10.06.2008 10:54
Кольöм во и таво миян газет некымынысь юöртлiс, мый Коми Республикаса национальнöй политика министерство нуöдö коми кыв вылын петысь газет-журналъяс костын, телевидениеын да радиоын уджалысьяс пöвстын «Эмöсь Комиын енбиа йöз» нима конкурс.
Вермасьöмыслöн шöр могыс—газет-журнальяслöн лист бокьясын, телевидениеын да радиоын гижны-петкöдлыны сэтшöм йöзöс, кодьяс сяммисны аддзыны асьнысö öнiя олöм-вылöмас, кужöны и сьывны-йöктыны, и пыжтö вöчны, и кысьыны, и серпасасьны, и кöрта кöлуйöн ноксьыны, и кывбур тэчны.
Конкурслы кывкöртöдсö вöчис торья жюри, кытчö пырисны коми гижысьяс, нималана журналистьяс, республикаса национальнöй политика министерствоысь, печать да юöр сетан агентствоысь уджалысьяс.
И со кутшöм кывкöртöд найö вöчисны. Вермасьöмын йöзöс бура петкöдлöмысь медводдза места шуöма сетны «Коми му» газетса журналистьяслы. Мöд места вичмис КРТК-са войтырлы «Менам дона сикöтшöй-ожерельеöй» документальнöй фильмысь (сиöма коми гижысь Нина Куратовалы, редакторыс Е.А.Хозяинова, режиссёрыс В.С.Пивкина).
Коймöд местаö петiсны «Йöлöга» газет вöчысь-лэдзысьяс. Жюри торйöн пасйис тайö газетса журналистьяслысь корсьысьöмсö, зiльöм-старайтчöмсö.
Республикаса конкурсö пырöдчöмысь, Эжва йывса енбиа йöзöс аддзöм-корсьысьöмысь ошкана козинöн жюри шуис пасйыны и Владимир Шомысовöс, Кулöмдiн районысь Пожöг шöр школаса велöдысьöс.
Конкурсын вермысьяслы вичмасны дипломьяс да дона козиньяс. Найöс сетасны «Коми му» газетлы сиöм гаж дырйи, кодi лоö Сыктывкарын тавося август шöрын.
Источник:
Газета "Коми му" (Республика Коми) от 10 июня 2008 года
