Кольöм кадсö гортас видзö (на коми языке)

Емдiн сиктын олö-вылö зэв аслыспöлöс ань Эмилия Степановна Феаяева. Ас районас сiйöс ыдждöдлöны мойдысьöн, Улыс Эжваса фольклор, обычайяс да традицияяс тöдысь-видзысьöн.

Сiйö чужлöма Емдiн районса Быков Ыб грездын 72 во сайын. Мамыс да Иринь бабыс сэки нин нималöмаöсь мойдысьясöн. Коми легендаяс, бöрдöдчанкывъяс, мойдъяс да преданиеяс, вöлöм, вуджöны кöленаысь кöленаö. Позьö шуны, Эмилия Степановналöн став тöдöмлуныс куим пöвста нин. Фольклор туялысьяслы сiйö зарни куд кодь. Буретш Эмилия Степановна отсöгöн Емдiн районын ловзьöдöмаöсь важся обрядъяс. Медтöдчанаыс — «Коми свадьба».

Эмилия Степановна ордö локтан да быттьö мойдö веськалан. Керкаыс онялö шаньлуннас. Сылысь сёрнисö вомтö паськöдöмöн позьö кывзыны. Он и тöдлы, кыдзи кольöм кадас веськалан. Шемöс босьтö, кутшöм тöждысьöмпырысь да мелiа сiйö видзö-лелькуйтö важдырся паськöмкöлуйсö. Сылöн эм кыксё восайся мегыр; прабабыслöн на кувсьöмаясöс казьтылан-кодралан небöг, кодi вижöдöма нин важысла; ош пинь - ыджыд батьыслöн кыйöмтор; Улыс Эжваса войтырлöн важся паськöм - шушун да платтьö-сарапан; ки чышкöдъяс. И быдтор йитчöма кутшöмкö ыджыд да югыд казьтылöмкöд.

Районса музейлы Эмилия Степановна козьналöма 160 экспонат нин. Гортас видзö сöмын меддона да медмуса важдырся паськöмсö. Ставсö мыськöма да гладитöма, тэчöма ыджыд картон кöрöбъясö.

А медыджыд озырлуныс куим чемоданын. Наын - чышъянъяс. Быд сикасыс и быд рöмаыс, ставнас 250 сайö. «Самшура», «Кашемир», «Саржа», «Майя», «Кокошник» — быд чышъянлöн аслас ним, аслас история. Медважыс 1912 вося. «Медтомыс» — тавося. Ачыс дöмасъясысь вурöма. Зэв мича. «Дзоля йöрöн» нимтöма. Но медрадейтана да медмуса чышъяныс — мамыслöн, кодöс быд пöрйö босьтiгöн Эмилия Степановна мелiа окыштö...

Олöма ань абу дышöдчöма да туялöма ассьыс ордпусö. Батьыс кузя чукöрмöма 230 морт. Кабалаыс, кытчö ставнысö пасъялöма, кисö шевгöдöмöн кутiс да, кузьджык на. Oнi дасьтö мам кузяыс ордпу. Таысь кындзи лöсьöдö Коми Республикалы да Емдiн районлы сиöм альбомъяс.

Кор и удитлö ставсö! Радейтана верöсыскöд, Михаил Григорьевичкöд, видзöны мöс да кук. Сэсся гортаныс нёль кань. Эмилия Степановна удитö на и клубын сьывны. Емдiнса «Сударушка» котырын сiйö 45 во нин. Сытöг сиктын оз коль некутшöм концерт.

2007 вося гожöмын енбиа аньöс пасйöмаöсь Россияса Президент Владимир Путинсянь ыджыд наградаöн - «За отличие в патриотической деятельности» медальöн.

Кöть и 72 арöс нин Эмилия Степановналы, мелi чужöмас омöля на чукыръясыстöдчöны. Юалi, мися, кыдзи мичмöдчанныд да, висьталiс аслас гусятор йывсьыс. Быд асыв пö шоныд на мöс вöра йöлöн чужöмöс мыська.

Михаил Григорьевичкöд шуда гозъя быдтöмаöсь 4 челядьöс. Ставныс вылыс тшупöда тöдöмлунаöсь. Ачыс Эмилия Степановна помавлöма юркарса видзму овмöс техникум, нэмсö уджалöма бухгалтерöн. Диплом-грамотаыс зэв уна. Михаил Григорьевич - инженерстрöитель - районын бура тöдса да пыдди пуктана морт жö. Май 17 лунö найö пасйисны ассьыныс зарни кöлысь. Мед эськö и водзö шуда да югыд лоö олöмныс.