Юргö коми сьыланкыв (на коми языке)

Таво Коми му пасйö Нёбдiнса Витторлы чужöмсяньыс 120 во тырöм. Тöд вылö пыр и усьö поэт Альберт Ванеевлöн Виктор Савинлы сиöм кывбур: «Сыысь комиджык мортыс став му вылас сэсся оз сюр.»

Сьöкыд муртавны, мыйта удитiс донтöг-медтöг гижны-сёртны енбиа мортыс! Серафим Попов, нималана поэт, кодi коми литературакöд тшöтш сöвмис-быдмис ыджыд гижысьöдз, тöдчöдö: «Сылöн сьыланкыв оз кувлы, ас пыддиыс олö.»

Аттьö «Коми му» газетлы да «Войвыв кодзув» журналлы, кодьяс тöдмöдöны коми войтырöс Виктор Савинлöн олан туйöн.

Нималана «Арт» журнал таво медводдза петассö быдсöн сиис Удорапы. Дерт, сьöкыд öтпырйöн ставсö пыртны, сюркнявны. Сымда бур гижысь-кывбурапысь, таланта йöз эм Удораын, кыдзи и Комилöн мукöд пельöсын. Колö шуны, мый медшöр редакторыс, Галина Бутырева, тöдчана поэт, — удораса ань, дай Павел Лимеров, ыджыд учёнöй, фольклор туялысь, медшöр редакторöс вежысь, сiдзжö удораса петас.

Колö чайтны, «Арт» вочасöн кутас и водзö гижнытуявны енбиа коми йöзлысь аслыссикас сёрнисö, важдырся кад, оласног, сьыланног. Тайö вывтi кывкутана удж. И таысь водзвыв ыджыд аттьö журнал дасьтысьяслы!

Ыджыд юкöн сиöма коми гижысьяслы, кодьяс чужисны Удораын да уна кывбурвисьт сиисны дона чужан мулы. Коми му пасьтала нималöны Альберт Ванеев да Юрий Васютов, кодьяс «вуджисны» мöдар югыдö, но пыр кежлö колисны коми литератураын, йöзлöн паметьын. И талунья удораса петасьяслöн «Арт» журналын эм уна бур гижöд. Тайö кывбуралысьяс Нина Обрезкова да Елена Афанасьева, прозаик Алексей Вурдов да уна мукöд гижысь, кодьяс водзö нуöдöны коми литератураын воддза гижысьясöн юждöм туйсö. Ыджыд юкöн «Арт» сиöма Владимир Стожаровлы, Россияса народнöй художниклы, кодi колян нэмся 60-öд воясын тшöкыда волывлiс Удораö, серпасавлiс сэтчöс вöр-васö, сиктьяссö, йöзлысь оласногсö. Позьö шуны, став Россияыс сылöн серпасьяс пыр тöдмалiс удораса мичлунсö! Колö пасйыны, мый тайö кывкутана уджсьыс Владимир Стожаровлы сетiсны Россияса Государственнöй премия.

«Арт» журнал лыддьысьöс бöрьяпомас виччысьö чуймöдана козин: компакт-диск, кытчö пыртöма удораса кузь нэма сьыланьяс, бöрдöдчаньяс да челядьлы сиöм бурдöдчанкывьяс... Таысь, дерт, колö аттьöавны Павел Лимеровöс, учёнöйяс пöвстын нималысь фольклор туялысьöс.

Бур сьыланкывьяс, кыдзи шуöны, и лысьöмтö бурдöдасны. Кор сьывсьö, сэки сöльнитчывлö йöзлöн лов шыныс. Тöдлытöг вазьöны синьяс, кор шудöдас кывзыны Ен нога олысь пöчьяслысь ливкйöдлöмсö. Кузь пемыд рытьясö печкигöн аньяс сьывлiсны сьöлöмьясын чужöм мыла сьыланкывьяс. Некод на пиысь эз помавлы консерваторияястö да эз нимавлы гораа, но кыпыда, гöгöрвоана юргисны сьыланьяс, лов-сёрнияс. Збыль öд шуöны, мый кужанлуныс—прöстлунын, аöу пуста чиклясьöмын...

Дась сорысь «Коми му» газет пыр окота мöдöдны Питерса тöдсаяссянь Коми йöзкостса радио дасьтысьяслы пöсь чолöм! Нимкодь горт дорысь ылыстчöм мортлы кывзыны коми кыв-вор, важ-выль сьыланкывьяс...

Гожся кадö став ловья лолыс сьылö-славитö олан кадсö. Кыдзкö яндзим весиг овны-öтдорасьны тайö гажпунсьыс. Кöть и шуöны, «мöд кад, мöд пöлöс сьыланкывьяс», но эскыссьö, мый пыр кежлö колясны олöмас важдырся йöзкостса сьыланкывьяс.

«Юргы, юргы,

ылöдз кыв,

Мыла коми сьыланкыв,

Йöз олöмысь шогсö ну

 Кыпöд, гажöд Коми му!»

Тадзи гижлiс ас кадö Нёбдiнса Виттор. Зэв нин ёна кöсйисны дзикöдз вуштыны сiйöс му вывсьыс немортьяс. Но, слабог, артмис мöдарö: öнöдз коми войтырыс, кыдзи меддона пиöс, бурöн казьтывлöны да гораа сьылöны Виктор Савинлысь сьыланьяссö.

«Коми му» газет—чужан кывлöн, сiдзкö, и коми войтырлöн лов кутöд, дорйöг, петан туй. Ылi Питерсянь комияс мöдöдöны ыджыд чолöм, вочаалöны газет лöсьöдысьясöс пыдди пуктана арлыдö воöмöн! Да мед нöшта эта мында овны-вывны, гижны-сьывны!