03.06.2008 10:11
Таво ассьыс гажсö "Би кинь" журнал нуöдiс Койгорт районын. Коми сиктыс сэнi сöмын куим — Грива, Ужга да Койгорт, но и роч челядьлöн бать-мамыс асланыс нылук-пияныслы судзöдöны "Би киньтö". Уна рöма журналыс да, воö сьöлöм вылас и коми, и роч зонпоснилы.
Тайö гаж кежлас журналын зiльысьяс "Би киньлысь" öти номер ставнас сиисны Койгорт районлы, йöзöдiсны сэтчöс нывкаяслысь да зонкаяслысь серпасъяс, кывбуръяс да висьтъяс. А медбур уджъяссö пасйисны козинъясöн. Челядьлы вичмисны чачаяс, небöгъяс, карандаш да акварель, уна мукöдтор. Чолöмалiсны челядьöс журнал вöчысьяс Алексей Попов, Владимир Моторин да Николай Тюрнин, национальнöй политикаса министр Валерий Коробов, мукöд газет-журналын зiльысьяс, районса да сикт-посёлокса веськöдлысьяс.
Праздниксö нуöдiсны Койгортса школаын. Волiсны став сикт-посёлоксьыс челядь.
Дасьтöмаöсь уна сьыланкыв, йöктöм, кывбур. Нуöдiсны гажсö районса коми культура шöринын зiльысьяс да Гриваса школаысь нывкаяс да зонкаяс. «Би киньсö» зэв мастера да збоя ворсiс коймöд классын велöдчысь Варя Бажукова, сылы отсасис нывъёртыс Зина Карманова. Нывкаяс журналсö судзöдöны жö. Торйöн нин ёна налы воöны сьöлöм вылас юржугланторъяс. И серпасавны радейтöны, но оз на лысьтны ыстыны ассьыныс уджъяссö редакцияö.
«Би кинь» журнал ассьыс медводдза гажсö нуöдiс юркарын 1995 воын. Сэки сiйö пасйис сёöд петас. Сэтшöма воис гажыс сьöлöм вылас и челядьлы, и верстьöлы, мыи чина йöз шуисны нуöдны сiйöс быд во республикаса тшупöдын. «Би кинь» ветлiс нин Усинск, Изьва, Кулöмдiн, Сыктыв районъясса челядь дорö. А мыйта на кытшовттöм! Локтан воö сiйö бара на лöсьöдчö туйö. Кытчö? А кытчö медводз корасны.
Автор:
Ника Алексеева
Источник:
Газета "Коми му" (Республика Коми) от 3 июня 2008 года
