А кодi ышöдас-туйдас? (на коми языке)

"Коми войтыр" öтмунöмлысь Сыктывдiн районса юкöнысь нырщикъясöс, чайта да, колö ошкыштны. Шуам, Н.И. Чувьюровöс, Э.А. Налимоваöс, О.А. Лаженцевöс. Медводз, водзмöстчöмсьыныс. Со бара на Выльгорт сиктын котыртлiсны "Коми кыв видзöм да сöвмöдöм" йылысь "гöгрöс пызан" сайын сёрни. Тöдчöда, сыктывдiнсаяс вöзйöны йöзöдны коми кывлысь во. Велöдчан небöгыс оз тырмы

Коми кыв сöвмöдöм йылысь сёрнитöма да гижöма зэв нин уна. Дöнзьытöдз лои, но доддьыс, кыдз шуласны, некыдз оз вöрзьы. И став помкасö öдвакö лыддьöдлан.

Тайö чукöртчылöм дырйиыс Сыктывдiн районса администрацияысь образование отделын уджалысь Валентина Чугаевалöн висьтасьöмысь шогöдiс. Да асьныд со мöвпыштлöй. Районас коми кывсö, кыдз предмет, талун велöдöны квайт велöдчанiнын 365 ныв-зон. Нöшта 10 школаын 1.900 роч зонпосни сiйöс велöдöны. Челядькöд уджалöны коми кыв да литература кузя 46 велöдысь. Ставыс тайö, дерт, бур. Но чужан кыв да литература кузя учебникнас   вöлöм могмöдöма сöмын Сыктывдiнысь 82 прöчент челядьсö. Oнi коми литература, шуам, велöдöны ... 1994 вося уджтас серти. Но мый татчö содтан?

Валентина Николаевна пасйис:

— Ме велöда Пичипашняса челядьöс. Классын 19 нывка да зонка, а велöдан небöгыс сöмын 11-ыслöн. И öд вузöсын абу. Сэк жö мукöд предмет кузя учебниксö позьö ньöбны. Уджалан тетрадьыс оз жö тырмы. Oнi  коми кывсö роч челядькöд велöдам вежоннас кык час, а кольöм нэмся на 90-öд воясас та вылö вöлi урчитöма куим час. Сэсся коми кыв урок нуöдiгöн кпассö юкны оз позь. А английскöй либö французскöй кыв велöдiгöн тай юкöны...

Республикаса Юралысь бердын искусствояс гимназияын велöдысь Лидия Зварич содтiс:

— Миян гимназияын татшöм жö серпасыс. Небöгыс оз жö тырмы. Коми литература кузя учебникыс важ.

Чукöртчылöм дырйиыс нöшта чуймöданатор висьталiсны. Республикаын нуöдöны «Райда» конкурс, кöнi бöрйöны медся мича да авъя коми нылöс. Сыктывдiнын жö оз вермыны вöлöм чужан кывсö бура тöдысь аньяссö аддзыны.

Йöзыс эскисны

Помнита, во кызь сайын Сыктывкарса öти детсадйын заводитiсны вужйöдны чужан кыв. Торъя пельöсын вöлi мыйкö неыджыд музей сяма. Сэтчö вöлi чукöртöмаöсь важся эмбур, паськöм, мыйöн вöдитчылöмаöсь миян пöль-пöч.

Сiйö кадас тайö вöлi збыльысь ыджыд воськов водзö. Зонпосни ичöтсяньыс велöдчисны комиöн сёрнитны, сьылiсны-йöктiсны и. Коми мойдъяс серти челядь петкöдлiсны неыджыд театральнöй ворсöмъяс. И асьныс кагульничаяс радпырысь тайö уджсö вöчисны. Сэки тайö детсад йывсьыс «Югыд туй» газетö на гижлi. Ставöн эскылiм, мый тадзи позьö вужйöдны зонпоснилöн сьöлöмö чужан кыв дiнö муслунсö. А сэсся чайтiм, школаын нин сiйö водзö вынсялас-ёнмас.

Вужвойтырлöн асвежöртöмыс ловзьылiс да мыйтакö вынсявлiс, кор кольöм нэм помын миян республикаын чужис «Коми котыр». Йöзыс заводитiсны эскыны, мый олöмсö позьö бурмöдны, мый ас муын коми лоö збыльысь кöзяинöн. Эскисны и нырщикъяслы, кодъяс быд сикас чукöртчылöм дырйи уна мый кöсйысисны вöчны. Сэсся «Коми котыр» пыдди лои «Коми войтырöс сöвмöдан комитет», сы бöрын котыртчис «Коми войтыр» öтмунöм. Сэк жö олöмыс öтарö омöльтчис. Торйöн нин рынок вужйöдöм бöрын. Сикт-грездын, кöнi буретш олö вужвойтыр, киссисны-бырисны совхозъяс.

Примерысла ылö оз ков мунны. Казьтыштам нималана «Сыктывкарскöй» совхоз. Помнита, кыдзи шызьылiсны «Коми войтыр» öтмунöмлöн Сыктывдiнса юкöнлöн чукöртчылiгöн, кор кыптiс тайö совхозсö асалöм йылысь сёрни. Но республикаса видз-му овмöс да сёян-юан кузя сэкся министр Геннадий Низовцев радлiс. Бур пö, мый видз-му овмöсö пырöдчö ыджыд бизнес. Босьтчылiсны эськö Выльгортысь, Сёськаысь, Озёлысь воöм йöз паныд шуасьны, но кодi найöс сэки кывзiс. Отмунöмлöн исполкомса веськöдлысь В.П. Марков весиг эз волы тайö конференция вылас. Некодлы лои вужвойтыртö дорйыны. И бура тöдса, мый водзö лои тайö овмöсыскöд.

