И сиктад овнытö бур (на коми языке)

Надежда Юрьевна Шуктомова помавлiс Сыктывкарса видз-му овмöс техникум. Дас сизим во уджалiс «Часовскöй» совхозын лаборантöн, главнöй зоотехникöн. А совхоз бырöм бöрын со дас нёль во нин веськöдлö Час сиктса пошта юкöнöн.

—Тайö уджыс сьöлöм серти, — висьталö Надежда Юрьевна. — Быд лун пыравлö уна йöз. Оз сöмын гижöдчыны газет-журнал вылö. Танi босьтöны пенсия, мынтысьöны коммунальнöй услугаясысь, бать-мам мöдöдöны сьöм карын велöдчысь ныв-пиыслы. Сэсся и кутшöмсюрö тöварöн вузасям. А газет-журнал вылад öнi ёнджыка пондiсны гижöдчыны. Быд керкаö мыйкö да мыйкö воö, оз этша и «Коми му». Сiдзкö, йöзыс бурджыка кутiсны овны. Со Дзоля Слудасаолысь Галина Александровна Гацукович дас гöгöр газет да журнал лыддьö. Сылöн öд семьяыс ыджыд. Быдтö и босьтöм челядьöс. Сöмын тай гижсян доныс содö воысь-во. Колöкö, и зiльджыка на эськö гижöдчисны.

Шуда Надежда Юрьевна и гортса олöмнас. Верöсыскöд, Иван Александровичкöд, быдтiсны кык нылöс, кодьяс ёна отсасьöны бать-мамыслы. Гозья видзöны мöс, кукань, порсь, вöдитöны уна картупель, мукöд град выв пуктас. Картупельсö сё мешöкöдз вузалöны. Эм асланыс «МТЗ» трактор. Сы отсöгöн горт гöгöрас уна удж бергöдöны. Стрöитiсны и аслыныс выль керка. Сöмын пö тай помавнысö некыдзи огö вермöй, — серам сорöн шуö Надежда Юрьевна.

И збыльысь, гозья шудаöсь, сьöкыдлуньяс вылö оз элясьны.

Зiль йöзыдлы уджыд тырмö. Сямман кö, и сиктад позьö бура овны.