяс гижанног серти сувтöны татшöм юалöмьяс: öти-кö, ёна-ö вöдитчöны тайö кывьяснас коми текстьясын, ёна-ö найö колöны; мöд-кö, оз-ö тайö пыртöмьясыс торкны-сьöктöдны рочöн гижöмсö.

Выльмöдöм орфография кывкуд дасьтысьяс шыöдчöны велöдысьяс дорö, коми кыв туялысьяс дорö, комиöн гижысьяс дорö и корöны мöвпыштны тайö юалöмьяс вылас.