Нималана землякöс оз вунöдны (на коми языке)

Пальса шöр школаын татшöм аддзыслöмъясыс оз зэв тшöкыда овлыны. Неважöн сэтчöс велöдысьясöс да велöдчысьясöс аслас «Учёный-энциклопедист А.С. Сидоров» выль небöгöн волiс тöдмöдны культурологияса доктор, Сыктывкарса государственнöй университетысь философия да кулыурология кафедраса профессор, Коми муын йöзöс велöдöмлöн история музейса директор Майя Ивановна Бурлыкина. Школаын история музейö чукöртчöм войтырлы ыджыд гöстя висьталiс, кыдзи сылöн чужис небöгсö лöсьöдöм да гижöм йылысь мöвпыс.

Оз быд сикт вермы ошйысьны татшöм ыджыд нима мортöн. Филология наукаса доктор Алексей Семёнович Сидоров — учёнöй-энциклопедист. Сылöн научнöй корсьысьöмьясыс вöлi йитчöмаöсь литературоведениекöд, лингвистикакöд, археологиякöд, фольклоркöд, этнографиякöд, историякöд. Буретш тайö мортыс тöдмöдiс коми войтырöс медводдза коми поэт Иван Алексеевич Куратовлöн гижöдьясöн. Сiйö вöлi Комиын чужан му туялöмлы подув пуктысьöн, наука да велöдан учреждениеяс котыртысьöн. Таысь öтдор Алексей Семёнович гижис школаяслы да вузьяслы учебникьяс. Сетiс том йöзлы тöдöмлун Емдiнса, Айкатыласа, Яренскса, Усть-Сысольскса, Сыктывкарса, Ленинградса шöр да вылыс велöдчан учреждениеясын. Талун А.С.Сидоровлöн научнöй уджьясöн позьö тöдмасьны Россияса национальнöй, Россияса публичнöй, Россияса наукаяс академиялöн, Россияса художествояс академиялöн да

Коми Республикаса Национальнöй библиотекаясын, а сiдзжö Коми наука шöринса, СГУ-са, Коми пединститутса, Коми Республикаысь Национальнöй музейса, Коми муын йöзöс велöдöмлöн история музейса библиотекаясын.

Сiйö вöлi ыджыд енбиа мортöн, кодлöн зiль корсьысьöмьясыс ёна дöзмöдiсны ичöт мывкыда, удачатöм йöзöс. Буретш татшöмьясыс вöчисны ставсö, медым учёнöй веськалiс репрессиялöн изки улö. Тайö лои 1937 воын. Но сьöкыдлуньясыс эз чегны А.С. Сидоровöс. 1945 да 1947 воясö сiйö дорйис кандидатлöн да докторлöн нимьяс вылö диссертацияяс. Талун А.С.Сидоровлöн нимыс бура тöдса Россияса да финн-йöгра странаясса учёнöйяслы. Сылысь корсьысьöмьяссö вылö доньялiсны академикьяс Н.Я.Марр, И.И.Мещанинов, наукаса член-корреспондентьяс Д.В.Бубрих, Д.К.Зеленин, наукаса докторьяс А.И.Андреев, В.И. Лыткин, Н.Н.Поппе, А.А. Спицын, А.В.Шмидт да мукöд.

Но Алексей Семёнович эз коль ас йывсьыс дневникьяс ни казьтылöмьяс. Та вöсна сы йылысь небöг гижысьыслы, Майя Бурлыкиналы, ковмис ёна корсьысьны. Ыджыд отсöг сылы сетiсны учёнöйлöн нылыс Людмила Алексеевна Сидорова, Алексей Семёновичлöн ёртьясыс да велöдчысьясыс, а сiдзжö Пальысь чужан му туялысь Леонид Миронович Попов, Пальса школаын музейöн веськöдлысь Манефа Егоровна Туркина, учёнöйлöн матыссаясысь öти, уджвывса ветеран, народнöй просвещениеса отличник Эмилия Васильевна Ермакова. Небöг гижысьлы удайтчис восьлавны Алексей Семёновичлöн туйöд, волыны сылöн чужанiнö, Паль сиктö, а сiдзжö Тотьмаö, Вöлöгдаö, Емдiнö, Айкатылаö, Яренскö, Санкт-Петербургö, Москваö, Петрозаводскö.

Сюся кывзiсны Майя Ивановналысь висьтсö учёнöйлöн землякьясыс, Пальса школаын велöдчысьяс. Вермас лоны, кодкö на пиысь сiдзжö мöдöдчас А.С.Сидоровлöн туйöд да лоас ыджыд учёнöйöн. Пальсаяс оз вунöдны асланыс нималана земляк йылысь. Сылöн нимöн талун шуöма сиктса öти улича. Учёнöйöс пыр казьтывлöны ыджыд праздникьяс дырйи. Дерт жö, А.С.Сидоров водзö кутас нимавны ёнджыка на, кор лоö пыдiсяньджык туялöма наукаын сылысь корсьысьöмьяссö да стöча доньялöма найöс. И тайö уджас ыджыд пай пуктö Коми Республикаса заслуженнöй уджалысь, КР-са государственнöй премияа лауреат Майя Ивановна Бурлыкина, кодi гижис нин Россияын музейяслöн история, чужан му туялöм да региональнöй культура кузя 150 сайö научнöй удж, на лыдын монографияяс да велöдчан пособиеяс.