Олöмыс петкöдлас

«Коми войтыр» öтмунöмса исполкомöн öнiя веськöдлысь Сергей Габов лыддьö, мый колö ышöдны йöзсö велöдны чужан кывсö, ёнджыка та йылысь сёрнитны, гöгöрвоöдны сылысь тöдчанлунсö бать-мамлы да челядьлы. А коми учебникъяс да мукöд юалöм кузя пö ми сёрнитам исполкомлöн чукöртчылiгöн.

Тайö чукöртчылiгас вöлi юöртöма, мый Паль сиктысь бать-мам оз кöсйыны, медым налöн челядь велöдiсны коми кыв да литература. Тайö пö содтöд сьöкыдлун... Челядь ёна мудзöны...

Районса  велöдчысьяс вöлöм ёнджыка окотитöны велöдны английскöй кыв. Талунъя олöмас пö сiйö, тадзлыддьöны ныв-зон, ёнджыка колö. Райадминистрацияысь культура отделöн веськöдлысь Марина Андреева пасйис:

— Миян районысь челядь ветлiсны Венгрияö. И сэнi олiгас английскöйöн сёрнитöмаöсь. И гостиницаын, и лавкаын... Найö асьныс аддзöмаöсь тайö кывйыслысь коланлунсö.

Талун кыдзи?

Бур, мый öтмунöмлöн Сыктывдiнса юкöнын зiльöны «пöсь» сьöлöма войтыр. Весь оз овны, кутшöмкö бокысь воöм дядьö вылö оз надейтчыны. Сьöкыдлунъяс вылö видзöдтöг йöзыс уджалöны, зiльöны коми кывсö видзны да сöвмöдны. И таысь ыджыд аттьö.

Сiдз, Паджгаын уна во нин уджалö эстетическöй образование шöрин. Сэнi ныв-зонмöс велöдöны сюмöдысь да бадь ньöрйысь кыны кöрзина-пестер, пуысь да кыдз йöгысь вöлавны яндöва, пемöс мыгöръяс, мукöдтор. Весиг велöдöны пуны-пöжавны коми национальнöй сёян-юан.

Районас нуöдöмаöсь «Коми письменность», «Менам зарни куд» да уна мукöд конкурс, «Коми национальнöй традицияяс» фестиваль... Водзö ог лыддьöдлы. Серпасыс и сiдз ясыд. Бара на сыктывдiнсаяс со водзмöстчöны. Вöзйöны районса детсадъясын нуöдны «Комиöн сёрнитам» акция. Мед тöлысь чöж челядь да бать-мам варовитiсны сöмын комиöн.

Oтмунöмлöн Сыктывдiнса юкöнö пырысьяс вöзйисны районас котыртны «Коми кыв. Сылöн тöрытъя, талунъя, аскиа лун» конференция да коми кыв кузя олимпиада, школаясö восьса урокъяс вылö корлыны республикаса нималана учёнöйясöс. Республикаса велöдысьяслысь тöдöмлун бурмöдан институтысь Е.П.

Шеболкина вöзйис «Коми кыв ме тöда» аслыспöлöс ордйысьöмын вермысьяслы козьнавны Финляндияса Лапландияö путёвка.

Ставыс тайö, дерт, бур. «Гöгрöс пызан» сайын нöшта висьталiсны, бать-мамлы пö колö ёнджыка водзмöстчыны чужан кыв велöдöмас. Но а кыдзи тайöс збыльмöдан? Индöмтшöктöмöн? Пальын тай со бать-мамыс мöд ног лыддьöны.

А, гашкö, колö бур пример. Мед сiйö ышöдiс, мед ставныслöн син водзас вöлi. Финляндияысь кыв туялысь Паула Кокконен Комиö волiгас комиöн сёрнитö. Миян странаысь либö республикаысь суйöр сайö ветлiгöн зiльöны жö английскöйöн варовитны. А ас чужан муын коми гежöда юргö. Сiйö жö «Коми войтыр» öтмунöмлöн конференцияяс вылын кызвыныс рочасьöны. А республикаса министерствоясын да гырысь предприятиеясын кывлан öмöй коми сёрнисö? Гырысь чинаяс тöдöны-ö вужвойтырлысь кывсö? Коми, кыдз и роч, лоö государственнöй кывйöн. А нималана коми гижысьяслöн да учёнöйяслöн ныв-пиыс сёрнитöны-ö комиöн? Налы и колö лоны ышöдысьнас. Гижысьяс пиысь сöмын Виктор Напалков да Николай Щукин «Коми му» газетын юксьöны шог-майшасьöмнас.

Коми кыв сöвмöдöм йылысь сёрнитiгöн кыдзкö вунöдiсны, мый Коми небöг лэдзанiн бырöдöма-тупкöма. И некод — ни гижысьяс, ни «Коми войтыр» öтмунöмса нырщикъяс - ёнасö талы паныд эз тшöтясьны. Зык ни шум эз тай кыптыв-а.

Казьтылi нин, сыктывдiнсаяс вöзйöны нуöдны коми кывлы сиöм во. Республикаса национальнöй политика министерствоын тайö шыöдчöмсö ошкисны. Гашкö, локтан воыс и збыль лоас коми кывлöн воöн.