Велöдöны уджавны (на коми языке)

Финляндияса да Россияса финн-йöгралöн общественнöй котыръясын зiльысьясöс велöдан öтувъя уджтас збыльмöдсьö 2006 восянь.

Семинарьяс вылö волысьясöс тöдмöдöны оланпасьясöн да национальнöй политикалöн подувьясöн, войтырьяслöн олöмын котырьяслöн тöдчанлунöн да налöн уджапанногöн, висьталöны, кыдзи корсьны сьöмöн отсалысьясöс, кутны йитöд журналистьяскöд, дасьтыны грант шедöдан уджтасьяс.

Май помын Россияса Президент бердын Коми Республикалöн представительствоын чукöртчылiс тайö проектнас веськöдлан котыр. Сэтчö пырöны Финляндияысь Мерья Ханнус да Маркку Туркиа, Коми Республикаысь Валерий Марков, Удмуртияысь Татьяна Ишматова, Марий Элысь Галина Шкалина, юрнуöдö уджтаснас Сейя Лаало-Ристиля (Финляндия), секретарыс - Алексей Конюхов (Коми Республика). Найö видзöдлiсны, мый вöчöма 2006-2008 воясын да индiсны 2009-2010 вояс кежлö шöр могьяс.

Сёрнитiсны и сы йылысь, медым уджтас збыльмöдöмö ыджыдджык пай пуктiсны финн-йöгра да национальнöй культураяслöн шöриньяс, Россияса регионьясысь творческöй котырьяс. Та йылысь висьтасисны Россияса финн-йöгра культура да Волгабердса финн-йöгра войтырлöн культура шöриньясса веськöдлысьяс Светлана Белорусова да Юрий Мишанин.

А матысса семинарьяс вылын котырьясын зiльысьясöс велöдасны грант шедöдан проектьяс дасьтiгöн стöча индыны, мый вылö корсьöны сьöмсö да кыдзи артавны уджтаслысь бюджетсö, кутшöм ногöн пöртны сiйöс. Видлаласны и национальнöй общественнöй котырьяслысь уджсö, юксясны ас дораныс выль йöзöс сибöдöм да мукöд странаысь да регионысь котырьяскöд йитöд лöсьöдöм йылысь мöвпьясöн.