27.05.2008 09:11
Комиöн сёрнитысь яранъясöс позис аддзывны кольöм вежонö Сыктывкарын да Кöрткерöс районса Лöкчимдiнын. Ненеч кытшысь «Илебц» («Олöм») театрын ворсысьяс волiсны Комиö искусствояслöн да йöзкостса творчестволöн «Финн-йöгра транзит: войтыръяслöн культура» фестиваль вылö Нимкодь, мый суседъясным тöдöны и миянлысь кывнымöс.
Фестивальсö нуöдö Россия Федерацияса финн-йöгра культура шöрин, да урчитöма сiйöс 2009 вося декабрöдз. Матö кык во финн-йöгра республикакытшъясысь творческöй котыръяс мöдасны волывлыны öта-мöд дорас да тöдмöдны рöдвуж войтырöс асланыс культураöн. А помасяс фестивальыс Москваын ыджыд концертöн, кытчö корласны медбур сьылысь-ворсысьяссö.
Но таöдз ылын на, öд Сыктывкарын фестивальыс вöчис медводдза воськов на. Шылада-драмаа театрса артистъяс дорö гöститны воисны Нарьян-Марысь уджъёртъясыс. Видзöдысьяс, кодъяс локтiсны сэтчö фестиваль воссян лунö, ассьыным артистъясöс бура нин тöдöны да вочаалiсны найöс, кыдзи и пыр, зэв пöся. И виччысисны, мыйöн жö найöс вермасны шензьöдны ненечьяс. А найö медводз, дерт, ас йывсьыныс висьтасисны. «Илебц» театрлы дас сайö во, веськöдлысьыс - Серафима Дуркина, режиссёрыс - Сергей Никулин. Став петкöдланторйыслöн подулас яран фольклор, и шöр могным пö - видзны да сöвмöдны чужан кывнымöс. Та вöсна и ворсöны век ненеч кыв вылын. Ас кытшас волöмаöсь нин кызвын сикт-посёлокас, гажöдöмаöсь Салехардса, Усинскса, Архангельскса, Москваса видзöдысьясöс, ветлöмаöсь и Норвегияö.
Сыктывкарса сцена вылын петкöдлiсны «Тундраын вöвлöмторъяс». Шаман отсöгöн лёк вынъясысь шондi мездöм, вильыш, кывзысьтöм нывкалöн лэбачö пöртчöм, пöрысь гöль гозъяöн абутöм нывсö верöс сайö сетöм йылысь серпасъясыс сэтшöма воисны видзöдысьяслы сьöлöм выланыс, мый ненеч артистъяс пыр жö и лоисны налы ас йöзöн. Но серамбана тешъяс петкöдлiгöн найö сяммисны тöдмöдны и асланыс эскöмъясöн, обычайясöн, оласногöн. Висьысь мортлысь олöмсö босьтны, вöлöм, волöны валöн, тöвлöн ловъясыс. А бурдöдны вермас шаман. Бурдöдас кö, дона куясöн мынтысьöны. Верöс сайö кö нывсö сетöны, а сiйö кувсьö выль семьяас, том верöсыс овмöдчö нылыслöн бать-мам ордын. И сусед войтырлöн олöмысь татшöм выльторсö позис уна тöдмавны.
А паськöм вывсьыс и синтö кöть эн вештыв: яръюгыд рöмъяса, мича серъяса, дона куяса. Татшöмнад и юртö вылын позьö кутны.
«Финн-йöгра транзит» фестиваль заводитчис Сыктывкарын. Май 22-23 лунъясö сiйö вуджис Кудымкарö, сэтчö жö мунiс и «Зильган турун» ансамбль.
Автор:
Павел Филимонов
Источник:
Газета "Коми му" (Республика Коми) от 24 мая 2008 года
