Радейтöй чужан кывнытö (на коми языке)

—Ичöтсянь радейтi лыддьысьны. Школаö на мунтöдз анбурыдкöд ёртаси. Сэки роч книгаыд эз вöв. Меным тай киö эз веськавлы-а. Медся первой книгаыс, кодöн тöдмаси, вöлi нималана гижысь Василий Юхнинлöн «Биа нюр» повесьт. Oтчыд дай мöдысь на лыдди, тшöтш и ичöтджык воклы. Дзик öд миян олöмвылöм, сiйö кадся велöдчысьяс йылысь небöгыс, — висьталö Мария Лавровна Титова.

Сiйö чужöма-быдмöма Сыктыв районысь Куратов сиктса Ждановчи грездын. Казьтышта, коми гижысь Иван Алексеевич Куратовлöн чужан сиктыс зэв аслыспöлöс. Oти-кö, сiйö збыльысь ыджыд, некымын дас грездысь артмöма. Мöд-кö, сэтчöс олысьяс пыр нимавлöмаöсь уджачлуннас да писькöслуннас. Татшöмöн вöлöмаöсь и Машалöн бать-мамыс. Найö зiльöмаöсь ассьыныс ныв-писö бура быдтыны-велöдны.

Сэсся ныв велöдчöма Ягыбса школаын. И регыд мысти сiйöс казялöмаöсь. Бура лыддьысьö, артасьö, водзмöстчö, быд праздник кежлö ыззьöдö ёртьяссö котыртны гаж... Кадысь кадö велöдчысьяслысь юавлöмаöсь, школа бöрын мый пö кутанныд вöчны, кодöн пö кöсьянныд лоны. Маша пыр öти ног вочавидзлöма:

—Лоа библиотекарöн. Ачым радейта лыддьысьны, и вöча ставсö, медым челядьлы да верстьöлы мусмис жö книга-журналыд.

Школасö помалöм бöрын ныв лэччöма Сыктывкарö да пырöма юркарса культпросвет училищеö. Тайö вöлöма 1970 воö. Сэнi велöдчöма, дерт, библиотекарö. Училищесö помалöма да, ыстöмаöсь уджавны Визинö. Сiйö кадсяньыс и зiльö сэнi.

Мария Лавровна казьтыштiс:

— Помнита, кыдзи медводдзаысь локтi библиотекаö. Майшаси, öд йöзкöд колö уджавны. А Визинса олысьяс вöлöмаöсь зэв шаньöсь, менö, том нылöс, быд ногыс ышöдiсны. Пасья, кольöм нэмлöн 70-80-öд воясас коми книгаяссö, журнальяссö ёна на лыддисны. Челядь, шöр арлыдаясыс, весиг и олöмаыс тшöкыда волывлiсны библиотекаö. Сiйö кадас войтыр корисны Василий Юхнинлысь, Иван Тороповлысь, Геннадий Юшковлысь, мукöдлысь коми гижысьлысь висьт-повесьтсö. Коми небöг лэдзанiн вöлi сöмын на йöзöдас выль книгатö, а йöзыс юасьöны нин. Oткымынöн весиг дöзмывлöны, тэ пö со суседлы водзджык сетöмыд лыддьынысö. «Войвыв кодзув» журналтö радпырысь жö босьтлывлiсны, весиг öчередь сы вылö вöлi.

Талун серпасыс вежсьöма. Дерт, лыддьысьны радейтысьяс и öнi тшöкыда библиотекаö волöны. Но Мария Титова шуö, мый коми книга босьтысьыс чинöма воддза сертиыс.

Oд олöмыс ёна вежсис. Визинын, кыдзи и республикаса мукöд сиктын, мам кывйöн сёрнитысьыс абу уна. Талун пö ёнджыкасö колö тöдны английскöй кыв, медым водзö велöдчыны-сöвмыны. Тайö том йöзлöн видзöдлас. Жаль кöть абу, а Пётр Шаховöс да Николай Щукинöс ёнджыкасö лыддьöны олöмаяс. Мария Лавровна висьталiс, мый чужан кывья небöгьяссö медся ёна корöны велöдысьяс. Сiдз, Александра Михайловна Старцева кувтöдзыс ёртасьöма коми книгакöд, пыр пыдди пуктылöма «Войвыв кодзув» журнал. И татшöмьясыс юрсиктын öнi на эмöсь.

А томуловыс мöдджык нин. Найö корöны юöр сетысь небöг-журнал, мый торйöн нин колö налы олöмас либö велöдчигас. Тшöкыда лыддьысянiнын листалöны и юридическöй литература. А лов кокньöдöм могысь öосьтöны радейтчöм йылысь небöгьяс либö жö детектив-триллер.

Мария Лавровна нюммунiс: —Сöвет власьт кадö йöзыс зiлисны судзöдны-ньöбны нималана гижысьяслысь уна тома книгаяссö. Быд патераса либö керкаса шкапын татшöмыс радöн-радöн сулалiсны. И найöс лыддисны, тшöтш и рöдвужыс, суседьясыс корлывлiсны. Oнi, видзöдан да, книгаясыс бусöссьöмаöсь. Талунья олöмыс сэтшöм, мый йöзыс лыддьысьнысö, тыдалö, оз окотитны али кадыс аöу.

Визинса шöр библиотекаын жö кыпыд. Джаджьяссö бура мичмöдöмаöсь, нöшта на быд сикас серпасыс эм. И небöгыс уна, матö 28 сюрс. Россияса да республикаса газет-журналсö судзöдöны комынысь унджыкöс. Майбыр, сöмын лыддьысь. Библиотекаас сiдзжö нуöдöны быд сикас рыт-гаж, кытчö чукöртчывлöны и том йöз, и олöмаыс. И таын медся ыджыд пайыс Мария Лавровна Титовалöн. Сёрнинымöс сiйö тадз сигöртiс:

—Зэв окота, мед коми йöз радейтiсны чужан кывсö да коми небöгсö!

Татчö, кыдз шуласны, нинöм нин содтынытö...