И ставыс бура инасьö (на коми языке)

Кор районса газетъяс вуджисны офсет вылö, сэтчöс типографияяс воштiсны медшöр уджсö. Oд найöс «вердiс» буретш газет печатайтöмыс. Тадзи лоис Кулöмдiнын, Удораын, Изьваын.

Республикаын медводдзаяс лыдын компьютер отсöгöн босьтчисны лэдзны и Кöрткерöсса «Звезда». Газет кутiс петны Кировын. Типографиясаяс первойсö шöйöвошисны. Кыдзи кутчысьны водзö?

Сöмын бланокьяс лэдзöмöн водзö он во. Да и быд предприятие-организацияын нин эмöсь компьютерьясыд, посниторьяс вермасны печатайтны асьныс. Сэсся и Сыктывкарыд орччöн, став заказсö сэнi вöчасны öдйö. И бура. Важмöм машинаяснад тай места вылад сэтшöм жö прöдукция и петiс. Сiдз шусяна высокöй печатьыд эз нин кут ковны.

Но коллектив, кодöн веськöдлiс ыджыд опыта специалист, удж вöсна сьöлöмнас висьысь морт Лидия Потапова, ловнас эз усь. Oти-кö, эз вошты йитöдсö важся заказчикьяскöд, мöд-кö, пыртiс уджас выльторьяс. Во-мöд сайын ньöбöм ризограф отсöгöн позьö лэдзны бланокьяс, буклетьяс, небöгьяс сiдзи жö, кыдзи карын. Дерт, ичöтджык тиражöн. Медым книгаясыс вöлiны мичаджыкöсь, налы эжöдьяссö вöчöдöны республикаса типографияын. Водзтi нин, важ машинаяснас танi зiлисны вöчны кампет кодь мича петасьяс: вöдитчисны уна рöма кабалаöн, быд сикас дзоридзöн, торья шыпасьясöн. Тадзи, шуам, артмис челядьлöн кывбурьяса небöг. Некымынысь зэв мичаа петавлiс вöр-ва видзöмлы сиöм «Родничок» альманах. А «Тэнад йöз, Кöрткерöс» кызкодь справочник, кодöс юрсиктса полиграфистьяс дасьтiсны неважöн на, лоис пызанвывса сувенир кодьöн.

—Небöгьяссö лэдзны öнi миян дорö шыöдчылöны оз сöмын ас районса авторьяс,—висьталö «Полиграфист» ООО-öн веськöдлысь Л.И.Потапова.—Танi петiс Сыктывкарса поэт Виктор Демидовлöн сборник, танi жö «Аняби» книгаын йöзöдiсны кывбур-висьтьяссö Кулöмдiн районса гижысьяс. Регыд налысь босьтчам лöсьöдны нöшта öти петас. А ас районсаяслы ми сетам весиг кутшöмсюрö кокньöд. Шуам, донсö чинтыштам. Некымын историческöй гижöд нин печатайтiм ас му туялысь Александр Панюковлысь, таво отсалiм йöзöдчыны Шойнатыысь öти гижысьлы.

Типографияын лэдзöмторьясыс бура инасьöны. Лидия Ивановнакöд миян сёрнитiгöн сы дорö пырисны Кöрткерöсса больничаын уджалысьяс. Бöрйисны гоз-мöд книгаöн—и рочöс, и комиöс. Ас районса петасьяссö пö ми век ньöбам окотапырысь.

Типография, кодлöн керкаыслы 90 во нин, кодöс öти пöрйö дзикöдз тупкылiсны, а сэсся 1965 воын бöр восьтiсны, аслыс уджсö пыр аддзö. Тöдчö директорлöн водзмöстчöмыс. Казьтыштам, Лидия Потапова вермис республикаса «Нывбаба-предприниматель-2006» конкурсын. А сыкöд тшöтш зiльöны быдтор нин кужысь печатница Валентина Петровна Клермон да линотипистка Мария Захаровна Гитева. Асланыс уджысь öтдор и свинечтö сывдасны, и кабала рулонтö вундаласны. Да и машинаястö велалiсны нин мавтавны-дзоньтавны.

Рыноклöн гыяс вылын сьöкыд кутчысьны сöмын талуньянас да тöрытьянас олысьяслы. Сы вöсна и «Полиграфист» ООО-ын мудзлытöг зiльöны бурмöдны ассьыныс прöдукциясö, мед печатькöд йитчöм могьясöн йöзыс эз мунны карö, а шыöдчисны кöрткерöссаяс дорö.