Видза олан! (на коми языке)

Менам киын коми кыв велöдан «Видза олан» небöг, кодöс дасьтiс филологияса доктор Евгений Цыпанов. Выль небöгыс збыльысь чолöмалö быдтор тöдны зiльысь лыддьысьысьöс, кодi кöсйö пыдiсяньджык велöдны Коми Республикаса вужвойтырлысь, а сiдзжö Тюмень обласьтса Ханты-Манси да Ямало-Ненеч автономия кытшъясын олысь комияслысь чужан кывсö.

Россия Федерацияса олысьясöс 2002 воын гижалöм серти Тюмень обласьтын олiс дас сюрс сайö коми-зырянин да пöшти нёль сюрс комипермяк. Сэтчöс кык автономия кытшын зэв уна во нин олöны-вылöны ненеч, ханты да манси войтыркöд орччöн изьватас. Буретш налы и сиöма выль небöгсö.

Дас нёльöд нэмын Эжваса Перымöс вöлi пыртöма Московскöй государство кипод улö. Уна Енлы эскысь комияс пöвстын кутiсны паськöдны Исус Кристослысь нимсö. Буретш сэки коми войтыр ёнджыка кутiсны мунны Урал из сайö.Кöть эськö и таöдз нин эз этшаöн на пиысь овмöдчыны сэтчö. Хантьяслöн Шеркалы да Перегрёбное сиктьяс бердын аддзöма важся комияслысь ХII-ХIV нэмьясса оланiньяс. Oнöдз Улыс Обь бердын кольöмаöсь коми географическöй нимьяс: «Войкар», «Искар», «Шурышкар», «Сускар». Да и талун Ханты-Манси кытшса Щекурья, Няксимволь, Казым да Ямало-Ненеч кытшса Мужи, Киеват, Овгорт, Катравож, Харсаим, Горки, Питляр сиктьясын кызвын олысьыс коми. Коми, ханты да манси öти котырö пырысь войтырлöн уна öткодь кывйыс. Со и налы кокниджык гöгöрвоны öта-мöднысö.

Выль небöгыс отсалас пыдiсяньджык тöдмавны коми кывлысь аслыспöлöслунсö. Учебникыс тöдмöдö и Коми мулöн историяöн да географияöн, коми культураöн, республикаса государственнöй пасьясöн да административнöй юкöньясöн, фольклор да художествоа литература гижöдьясöн. Тайöс вöчöма сы ради, мый Урал сайса комияслы сьöкыд судзöдны чужан кыв вылын литература да газет-журнал. И выль учебникыс отсалас аслысногöн видзны налы чужан кывсö да культурасö. Небöгнас позяс вöдитчыны Ханты-Манси да Ямало-Ненеч автономия кытшьясса шöр школаясын, шöр да вылыс велöдчанiньясын. Лэдзис выль небöгсö сюрс экземплярöн Ханты-Мансийскса «Полиграфист» государственнöй предприятие.